滋陰保腎 錫身等娶熊黛林 47歲郭富城就住搏

真面目

滋陰保腎　錫身等娶熊黛林　 47歲郭富城就住搏

近年港產片 hero淨係得個葉問，就連復活節檔期都有套黃秋生孭飛嘅《葉問•終極一戰》，總之有票房就拍到爛先收手。

好彩復活節都有另外選擇，由郭富城、張家輝孭飛嘅《同謀》，其實係 07年套《 C+偵探》最終回。雖然話事隔 6年， 47歲嘅城城依然好 fit，但係跳樓跳火車爆炸等危險場面，都係由電腦特技加替身搞掂，城城要錫身，有乜依鬱要延期娶熊黛林過門點算？

47歲郭富城騷肌有市，演唱會全爆。盡曬胸肌、腹肌。不過都未夠苟芸慧同熊黛林兩女爭一城夠娛樂性，如今苟芸慧敗走，據知城城更已搵師傅教生仔秘方兼年中擇日迎娶女友過門。

替身頂上

除了開演唱會外，城城上年套《寒戰》成為 12年最高票房港產片，有票房保證，而新戲《同謀》其實係《 C+偵探》嘅最終回，劇情講述郭富城追查父母被殺真相，仲去大馬搵張家輝幫手。戲中城城唔再好似前兩集嬉皮笑臉。全程認真 mode啟動。除咗查案情節，《同》片亦有大量動作場面，城城話：「有生命危險嘅就我拍，好在最後都有驚無險。」。但其中一幕跳火車戲，城城雖親自上陣，不過只限於火車橋上跟架火車鬥快，畫面睇好驚險，但實情架火車開得勁慢，到真正跳橋，則由替身上陣，另一場重頭爆炸跳樓戲，則由電腦特技搞掂，城城連煙都見唔到。

07年拍攝《 C+偵探》，郭富城真係喺垃圾池拍。戲中仲瞓身跳落去，𠵱家梗係唔會啦！

CG爆炸

戲中郭富城有唔少爆破場面，雖然啲爆炸場面係 CG畫面，但拍攝時都要喺二樓高跳落軟墊加紙皮盒度，郭富城話導演安排得好好，有驚無險喎！

替身頂

最驚險一幕，城城要喺架空路軌同架火車鬥快，但實情係架火車只係慢速前進，到最後跳落街嗰下，仲要由替身頂替。

家輝打餐死

戲中第二男主角張家輝，原來入行多年，只係第一次同郭富城合作。已貴為影帝嘅張家輝，難得今次喺戲中做番當年《黑馬王子》嘅抵死幽默。跳橋又威又型冇佢份，反而戲中打交場面就全部由佢負責，打餐死仲要被人吊起，大家都係影帝，怪就怪張家輝搞笑太掂囉！

《同謀》郭富城全程扮認真，個樣成日都凶神惡殺，反而啲笑位集中喺張家輝身上。

女主角戲少

戲中唯一女主角國內演員江一燕，北京電影學院表演系畢業，雖然同郭富城有感情綫，不過戲分不多而且全部點到即止，城嫂可以放心。

張家輝扮高手

今次城城飾演嘅陳探變得成熟唔搞笑，其餘下把瘀嘢就由張家輝負責曬，其中張家輝仲要經常擺葉問式嘅詠春手同人開拖，家輝話：「有好多場視覺上睇真係好痛嘅，不過導演控制得好好！」即又係有驚無險囉！

哮喘葉問

戲中張家輝要扮好打，仲要扮葉問，望落去都有啲偉仔嘅《一代宗師》影子。

吊完再撻

張家輝除咗成日被人打，仲要俾人吊起，梗係最後由郭富城救番啦！

鍊到上癮

就係呢場車戲拍咗 3日，張家輝同郭富城仲 friend咗，拍完後城城仲同班特技車手鍊車。

前後夾擊

《同謀》喺復活節第二檔上映，雖然夾喺黃秋生嘅《葉問•終極一戰》同古天樂嘅《毒戰》中間。不過承接《 C+偵探》嘅粉絲，絕對有得鍊。

《葉問•終極一戰》上映中

黃秋生飾演老年葉問，最勁嗰場打戲竟然係同曾志偉打，阿伯開拖搞笑感超強！

《毒戰》 4月 18日上映

古仔同孫紅雷做毒販，同加杜琪峯、韋家輝，可惜係同國內嘅合拍片，香港人可能要 tune強國 mode入場！

撰文：娛樂組

. 滋陰保腎　錫身等娶熊黛林　 47歲郭富城就住搏
http://hittt.blogspot.com/2013/04/47.html