搜尋此網誌

2013年4月26日星期五

Bobby辭演 麥包攝位頂上 馬浚偉藐爆:好失望




娛聞樂

Bobby辭演 麥包攝位頂上 馬浚偉藐爆:好失望

娛樂圈是圓的,冇永遠的敵人。無綫正鬧小生中生荒,就連多年前曾出言寸無綫的馬浚偉都被急召回巢拍劇,更破天荒開出任揀對手、加人工與保證攞視帝的條件,來利誘馬仔。

條件優厚,馬仔當然心鬱,舊仇一掃而空。豈料在他臨動筆簽約前夕,由他親自點名合作的歐陽震華( Bobby)卻因身體問題辭演,無綫急就章,惟有搵三線的麥長青(麥包)頂上。

Bobby與麥包,級數明顯相差一大截。一向吊高嚟賣的馬仔難免嫌棄麥包未夠班,更向記者直認:「真係好失望囉!」被拍檔藐爆,見慣風浪的麥包惟有自嘲:「可能我讀得書少啦!」

馬浚偉雖然去年因合約問題而與無綫結束 18年賓主關係,但他始終是「收視福將」,一直屬製作部總監曾勵珍(珍姐)愛將。於是珍姐就以每集 3萬來利誘馬仔回巢拍新劇《守業者》,馬仔更獲特權任揀男女對手襯他。千挑萬選下,馬仔最後決定與歐陽震華( Bobby)和出爐視後楊怡合作。

珍姐欽點

曾勵珍一向錫馬仔,二人於公開場合碰面便傾唔停,珍姐更開到口:「佢係福將,我一直都好想佢返嚟㗎啦!」

老婆禁拍

早前歐陽震華入院接近兩星期,其太太傅潔嫻每天也眼紅紅往醫院探望,難怪歐陽太短時間都唔俾老公拍劇。《蘋果日報》圖片

Bobby:怕連累同事

正當無綫鬆一口氣,以為馬仔回巢實食冇黐牙,但人算不如天算, Bobby年初卻因急性肺炎要入深切治療部留醫,身體大過天, Bobby只好辭演。知情人士說:「 Bobby好有合約精神,諗住捱埋呢套劇先唞,但佢老婆(傅潔嫻)唔批准,佢老婆仲親自出面搵珍姐傾㖭呀!」 Bobby亦向本刊承認真有其事,他說:「我係辭演咗同馬仔合拍嘅新劇。哎!我入咗行成 30幾年都未好好咁放假,今次出事之後,老婆成日叫我好好休息,我覺得佢都講得啱。如果拍緊嘢,有起乜事上嚟,屋企人辛苦,我亦怕連累同事。」

Bobby因病辭演,即使勢強的馬仔亦要無奈接受,他只好再覓人選。知情人士說:「 Bobby個角色做馬仔阿哥,所以馬仔想搵一啲有戲味嘅中生合作。佢試過大想頭搵視帝祥(黎耀祥),但祥哥又點會有期吖!」劇集一早 book定廠期,非 5月開拍不可,於是無綫就搵檔期較易遷就,但檔次較低的麥包執二攤。據知無綫通知馬仔,劇中 Bobby的角色將由麥包取代時,馬仔頓時火起,「佢今次返得嚟拍,就預咗套劇要 hit,所以先要搵啲有分量嘅對手,又難怪馬仔咁㷫,仲扭計話唔簽約㖭!」

欠新鮮感

馬仔和麥包合作過《鐵血保鑣》等多部劇集,難怪馬仔嫌對手欠新鮮感。

楊怡唔敢呻

楊怡一早預了檔期與馬仔合作演情侶,據知她亦恨與 Bobby再結劇緣。現時由麥包頂上,楊怡敢怒不敢言。《蘋果日報》圖片

表面老友

馬仔與麥包拍劇時亦經常放相上微博,表面老友,但估唔到馬浚偉對麥包頂上一事有咁多意見。

麥包:我係行行企企

馬仔主持兩輯的《大廚出馬》收視普通,但無綫得悉馬仔對主持有興趣,也唔介意開多一輯。

要撲熄馬仔怒火,無綫只好再作讓步,除了加馬仔原來每集 3萬酬勞到 4萬外,更應承馬仔再開兩個綜藝節目《大廚出馬 3》與《大廚衝出香港》由他孭飛,𠱁馬仔回心轉意。至今仍未動筆簽約的馬仔,早前向記者大發牢騷,他說:「我由頭到尾都諗住可以同 Bobby對戲㗎嘛!同 Bobby上次合作已經係十幾年前《壹號皇庭》嘅事。嗰陣我仲係𡃁仔,同 Bobby同場都只係學嘢啫!所以我依家真係好失望囉!(係咪嫌麥包未夠班?)我同麥包係好兄弟嚟㗎。不過一件還一件,同麥包合作真係唔夠新鮮感。」

周二( 23日),記者就此事致電麥包,他略帶晦氣說:「我知佢(馬仔)想同 Bobby合作,咁真係會失望啦!佢係小生,我只係側邊行行企企嘅!套劇梗係賣佢㗎啦!不過我唔信馬仔係咁嘅人,可能我讀得書少,粗枝大葉啲!」而監製梁材遠就向記者透露已與馬仔傾掂數,他說:「咁馬仔一早真係諗住同 Bobby合作,但依家冇事啦!搞掂曬㗎喇!」為令馬仔回巢,無綫今次認真低聲下氣。

中生回巢有價

無綫中生荒,因此不惜重金禮聘有收視保證並曾離棄無綫的中生回巢。

張家輝

每集 10萬

04年拍完《天涯俠醫》便脫離電視圈的七料影帝張家輝,有指他獲無綫以 10萬元一集力邀回巢拍 30集長劇。

張智霖

每集 8萬

41歲的張智霖,不時幫無綫拍劇增加劇集新鮮感,早前他就以 8萬元一集拍攝《衝上雲霄 II》。

吳鎮宇

每集 8萬

51歲的吳鎮宇雖然神經質,但屢獲無綫重用,繼 03年台慶劇《衝上雲霄》後,早前無綫再以 8萬元一集成功利誘他拍第二輯。

吳啟華

每集 6萬

近年主力北上, 48歲的吳啟華,自 05年拍完《妙手仁心 II》後,今年再以 6萬元一集身價拍《 On Call 36小時 II》,同樣飾演醫生。

張兆輝

每集 5萬

張兆輝近年返國內賺唔停,去年他被無綫誠意打動,以 5萬一集拍攝《結.分@謊情式》及《神探狙擊 2013》兩套劇。

採訪、撰文:娛樂組

攝影:攝影組


. Bobby辭演 麥包攝位頂上 馬浚偉藐爆:好失望
http://hittt.blogspot.com/2013/04/bobby_8392.html
Related Posts Plugin for WordPress, Blogger...