八卦嘢(八卦野) [八卦o野][日日818] : 雙影帝鬥搏郭富城跳橋中招

2013年4月4日星期四

雙影帝鬥搏郭富城跳橋中招

有戲睇

雙影帝鬥搏郭富城跳橋中招

彭順導演的《 C+偵探》三部曲《同謀》，有兩大影帝郭富城搭檔張家輝，齊齊做私家偵探，還有大量撞車、跳橋、爆破等危險動作，身手敏捷的城城堅持親身上陣，結果拍跳橋戲搞到左手受傷流血，加上反應彈近距離爆破，差啲中面，最終保住靚仔樣，反彈中背脊，瘀到一笪笪，但郭富城堅持唔用替身！

撻生魚

城城由高處跳落枱，再撻落地，左手按着餐枱時被刀叉插傷。

哎吔！插死我喇！（設計對白）

唔領情

紅館開演唱會，同場加映苟熊大戰，夾心人郭富城繼續當唔關事，唱完紅館，隨即投入為月中上映，由彭順執導新片《同謀》做宣傳。

拍到第三次，導演安插七料影帝張家輝同城城過招，影片先後到過馬來西亞及廣州取景，並有大量危險動作；為免演員受傷，替身長駐候教，但城城次次都唔領情，要親身上陣，完全唔錫身。

護腳

雙手冇得保護，雙腳有褲遮可用護墊。

多重保護

其中一場講城城逃避追殺，由高架鐵路天橋跳下，踩露天茶座枱櫈着地，動作絕對有難度，為免意外，導演再三勸城城用替身，但他堅持自己先試，由幾米高跳下，城城冇甩轆，點知正式拍攝時就出現偏差，落地時他的左手更被枱上的刀叉㓤傷流血，但敷藥後，堅持繼續自己嚟。

至於張家輝，亦認同今次有不少動作設計十分危險，但導演在安全措施方面，已做到好足！

有場戲張家輝被麻繩綁實再吊高毒打，工作人員先為他戴上腰封保護，再在腰間綁上受力的威吔，以卸去麻繩紮身的力度，家輝說這場戲看似辛苦，但實則不然。