王力宏接辣模返家 春宵12粒鐘
王力宏嘅魅力男女通殺，日前先至俾人發現佢同鋼琴家李雲迪疑似曖昧握手，前日淩晨兩點幾又見到佢揸住佢架寶馬，喺台北民權西路接咗台灣另一位藝人王陽明嘅前女友、辣模林筱筠；話時話王力宏架價值480萬台幣嘅寶馬令佢想低調都唔得，佢到咗民權西路之後一直冇落車，大概15分鐘之後，就見到林筱筠現身，一頭長髮好飄逸，雖然天氣轉涼，佢依然係單薄嘅上衣配襯超短熱褲現身，打扮性感。只見林筱筠熟練咁上車，臨閂車門之前仲露一露美腿。之後兩人一齊返咗王力宏嘅屋企，其間冇見過兩個人出入。
【今日我至露】都算深秋喇，林筱筠都要露一露佢條美腿，想唔俾人留意到都唔得喇。
台灣《蘋果日報》
前日淩晨 2:15【辣模上車】
林筱筠好熟練咁上咗王力宏架寶馬。
前日淩晨 2:25【同車返家】
王力宏車子返到喺忠孝東路嘅屋企。
前日下午 1:58【前後腳走】
12個鐘頭之後，王力宏揸住寶馬離開屋企，林筱筠搭嘅計程車就跟住佢後面，兩人同車嚟分車走。
分開車離開
直到第二日嘅下晝兩點鐘，先見到王力宏揸住同一部車離開，跟住後面嘅計程車就載住「擒王」12粒鐘嘅林筱筠，只見女方返咗民權西路嘅寓所，林筱筠除咗多副墨鏡之外，衣著打扮同去王力宏屋企前冇分別，而王力宏就去咗民生東路嘅製作公司做嘢，
前晚記者趁王力宏去剪頭髮時問佢林筱筠過夜嘅事，佢冇正面回答，稍後透過經理人話係一班朋友喺屋企開萬聖節派對，林筱筠係其中一個朋友喎，不過可以包接送仲過夜，呢位30歲嘅林筱筠待遇都唔差。噚日朝王力宏戴住黑超春風滿面現身桃園機場，準備去上海工作，見記者拍照即以手遮臉，仲走快兩步繼續唔答嘢。撰文：李森
王力宏噚日喺台灣機場出現，對於同林筱筠過夜一事佢唔肯回應。
玩咗一晚，王力宏前日揸住接林筱筠架車去咗民生東路製作公司開工。
上一則:黃貫中撲奶粉錢 亂刀劈死
下一則:Sammi戴口罩擋記者
