一年一度 再掟千萬入市 李彩華遙控買樓唔使睇

探熱針

一年一度　再掟千萬入市　李彩華遙控買樓唔使睇

08年轉戰內地發展的李彩華，拍劇密執，但因為經常不在港，搞到賺人仔甩港仔，前度 Derek偷食李詩韻再撻着 Mango，甩拖阿 Rain索性疊埋心水，瞓身搲銀，去年一口氣連接六劇，搵到錢即轉投買樓；繼 12年以 1600萬買入渣甸山名門千呎單位自住，今年初政府實施徵收雙倍印花稅前，再入巿以 1128萬，購入連樓都未睇過的大坑東山台德信花園，堅！

身家愈來愈豐厚，早前返港出席品牌活動的 Rain，衣著打扮愈顯貴氣。

近年內地劇接不停的 Rain，其中一套與同聲同氣的張衞健，陳法蓉、恬妞合拍的《五台之抗日傳奇》。

獨沽一味

唔擔心外圍經濟影響樓市，更加唔怕未來加息，李彩華賺錢換磚頭，一條心！

有錢唔賺

新劇未開工，難得留港的 Rain，日前以粉紅 T恤黑色短裙襯價值超過七萬的粉紅 Hermes，在跑馬地郵政局門外等人企了約十分鐘，女友終於出現，兩人隨即行去譽滿坊食點心， hea足兩粒鐘，行過咖啡店買外賣後，再跳上的士直去銅鑼灣。

Rain去年連接六部電視劇，其中一部只是客串，不過以每集二十五萬計，去年收入超過二千萬；已手揸三個物業的她，今年初即使人在上海開工，得悉有心水盤放售，連睇都唔睇，就買！

「阿 Rain一返香港，就會同媽咪周圍睇樓， Rain媽之前都有睇過啲工廈，但唔啱心水，阿 Rain自己就偏愛大坑區啲盤。東山台呢個單位雖然佢都冇睇過，但好清楚位置同附近環境，地產經紀通知有盤放，嗰陣阿 Rain喺上海拍劇，飛唔到返香港睇樓，但佢決定照買，裝修好用嚟放租。

「之前買嗰三個單位，一間細佬住，一間爹哋媽咪住，自己就住舊年買嘅名門；早排有人開價二千萬話買，價錢都吸引，但阿 Rain話咁大個女未試過一個人住，不知幾享受，所以有錢都唔賺。」李彩華身邊人透露。

在內地站穩住腳，孝順的 Rain不時抽空與父母旅行，早前她便到泰國叉電三日。

信主數年，終在去年廿九歲生日當天，於好友豪宅泳池受浸，正式成為基督徒。

豪使十四萬

大部分時間要留守內地開工， Rain每逢有假期，都會帶埋家人外遊度假，近年亦偶然會買些奢侈品，獎勵自己。

「阿 Rain近幾年搵到錢，亦比較捨得使。二十九歲生日受浸之前，佢買咗對四卡鑽石耳環慶祝自己生日，之前又去 Hermes買咗個七萬幾蚊嘅 Lipstick粉紅 30CM手袋，佢話之前已經用咗七萬幾蚊，喺 Hermes買咗其他嘢，即係一次過使咗十四萬。做得咁辛苦，又冇拖拍，搣少少買嘢氹自己開心，都值得嘅。」李彩華身邊人說。

去年跟前度 Derek分手後， Rain便與合作過的內地男星萬思維傳出

緋聞。

辛苦搵來志在使，除賺錢買磚頭， Rain亦愛買 Hermes獎勵自己。

掘到金

香港拍劇收入有限，藝人北望神州，只要打得開內地市場，撞到一個內地劇爆到，等同開礦一樣，財源不絕。

蔡少芬

11年，蔡少芬參演內地劇《甄環傳》，劇集收視勁，在劇中飾演皇後的她，馬上在內地走紅，拍劇身價由每集八萬狂升至廿萬，《秦始皇》、《清宮美人》一劇接一劇，做唔停。

鄧萃雯

97年已走入內地搵食，縱然做二幫，但已站穩陣腳，身價已從過去七萬跳升至十五萬一集。

佘詩曼

去年離開無綫主攻內地，由兩萬一集的 TVB劇價，升至十五萬一集。

胡杏兒

遲起步的胡杏兒不介意北上降呢做女配角， 10年與前度黃宗澤情侶檔合拍內地劇《跑馬場》，之後密食當三番連接三劇，女配角價都有十萬一集。

撰文、攝影：娛樂組

mailto:nextb@nextmedia.com

. 一年一度　再掟千萬入市　李彩華遙控買樓唔使睇
http://hittt.blogspot.com/2013/04/blog-post_5696.html