親揭結婚12年不育之謎 萬綺雯笑言：唔覺得老公唔得

萬綺雯（萬二蚊）89年亞姐亞軍出身，憑住索爆外形加42吋長腿，演繹《我和殭屍有個約會》「馬小玲」一角，深受歡迎，因而成為亞視當家花旦之一。近年淡出電視圈的她，最近再度出山簽約無綫拍劇，首部作品《老表，你好嘢！》昨晚亦已首播。蚊蚊自從2000年跟編劇陳十三結婚後，一直恩愛甜蜜，可惜人紅自然是非多，昨日竟然有報道指陳十三因吸煙過量，導致結婚12年來依然不育。對於報道蚊蚊認為只是得啖笑，她更力撐老公笑言：「我唔覺得佢唔得！」認真Sweet到爆！

撰文：杜淑霞

攝影：畢紹基

化妝：Herman Ng

髮型：Domanic Tao @O4

服裝：Laurel

場地：MM/H（皇室堡15/F）

昨日蚊蚊就有關老公的報道回應時，笑言未瞓醒已收到朋友報料，她告知老公陳十三「畀人影咗」時，老公起初嚇一跳，當她講清楚是指他「唔得」後，老公即笑言：「嘩！真係一額汗，我幾驚影到我攬住條女呀！」蚊蚊坦言跟老公都沒有為此不快，她笑言：「當係幫我宣傳嚇個劇，佢係我老公都要幫我頂㗎啦！」

對於婚後12年一直無生育的問題，蚊蚊就坦言問題出在自己身上，「我係好鍾意細路仔，結婚5、6年後係諗過生，但係我身體一直唔係咁好，到調理好咗，又因為拍戲整親條腰骨，所以老公都叫我調理好番身體先，o依家我又簽咗TVB，仲有啲工作目標想做，當然又唔會諗住囉！」

讚老公夠聰明

蚊蚊跟陳十三結婚多年，仍如新婚一樣，早前兩人到峇里旅行時，她還將老公再次向她求婚的照片上載微博。提到兩人相處之道，蚊蚊即露出甜到漏笑容，「我諗係互相信任，當然亦都要夠聰明，好似我係機器白癡，又好論盡成日跌爛電話，到咁上下老公就會識得買個新畀我，最近佢知道我新劇就快出街，又買咗部新電視返嚟畀我睇。」

講到陳十三在蚊蚊心目中的地位，除了是好老公外，還是最佳聆聽者及顧問，「我有咩都會同老公講，佢個人好冷靜，睇嘢又夠全面，會畀到啲好好意見我，今次我會返電視工作，都係佢鼓勵我，因為之前有舞台劇邀請我，佢知道呢樣對我工作有幫助，如果我冇試過一定會後悔，但要返內地9個月，結果我都捱得過，佢就知我仲好鍾意做戲，咁啱無綫搵我，佢咪叫我試下囉！」

簽約條件無得比

有指今次蚊蚊簽約無綫，跟同期簽約的陳煒條件優厚得多，蚊蚊就否認其事，「其實合約外人無可能會知，亦都冇得比較，我嘅條件唔係外間講到咁樣，我只係要求有得揀，因為做咗咁多年，唔想再做啲重覆角色，希望可以試啲新嘢啫！」

.親揭結婚12年不育之謎 萬綺雯笑言：唔覺得老公唔得
http://veryy8.blogspot.com/2013/01/12.html