《巨輪》陳展鵬咀鍾嘉欣

【尖沙嘴】高登男神陳展鵬同女神鍾嘉欣前晚11點幾喺尖沙嘴幫TVB電視劇《巨輪》開工，套戲嘅時代背景大概係90年代初嘅香港，所以佢哋兩位男、女神嘅打扮都好懷舊，最連戲嘅就係陳展鵬攞住大水壺手提電話，睇嚟TVB今次都做過嚇資料搜集，唔再係是是旦旦。

【今日我至濕】高登男神陳展鵬咀女神鍾嘉欣只係維持咗十秒，咀完之後男嘅即刻問女嘅：係咪OK，夠曬溫柔。

【身體語言】喺人造雨下製造出90年代嘅浪漫氣氛，嘉欣睇嚟好投入。

【電眼撻火】DV圖片

【面珠試位】先錫面再錫嘴嘅陳展鵬，表現得好純熟同溫柔。

前後兩次廿秒

因為場戲係講陳展鵬喺雨中搵到喺電話亭避雨嘅嘉欣，所以現場安排兩位工作人員喺度造雨自製浪漫。未埋位嘅時候，展鵬不停同嘉欣度面位同嘴位，原來佢哋拍嘅係一場咀嘴戲。試咗兩次到正式拍攝之前，見到嘉欣非常有公德，不停喺度咬香口膠，費事一陣有口氣係人都怕咗你。導演叫開機嘅時侯，展鵬先錫嘉欣塊面跟手就咀落去。當叫停時展鵬好細心幫嘉欣撥水同問佢「係咪OK」，之後再拍再錫就搞掂。前後都係錫咗兩次，每次10秒左右，冇乜點蝕底，如果再錫落去高登仔一定為女神出頭，去TVB電視城抗議都有份。