2012年12月24日星期一

加盟無綫創神話陳煒首擔奸角色誘上位

加盟無綫創神話陳煒首擔奸角色誘上位

PACO名人會——

加盟無綫創神話陳煒：首擔奸角色誘上位大家睇完唔好打我

陳煒(煒哥)是我相識多年的好朋友，當年飯局之後，我們再沒有見面，直到她近期回港定居，決定再次重踏電視舞台並加盟無綫旗下，我實在急不及待邀請這位好友與我詳談當中的變化。「加入新公司之後，第一個見街角色將會係我從演以來首次擔當嘅奸角﹗」直言戲癮甚重的陳煒，回港後重拾演戲生涯，對於加盟後的首個角色如此出位，我先要在此預祝煒哥一炮而紅。主持﹕黃柏高統籌﹕林永匡協力﹕袁東亮、龍婉琪化妝提供﹕維納髮型提供﹕PatrickSo@HHHair

重拾演戲生涯

96年亞姐冠軍的陳煒，出道時風頭一時無兩，直至08年嫁為人妻後，便隨丈夫到處做生意，一度息影幕前，確實令不少一眾欣賞她演技的觀眾失望，如今重現幕前，的確是觀眾之福。

「先生是台灣人，結婚後隨他四處做生意，所以無機會停留喺香港，一度息影，但依家一來已經搬返香港，二來一直都戲癮難擋，所以回港之後就決定重拾我最愛做嘅事情，就係拍劇集。其實自己一直都好擔心觀眾們已經遺忘我，畢竟我已經有一段時間無喺電視熒幕前出現，殊不知大家仍然記得我，行出街仲有好多人叫我個名，感覺其實幾開心。相比舊公司，TVB的確規模好大，多咗好多機會，雖然早前拍嘅劇集依家先開始出街，但公司一直都畀好多演出機會我，譬如早前嘅《東華》、《瘋狂歷史補習社》等，希望平台轉咗之後，大家能夠從唔同嘅角色認識我，欣賞我嘅演技。」

首次擔演奸角

演員從來只有好與壞之差別，闊別電視熒光幕一段時間的煒哥，加盟新公司首部推出劇集便擔演從未接觸過的奸角，的確是一大挑戰﹗其實只要拍得好，角色是正，是邪，誰又會在意。

「剛剛出街的《法網狙擊》將會有我的演出，大概會喺第十七集，即明年初現身。今次將會係我從演以來第一次飾演奸角﹗不過大家睇完憎恨角色好啦，千祈唔好打我﹗角色係一個名叫龐鐵心嘅集團CEO，人如其名係一個鐵石心腸嘅人，當中背負一個復仇計劃，為咗爭奪原本屬於家族嘅嘢，不惜違背法律做出好多不當嘅行為，而其間亦會使橫手及色誘身為律師嘅郭政鴻。其實作為從未做過反派角色嘅自己，初初都會質疑自己究竟做唔做得嚟，但好彩監製好好，畀咗好多信心我，希望大家會歡迎煥然一新嘅我啦﹗」

做到最激最盡

先後與謝天華及郭政鴻於《法》有感情線的陳煒，當中與同郭政鴻的連場激咀戲最為搶鏡，看來這次重返電視舞台的煒哥，銳意做到最好、最盡。

「幾年來無拍戲，始終都驚自己生疏，加上換咗新環境，與一班從未合作過嘅演員合作，當中的確有啲憂慮，好慶幸正式拍攝時，好快就可以同大家熟稔起來。喺《法》內，大部份時間都係同郭政鴻做對手戲，當中仲有唔少嘅激咀場面，好彩我哋好快已經達到共識，而且大家都認為一係唔做，一做就要做到最好、最激，所以都放咗唔少時間落去鑽研，究竟點做先可以令觀眾有好深刻嘅印象。」

展望更好未來

人人都說今年是「世界末日」，無論末日是否真正的來臨，往後的生活還是要好好地過，提到下年目標，一向愛演戲的煒哥，依舊盼望下年能覓得一個好角色。

「下年希望身體健康外，最重要係想再接拍多種唔同類型、發揮的角色，因為咁多年來，觀眾們能夠睇我演技嘅機會都唔多，依家有機會一次過呈現喺觀眾面前，實在好希望大家都會喜歡、認同我，嚟緊26號更會正式開拍《神槍狙擊2013》的外景，當中更會同樣以奸角見人﹗」

Paco陳煒

黃柏高

陳煒直言自己的戲癮一直很重，能夠重返電視舞台，她感到非常高興。

加盟無綫後，陳煒除了接拍劇集外，還拍了不少綜藝節目。

陳煒早前在籌款活動《歡樂滿東華》內穿上超性感舞衣跳肚皮舞，引來一時佳話。

於《法網狙擊》作忘我演出的陳煒，表示與對手郭政鴻很快便培養出默契來。