年年幫駒媽賀壽 驚爆朱咪咪崩牙駒親密關係

58歲的朱咪咪，跑慣江湖唱酒廊，前晚在澳門出席最近刑滿出獄的江湖中人尹國駒（崩牙駒）母親壽宴。擔任司儀兼唱歌助興的朱咪咪，更替主人家邀來出爐視帝黎耀祥和方伊琪表演。朱咪咪昨日接受訪問，自爆獲壽星婆駒媽痛錫，年年撐場賀壽，她更直呼崩牙駒為阿駒，可見二人關係密切。

澳門江湖猛人尹國駒去年底出獄，重獲自由後與家人團聚，前晚駒媽在澳門漁人碼頭會議廳中心搞壽宴，崩牙駒邀請了三屆視帝黎耀祥、朱咪咪和方伊琪前來表演助興，原來朱咪咪是駒媽至愛，並幫手安排表演嘉賓，她為o氹壽星婆，席間大唱徐小鳳經典金曲。

■崩牙駒（右）與胞弟尹國雄前晚在母親壽宴，兄弟上台高歌一曲《念親恩》，令駒媽（中）感動到喊。

變A貨徐小鳳獻唱

崩牙駒獲釋後，前晚首年為母親賀壽，筵開133席大宴親朋，尹府壽宴的會場保安嚴密，崩牙駒全程笑容滿臉，朱咪咪、祥仔和方伊琪不但為駒媽大唱生日歌，還伴著壽星婆切蛋糕。兼任司儀的朱咪咪昨日接受本報電話訪問時，自爆受駒媽寵愛，她說：「我每年都去駒媽壽宴，十幾年前已經開始，駒媽好錫我，阿駒入獄前我都已經去，今次阿駒返出嚟，開心啲咪搞大啲，駒媽都想熱鬧啲。」朱咪咪稱呼崩牙駒為阿駒，足見他跟崩牙駒母子關係密切。

問到朱咪咪收多少酬金？她說：「我收利是，冇計錢，駒媽咁錫我，我每年開演唱會，佢都嚟捧場。呢次壽宴，佢半年前已通知我。」據知朱咪咪還幫手聯絡祥仔和方伊琪，朱咪咪說：「唔係我統籌，佢哋嗰邊都有人。」駒媽愛聽徐小鳳，朱咪咪就變身A貨徐小鳳，她說：「唱咗幾首小鳳嘅歌。」

■朱咪咪知道壽星婆駒媽喜歡徐小鳳，她即場高唱徐小鳳經典金曲娛賓。

資料圖片

■最近出獄的崩牙駒（前排左二）前晚在澳門為母親（前排右一）擺壽宴，大排筵席。

傳祥仔收酬金20萬

壽宴中不乏感人場面，朱咪咪說：「全場好感人同溫馨，阿駒同細佬上台唱咗《念親恩》，兩兄弟攬住阿媽，駒媽忍唔住喊咗出嚟，咁感動點會唔喊？呢次係阿駒出嚟第一次同駒媽賀壽。」朱咪咪更大讚崩牙駒歌喉，她說：「成家人個個都好唱得，好掂。」

祥仔前晚逗留大半小時，先後唱了三首飲歌，分別是電視劇《巾幗梟雄之義海豪情》歌曲《紅蝴蝶》、《有酒今朝醉》和《前程錦繡》，其後他還跟崩牙駒胞弟尹國雄合唱了《舊歡如夢》，記者昨日致電身在內地工作的祥仔，他說：「國雄唱得幾好，記得曬啲歌詞，我仲以為要傍住佢。」

祥仔指他做過三年駒媽壽宴表演嘉賓，但由於往年崩牙駒正在獄中，前晚才首次碰面，他說：「駒哥好孝順佢媽咪，佢又好客氣，我一去到就畀咗酬金先表演。」接觸崩牙駒後可覺他豪氣？祥仔說：「睇唔出，佢同普通人冇分別。」有傳祥仔前晚出騷酬金達20萬，他避談：「錢幾多就唔好講，講得多又唔好，少又唔好，大家鍾意點傳就點傳。」

■視帝黎耀祥前晚也撐場演唱，他笑言未開騷，崩牙駒即識做先付酬金。

■祥仔馬不停蹄搵真銀，昨日又到陽江出席房地產活動，同場還有徐子珊。

祥仔透露在後台等候時，崩牙駒帶同親友進來要求合照，他當然樂意做人肉佈景板，為江湖中人私人宴會表演可有甚麼禁忌，祥仔說：「冇乜特別唔同，始終都係一個騷，呢晚又係老人家生日，我哋作為藝人嘅，志在娛樂大家，唔理佢乜嘢背景、地位同階層，我又冇黨冇派，我接騷只係睇乜嘢性質，今次係咪咪姐叫我。最緊要老人家開心，我哋有陪佢上台切蛋糕。」

方伊琪讚歌藝出色

另一表演嘉賓方伊琪表示過往曾出席過約三次駒媽壽宴，她昨日在電話中回應：「我唔係第一次見駒哥，佢好好。」方伊琪也大讚崩牙駒兄弟為母獻唱一幕感人，她說：「咁多人同佢慶祝，最緊要老人家開心，我都係收封利是。」方伊琪指崩牙駒的歌藝有80分，她說：「佢唱得唔錯，佢哋唱卡拉OK，好多人都唔夠佢唱。」

採訪：比華利、楊潔雯

人物誌：朱咪咪唱酒廊出身

■朱咪咪年輕時唱得又睇得，所以很受歌迷歡迎。

現年58歲、原名朱月美的朱咪咪，出身於馬來西亞，小學畢業後便到新加坡，展開歌唱生涯。由於自小有歌唱天份，對音樂觸覺敏銳，再加上年輕時擁有G.E.M.的外表，因此很受歌迷歡迎。79年，朱咪咪來港發展，早期以唱酒廊、夜總會維生，也認識到不少江湖猛人。之後，91年朱咪咪擔任「廟街歌王」尹光演唱會嘉賓，扮偶像徐小鳳演出大受歡迎，奠定她後來的搞笑演藝明星路。

小八卦：洗米華染指娛樂圈

■洗米華（左）投資拍攝《低俗喜劇》，與男主角杜汶澤相熟。

綽號「洗米華」的周焯華，前晚雖然缺席，但他其實是崩牙駒的徒孫，有傳崩牙駒東山再起，洗米華功不可沒。有指洗米華其實是前年成立的太陽娛樂文化公司的幕後大老闆，該公司旗下歌手有小肥、陳僖儀、陳奐仁及剛剛過檔的薛凱琪，而負責打骰的則是「金牌經理人」黃柏高（Paco）。該公司去年有份投資拍攝由彭浩翔執導的《低俗喜劇》，結果香港票房錄得3,000萬，鄭中基亦憑該片奪得金馬獎最佳男配角。

話你知：崩牙駒最愛曬歌喉

■崩牙駒（右）愛唱歌，在學友澳門演唱會上，上台與學友合唱。

崩牙駒一向喜愛唱歌，90年代亦有涉足娛樂圈，先後為張學友和劉德華舉辦演唱會。96年6月，學友在澳門開騷，當晚崩牙駒意氣風發，表示有人捐30萬，請他上台高歌《男兒當自強》；同年12月，崩牙駒再為劉德華到澳門舉行三場騷，但尾場時被警方拘留，其胞弟尹國雄代兄上台高歌《書劍恩仇錄》。此外，98年崩牙駒斥資一千多萬元拍攝電影《濠江風雲》，片中主角任達華飾演黑幫大佬，其實是崩牙駒前半生的寫照。

.年年幫駒媽賀壽 驚爆朱咪咪崩牙駒親密關係
http://veryy8.blogspot.com/2013/01/blog-post_5659.html