整容孖妹 整容搣甩 Nel Nel面 靚曬 Cammi：我想抽脂隆胸

真面目

整容孖妹　整容搣甩 Nel Nel面　靚曬 Cammi：我想抽脂隆胸

整容科技話咁易，隨時匿埋 3日可以變女神，不過港仔始終唔多受後天加工，難怪明明個樣唔同曬，班姐仔仍然死口話只係化妝技術影響。

難得最近有兩位女星大膽承認整容，不過效果卻一個天一個地。先有無綫小花陳思齊（前名陳凱怡）打針整容搞到鼻腫面腫遭網友恥笑；再有 Cammi（謝芷蕙）承認割雙眼皮成功變靚，由女版 NelNel變到似女神 Baby， Cammi仲未滿足話：「我仲想抽脂隆胸。」

14歲出道謝芷蕙（ Cammi）， 10年靠與陳冠希（ Edison）的「舌吻照」流出，由冇人識急變上位「希嫂」，可惜遭網友嘲笑似 NelNel，隨着 Edison斬纜兼有新「希嫂」 Ann（洪文安）出現， Cammi人氣近年低過零，上月終於等到 18歲，實行飛到韓國整容搣甩 NelNel味。

大眼補妝

變臉還要靠高超化妝術， Cammi話從未真正學過化妝，化妝術全靠做攝模時訓練出來，最着重眼部化妝，拍攝當日見佢經常攞住支眼線筆畫兩畫，隻眼更加大。

側面似 Baby

除了做 7針吊線眼皮手術、 Cammi強調其他部位冇動工，只係上年出寫真前打過 2次透明質酸改善面形，加上減肥，側面睇真係有幾分似 Angelababy喎。

「睇吓仲有冇得發育」

自言只做雙眼皮手術的 Cammi話一心等到 18歲就想整容，佢話：「 18歲我可以自己做決定，唔使屋企人簽紙，我只係去韓國做咗 7針吊線整雙眼皮，手術大概萬八蚊，當日做咗 2個鐘就搞掂，整眼係為咗化妝方便，影相靚啲。」

變靚照曝光後， Cammi成功吸引電車男注意，更有眼利網友話佢連胸部都再發育，但 Cammi則堅持自己胸部未加工：「我冇睇網上面啲 comment，覺得話我嗰啲人好白癡，我都想過整其他地方，不過我𠵱家仲細，睇吓仲有冇得發育先，我想大約 25歲嗰陣抽脂隆胸，我唔抗拒整容，不過最想有美容院贊助啦，係女仔都想靚，執靚個樣冇問題㗎！」

平日返夜校讀商科，一到週末便北上登台， Cammi話每個月至少都有 5位數收入。《忽然 1周》圖片

未變臉前， Cammi素顏返學，現時雖仍有返夜學，但仍經常北上搵錢，她說：「𠵱家主要係返大陸打碟登台囉！」

同溝女王 Edison的「舌吻慾照」流出而人氣急升，除 Edison成為雜食王外， Cammi亦被指借 Edison上位而形象勁差。

Cammi被指貌似同樣面長眼矇的 NelNel（張學潤），又話佢似羊及鬥牛㹴， Cammi對此堅決地說：「我從來唔覺得同佢哋似囉！」《蘋果日報》圖片

打針過量出事

《女警》腫面妺：好多姐仔心鬱整容

3月還原

陳思齊表示冇後悔整容，因為透明質酸已被身體吸收，成功還原靚靚。

打完一針後，因要接受雜誌採訪而打第 2針，搞到效果 over咗。圖片

而另一「變臉女」 30歲前港姐陳思齊（前名陳凱怡），喺近日劇集《女警愛作戰》及《仁心解碼 II》中，被觀眾發現她面腫鼻高判若兩人，現已還原靚靚的陳思齊說：「上年因擔任美容院代言人，所以接受透明質酸注射，第一次打效果好靚，好似鬼妹，嗰排喺街勁多人撩，仲有星探話要發掘我，之後打第 2次就 over咗，個樣勁腫，嗰時拍緊《神探哥倫布》及《女警愛作戰》，啲同事都勁好奇，祥仔（黎耀祥）及丹爺（劉丹）走嚟篤我個鼻，拍《女警》時天華（謝天華）問我個樣搞乜，我咪答整容囉，劇組好多女 artiste都心鬱，不過我唔會講你知邊個。」

對於面腫都要繼續開工，剛約滿打算外闖的她說：「啲通告之前都接落冇得推，咁我又唔係主角，咪照開工囉，我個樣點唔介意，唔好彈我演技就得啦！」

11年勁腫

剛出街的《女警愛作戰》，打完第 2針的陳思齊塊面腫得恐怖，她仍面不改容照常拍劇。

拍《女警》時，陳思齊剛打完透明質酸，她爆劇中很多女星都有興趣，但她就不肯開名講。

採訪、撰文、攝影：娛樂組

形象： Bryan@the Flaming

化妝及髮型： Veron Wong

服裝： Bershka

. 整容孖妹　整容搣甩 Nel Nel面　靚曬 Cammi：我想抽脂隆胸
http://hittt.blogspot.com/2013/04/nel-nel-cammi.html