金枝保鑣大解構 徐子淇 李嘉誠 李澤楷

媽咪姐

金枝保鑣大解構

唔少世姪女成日同媽咪姐講，我要嫁個有錢人呀!!!通常呢個時候，媽咪姐會好溫柔咁摸吓佢哋嘅額頭，講聲：「瞓醒先啦！」想飛上枝頭變鳳凰，唔該先 check吓「硬件」，係咪樣靚身材正先？再 check埋「軟件」，係咪身家清白有兩個學位再讀緊 MBA又溫柔賢淑呢？係呀，係好難㗎！喂，依家講緊係嫁喎，你要 one night或者做小三，唔該求其搵個「奮發向上」嘅𡃁模教你啦。

好嘞！就當你集齊以上軟硬件，好似嫁咗俾四叔二仔李家誠嘅徐子淇咁好未？又聽吓千億新抱嘅前保鑣主管淩劍剛點講，「富豪生活唔係一般人想像咁嚮往，佢哋嘅雀籠只係比我哋大小小！」所以想食碗熱雲吞麵都要諗計，睇戲例牌遲到早走。當然，有回報嘅，李太放手袋嘅房，有成間舖咁大，款式仲多到好似博物館㖭！

Well，都係嗰句，呢個世界係等價交換，你想安安樂樂嘆碗平民麵，定規行矩步開間 private museum吖？醒吓啦！上天為咗平衡人間利益，係唔會俾你得到所有嘅。媽咪姐呢，自知無本事兼零興趣做金絲雀，睇吓富貴人家嘅保鑣陣，已經夠 fun㗎嘞！

徐子淇萬能孖咇

貴為千億新抱嘅徐子淇，出身小康，為人隨和，平日行街通常只有兩名貼身保鑣。不過，佢同傳媒關係千絲萬縷，身邊保鑣除咗一般職務外，仲要知道幾時要擋鏡頭，幾時要扮助手。

智擋記者

名太去 shopping，十之八九會遇到記者。保鑣擋定唔擋，視乎老細有無化妝、嗰排有無收 order要曝光等等，好複雜㗎！《蘋果日報》圖片

等了又等

徐子淇同兩個女去迪士尼。保鑣隔開人群之餘，等，更加係必要嘅！等老細去洗手間，等兩個少主慢慢玩，神心過老公。

撈埋助手

做得貼身保鑣，其實等於做埋助手兼保母。老細除咗件褸喎！你唔係唔 9秒 9幫佢拎吓嘛？手袋呢，就唔使嘞！ Show time呀。圖片

小小超虛則實之

最近同混血女大狀梁芳打得火熱嘅李澤楷，鍾意自由自在，連老竇李嘉誠都 control唔到。當阿哥李澤鉅日日俾成隊「兵」包圍住，小小超就只願意接受無形保護，即係要啲保鑣同佢保持距離，但喺有需要時又要 9秒 9幫到手！高囉。

預先布陣

小小超現身前，司機（藍風褸）同保鑣（西裝）緊密聯絡，睇定情況。

一切 clear之後，李澤楷先急急上車。唔好誤會，開車門嗰兩個係商場保安咋！李生啲保鑣一個上車，幾個離遠𥄫住，好低調。

護埋紅顏

近年李澤楷有兩位新歡，公屋之花梁雯影（左圖）同 29歲女大狀梁芳（右圖），佢會搵保鑣秘密送女方到餐廳撐枱腳，又或者 call名人朋友高梁美蘭搵人帶走大狀返屋企，好周到！

《蘋果日報》圖片

. 金枝保鑣大解構 徐子淇 李嘉誠 李澤楷
http://hittt.blogspot.com/2013/04/blog-post_6739.html