2013年1月5日星期六

張美妮想飛

張美妮想飛

同人唔同命，娛樂圈有人出道一帆風順，備受力捧，有人卻捱過十多個年頭才稍有成績。由無綫訓練班出身的張美妮，在電視圈浮沉十年，現在才於公仔箱得到更多機會，相比同期的楊怡和林峯已是一線花旦小生，星途確實有天淵之別。雖然曾埋怨自己浪費時間，但美妮現在心境變了，有劇就拍，有騷照做，她說︰「雖然唔係被力捧嗰批，但我冇唔開心。」

轉眼張美妮已在無綫第十個年頭，但同人唔同命，同期訓練班的楊怡成為熱辣辣的視後，另一同期的林峯早已紅得發紫。與二人相比，張美妮只接騷或主持節目，甚至只演綠葉角色，但她未有因此而感到沮喪，她說︰「因為剛開始時我去做主持，而佢哋就已經拍劇，有唔同嘅開頭。我係比上不足，比下有餘，雖然唔係被力捧嗰批，反而我冇唔開心。」

起步太遲

美妮深明要在無綫生存的道理，就是一個「等」字，適逢去年掀起電視大戰及小生花旦挖角潮，有人走就有人上，也許這就是美妮等待的機會︰「其實我諗過關唔關事，雖然唔係公司經理人合約，但依家拍劇機會多咗，當然開心啦！可能呢個就係我嘅機會！講到攞獎，對我太遙遠，自己起步太遲，做咗兒童節目5、6年。但問心我都想拎飛躍（飛躍進步女藝員獎），不過做咗10年先拎，好似好怪，我只係想公司覺得搵我做嘢係安心，會比預料之內得到更多嘢！」

說得豁達，但美妮也有自我埋怨的時候︰「開頭做兒童節目可以講係浪費咗時間，雖然做頭幾年係開心，因為由寂寂無聞嘅一個人開始，但之後不斷重複同停留，諗番起只怪自己當時唔夠主動，只係識聽公司決定。」

感謝楊怡

翻看美妮有份拍攝的電視劇作品其實近30部，但有多少套擔綱重要角色？美妮卻覺得毫不重要，她說︰「以前我唔夠鬥心，反而依家多咗，其實最緊要有得發揮，咁先可以畀人睇到自己嘅努力，畀人重視。」她更不忙感謝兩位好友楊怡和麥長青（麥包）時刻鼓勵︰「有時我都會打畀楊怡，問佢點去演繹一啲角色，間唔中佢都會上嚟我屋企，好多謝佢咁幫我。」

至於麥包同樣是她的老師，她說︰「記得同佢拍劇，佢同監製都話我唔得，聽到係唔開心，有啲失落，但其實佢都係想我可以提升自己，自問我拍劇經驗唔多，佢不厭其煩咁教我，都想感激佢。」說時她不禁拿對方與林峯開玩笑，她笑說︰「不過套劇同佢做兩公婆，估唔到10年後先獻出螢幕初吻，咁就畀咗佢！哈哈！點解唔係林峯，但之後返去諗，佢都畀人話係『年老林峯』，惟有咁樣安慰自己啦！」

開舖搵錢

藝人想開拓多條財路搵錢，創業開舖十分常見，美妮就是其中一人，經營的髮型屋已開到第5間，今年她亦已有一連串擴充業務的大計，生意做得相當成功，但她自言拍戲拍劇會更加適合︰「今年想開多一至兩間，但我做生意唔係好成功，因為我係之後先入股嘅，而且我最鍾意嘅都係演藝工作。」至於被冠以「富婆」封號，她即耍手擰頭說︰「我真係唔係，上年係搵咗6位數，但做生意唔係所有錢都可以鬱得，而且生意係長遠，可能10年或者20年先會做得順，況且我仲未買到千萬豪宅，呢兩樣對我嚟講太長遠喇！」

後記：恨嫁到爆

32歲的張美妮給人感覺事業心重，演藝事業外還要打理髮型屋生意。入行10年，感情生活不見得精彩，問她要做女強人而不需要愛情？她反應甚大的說︰「我好想結婚，一路期待緊合適結婚對象，我係一個家庭觀念好重嘅人，依家有追求者，但我拍拖就要諗埋結婚。」看來她對人生大事非常著急呢！

張美妮認為自己起步太遲，但仍希望可以奪得飛躍進步女藝員獎。

經營髮型屋的張美妮否認是圈中的富婆。