搜尋此網誌

2013年2月8日星期五

徐子珊預告做蛇新娘

黃宗澤與徐子珊


徐子珊預告做蛇新娘

黃宗澤與徐子珊再度攜手合作拍攝賀歲片,兩個大細路由戲內鬥到戲外,每次走在一起必定大放笑彈,子珊還預先公布會做蛇年新娘。

無綫藝人黃宗澤(Bosco)與徐子珊再度聯手拍攝賀歲片《2013我愛HK恭囍發財》,對於今年賀歲檔除了有例牌對手黃百鳴的《百星酒店》外,還有周星馳執導的《西遊.降魔篇》這勁敵,Bosco指每年競爭都很大:「都驚o架!不過做好咗,出嚟嘅結果係由觀眾決定。」雖然一代性感女神葉玉卿難得復出客串,但兩人與女神緣慳一面,大呼可惜。飾演卿卿年輕版的子珊被問到身材與對方有「天淵之別」,她笑言是未發育的版本:「我係做30幾年前嘅卿姐,當時仲未發育完!卿姐係後期發育加上生咗兩個,所以身材特別好,但我點都要『裝』番少少。」

談到新年,兩人表示要在工作中度過,Bosco說:「我要去橫店拍內地劇,第一次唔喺屋企過年。」子珊聞言即揶揄Bosco:「乜你上面唔係有屋企o架咩?」令他尷尬地連忙否認。同是單身的子珊與Bosco被問到新一年會否期待新桃花?未知他是否對早前與內地女星柳岩的緋聞鬧得滿城風雨而嚇怕,只說:「我打算今年屋企擺鐵樹,因為鐵樹好難先開花,唔要桃花!努力工作。(仲等緊杏兒?)巴士咩!係等緊上位。(情傷未愈?)都過咗咁耐,冇嘢啦!我依家好好,阿媽都冇催拍拖。」

暫未啱心水

相反,問到子珊時卻語出驚人,她自爆做蛇年新娘:「我下年結婚啦!如果搵到嘅話。(生仔?)最好啦!識到嘅話可以三個月內結婚,之後生仔即刻退休!(有冇心水追求者?)有追求但冇啱心水,咁我都要有啲要求。(擇偶條件?)年紀大過我囉!(你話即刻退休咁要有極厚經濟基礎?)唔使!穩定就得,你知我冇Bosco使得咁多錢,我又冇幾架車。」Bosco即反擊叫子珊拿出其名牌手袋:「人實有一樣嘢係最使錢,我承認我係車,而佢就係手袋囉!」搞到子珊連聲否認,Bosco笑說:「哦!佢好慳家又唔買名牌,好女人!淨係著T恤、白飯魚。(你哋拍拖啦!)唔要!佢太慳家,同埋我唔係極度有經濟基礎。(擇偶條件?)一定唔好要我湊,細路唔OK。」



徐子珊新一年恨做新娘,相反Bosco對桃花避之則吉。

黃宗澤與徐子珊

Bosco經常揶揄子珊,十足歡喜冤家。

黃宗澤與徐子珊

子珊演後生版葉玉卿,笑言裝假狗才夠說服力。



.徐子珊預告做蛇新娘
http://veryy8.blogspot.com/2013/02/blog-post_2926.html
Related Posts Plugin for WordPress, Blogger...