有話兒：黎芷珊最佳女主角
黎芷珊於84年憑組合「少女雜誌」出道，20多年後雖已是芷珊姐姐，但在別人眼中，依然是個跑新聞的小主持，只是她卻樂在其中，隨遇而安的性格不但令她快樂，更令她無意中得到更多，芷珊就用她的節目《最佳男主角》來證明自己是近期娛圈的最佳女主角。撰文：羅美倫
黎芷珊84年與陳慧嫻、陳樂敏出了名為《女少雜誌》的唱片專輯，當時三位青春少艾各有各美，轉眼芷珊已年屆46，外貌、身形沒多變，只是隨年資增長，芷珊由兒童節目主持再變身成為專訪問明星、名人的芷珊姐姐。
在群星拱照下，芷珊首次嘗到做女主角的滋味。
做了小主持多年，黎芷珊最近做了屬於自己的節目《最佳男主角》，有吐氣揚眉感覺。攝影：陳慧安
芷珊84年與陳慧嫻、陳樂敏出《少女雜誌》專輯，算做過三分一女主角。資料圖片
碌人情卡溫暖
稱號變了阿姐，但主力在主持方面發展，地位跟拍劇的花旦差天共地，即使出唱片做過三分一個女主角，芷珊始終與真正女主角無緣，最近她首次以個人名義邀得梁朝偉、劉德華、黃秋生、謝霆鋒、劉青雲等實力男星受訪，輯成節目《最佳男主角》，芷珊首次被群星拱照，一嘗女主角滋味。
對於首次做女主角，芷珊說：「真正係第一次自己排頭嘅節目，真係碌曬自己嘅卡，感受好好，好溫暖，成班義氣仔女都好肯幫，講明係幫我。」芷珊口中的這班義氣仔女，全因她平日訪問態度溫和漸漸與他們建立好關係，所以眾人對她百分百信任，芷珊說：「佢哋信得過我，好多都唔使事前睇問題，埋位就嚟，亦冇乜嘢唔答，反而有啲答得太多，佢哋經理人公司叫唔好講或者唔好出。」
芷珊曾與譚玉瑛及周星馳一起主持《430穿梭機》。資料圖片
芷珊不時要出外跑新聞，她覺得樂此不疲。資料圖片
感謝偉仔霆鋒
得到一班巨星義助，芷珊認為大家都同情她：「我做咗咁多年，佢哋可能覺得我咁陰功，都幫嚇你啦！我覺得梁朝偉會諗『嘩，你撈咗咁耐都仲係咁，仲唔幫嚇你，你好慘喎。』我都同佢講，如果你肯坐低做呢個訪問，你真係幫咗我好多，幫我提升喺無綫嘅地位，開頭我冇講得咁白時，佢有啲考慮，但我咁講佢即刻應承，好有義氣！」
除了偉仔，芷珊對謝霆鋒肯幫忙亦感意外，她說：「以前同霆鋒、許志安、蘇永康出嚟玩，但10年冇出嚟hea。霆鋒近10年發生咁多事，頂包、結婚、離婚生仔都冇正式做訪問，我都係膽粗粗試嚇，估唔到佢肯。其實佢公司唔肯，但因為我哋係朋友佢就肯，而劉德華我知佢一定會幫我。」問芷珊有否送上包著「無言感激」字條的利是答謝嘉賓？她大笑說：「送咗tvbuddy公仔囉！公司送㗎，佢哋上得嚟就唔係諗住要乜啦，我以後會將佢哋嘅訪問盡量做得好啲嚟報答。」芷珊還多謝兩位無綫高層樂易玲及餘詠珊，樂小姐是續約時聆聽她的要求並給與鼓勵，餘詠珊就提供很多意見且為節目做了最好鋪排。
入行28年，才在眾人眼中做了點成績來，原來芷珊不曾失意過，當年陳慧嫻走紅，現在陳樂敏結婚生女又有自己事業，一切一切芷珊都開心面對，芷珊說：「從來都冇心灰意冷，根本野心唔大，工作開心就得，又唔係要大紅大紫，參加學校歌唱比賽入行都係符碌，全部係整定咁，唔係我做主動。」
芷珊大膽向梁朝偉講明需要幫忙，偉仔一口答應，認真有義氣。電視圖片
霆鋒所屬公司曾不許他受訪，但因他與芷珊份屬好友，最後也答應做訪問。電視圖片
「我唔坎坷㗎」
問有否覺得自己沒有太大成就？芷珊繼續笑說：「我真係咁陰功？啲人成日話我仲要出去跑好陰功，但我真係享受出去做訪問。公司要我出去訪問係因為會有好多方便，我做咗30年，有邊個唔識芷珊姐姐！」芷珊從不覺得這些年難捱，在無綫做主持工作雖然地位不高，但她也有不少外快，不用像花旦們捱更抵夜，她揚言：「我唔坎坷㗎！」
姊弟戀專家
黎芷珊在感情方面的戰績比工作彪炳，她先後跟梁家輝、鄭伊健、邵傳勇、陳小春及張達倫拍拖，一個月前才跟細她12年、拍拖九年的張達倫分手，芷珊說：「因為細12年咁多，以前嗰啲細一、兩年或三、四年，開頭同佢一齊諗住實驗嚇，點知都九年，有段時間咪以為得囉，佢又畀到百分百信心我。」可惜芷珊跟張達倫有緣無份，即使外間人覺得年紀相差大，外貌仍相襯，但芷珊的想法卻不同：「佢鍾意行山運動，我就冇乜興趣，又懶，體力上又應付唔到，遲啲再大啲點呢？」
芷珊與比她細12年的張達倫拍拖多年，惜最終未能開花結果。
芷珊與鄭伊健再見亦是朋友，訪問前男友時，芷珊從不覺尷尬。
雖然年紀不輕又剛分手，但芷珊仍對愛情有憧憬，要繼續搵靚仔。
鍾意靚仔
芷珊透露是張達倫提出分手，她將整件事消化後，亦覺得是正常結局，她說：「對大家都好，到我50幾歲時我唔想拖個後生仔，對我都唔好睇，起碼大家同步啲，唔好差咁多年。」在眾多男友中，只有梁家輝年齡比她大，問芷珊為何多次拍拖都是姊弟戀？她笑言：「唔知喎，條命係咁啩？嚟緊都係搵啲差唔多大喇，唔好再貪靚仔！我係貪靚仔，靚仔一定後生仔嘛，我條命又OK，靚仔又OK我。」她續說：「個個話我性格好，冇人話我靚，發誓以後唔會搵細我咁多嘅男友，但靚仔就照搵！」
