綠葉王：梁健平乜都拍搵位突圍

曾飾演威利哥和陸光超而為人認識的梁健平，當年畢業後第一份工就在邵氏工作，及後轉到無綫，他坦言一直視邵逸夫（六叔）為老闆，如今六叔已退休，於是他帶著放眼看世界心態過檔CTI，跟無綫結束30年賓主關係。他在無綫時產量頗多，很多劇都見到他的演出，他覺得藝人不應該揀騷，因為「任何機會都係機會」，只要機會一到就可突圍而出！撰文：黃曉妍

梁健平在邵氏做沖印，沉悶的工作令他做了一年就轉投無綫，他指當年電影產量很少，相對工作也很快完成，最開心是中午食飯，他會走到攝影棚睇拍戲，他說：「記得有次有場戲講傅聲俾人吊上半空，身上有十萬支箭，劉家良、劉家輝坐喺門口度等set-up，好有大哥風範。」由小到大，梁健平是個電視迷，試過有女同學約他，他以趕回家追看鄭少秋的《倚天屠龍記》為由而婉拒，他笑說：「我點會為咗佢而放棄秋官。」

梁健平今年離開無綫，轉投城電，他表示想尋回昔日的親切感。攝影：林德雄

心痛同事冇糧出

後來梁健平自薦入無綫，任職道具佈景組，他謂當時一直等待機會出現：「出面街（電影）會入嚟TVB揀蟀，當年TVB真係好巴閉，我見過鄭裕玲周潤發喺旺角，萬人空巷，正如早前劉德華喺旺角同一個情況。後來我轉咗做廣告三年，大約80年代初，當時我乜都要做，試過有人叫我撈埋演員拍廣告，之後開始咗演員生涯。」

梁健平在無綫演出劇集多不勝數，他笑說：「年初拍《女警愛作戰》，周麗淇問我點解套套劇都有我，我作咗個藉口，我話自己係TVB清道夫，乜鬼垃圾我都掃。作為一個普通藝員唔應該推騷、唔應該揀嘢，發哥當年講，千揀萬揀嗰套戲係唔爆，佢拍《賭神》、《秋天的童話》，佢有信心咩？但就係爆咗，我唔知我會唔會撞到，所以任何機會都係機會，人哋認為你做某一個位，人哋自然會揀你，所以無謂去強求。」在《潛行狙擊》中飾演威利哥，在《拳王》中飾演陸光超，有觀眾仍然記得，梁健平說：「有次行尖沙嘴，有班搭棚工人離遠隔條馬路叫我做『威利哥』，我望一望，嚇！咁都認到，佢哋好熱情，呢兩個角色係我臨走前，TVB送畀我嘅禮物，所以我好多謝兩位監製莊偉健同羅禮賢。」

在《潛行狙擊》中，梁健平飾演黑幫人物威利哥，演出令觀眾讚賞。電視圖片

在《拳王》中，梁健平扮演奸詐富商，七情上面。

不少前無綫藝員狂呻多年來沒加人工，底薪也奀得可憐，梁健平透露當年爆騷，但無綫只加他50元一個騷錢，他說：「公司當時同我講我已經好好，有啲冇得加㗎，仲話過兩年唔知業績會唔會倒退，所以唔加咁多，或者唔會加畀我，好彩我有幸今日仲未死。收入一直冇OK過，我咪食平啲囉，而且我慶幸太太有份好職業，有好收入，可以支持到我做表演藝術，其實我只係希望有合理待遇。今年5月我過嚟CTI，後來聽到TVB舊同事有人工加，我好戥佢哋開心，因為我好心噏，曾經見過有同事唔夠騷冇糧出，好多人因為咁要離開，我個心好唔安樂，好彩監製李添勝、潘嘉德同王心慰出手救同事，畀劇佢哋拍，咁先度過難關。」

梁健平（左一）產量多，連《女警愛作戰》拍檔周麗淇（中）也不禁笑他「套套劇都有你」。資料圖片

齋識喊唔算好戲

梁健平離開無綫，除想轉換新環境外，最想尋回昔日那份親切感，他說：「新公司有新衝擊、新士氣，好似拍青春歌舞劇《童話戀曲201314》，見到班細路跳舞好開心，大家好有活力，喺舊公司係睇唔到呢啲，老闆王維基無啦啦會叫廚師煮三餸一湯，然後搵人車嚟外景畀我哋。」梁健平還希望拍更多好戲：「催人熱淚唔難演，我唔覺得流眼淚嗰啲人好戲，令到觀眾睇完有得著或影響到觀眾，例如男女分手、有家人離世，但因為戲中一句對白、我嘅一場戲令觀眾釋懷，呢個係我嘅目標。」梁健平希望CTI快點獲政府發牌，刺激電視行業，有良性競爭，令這個行業蓬勃起來。

梁健平自小就是電視迷，笑言曾因回家追看劇集而拒絕女同學的約會。

人物誌：角色多變　宜忠宜奸

梁健平現年46歲，畢業後加入邵氏工作，其後簽約無綫，從80年代活躍至今，他演過的劇集多不勝數，包括《城市故事》、《壹號皇庭》、《棟篤神探》、《潛行狙擊》和《拳王》等，角色多變，忠奸皆宜，最令人印象深刻的角色是《潛行狙擊》中的黑幫堂主威利、《耀舞長安》中的教坊廚師包昇及《拳王》中的反派富商陸光超，而今年他離開無綫，轉投王維基旗下的城市電訊。