黃貫中撲奶粉錢 亂刀劈死
黃貫中（阿Paul）和朱茵的囡囡叉燒包日前出世，兩人更直認囡囡出世前已結婚。升呢做老竇的阿Paul不但要照顧囡囡及老婆，更要搏命搵奶粉錢。前晚Paul拍新戲以一敵八，最後百無禁忌身中多刀慘死成刀下亡魂，拍完後阿Paul即趕回家湊女餵奶，難怪捱到面無血色，瘦如人乾。
剛剛成為老竇的黃貫中近日未有放假照顧囡囡叉燒包及老婆朱茵，反而照常開工搏命搵錢養妻活兒。前晚阿Paul到深井拍攝王晶新戲《古惑仔：江湖新秩序》，劇情講到他飾演的大佬B被人尋仇，結果他以一敵八，可惜最後被狂斬浴血而死。據知阿Paul雖然在《古》片中的戲份不多，但角色相當重要，片酬也足足有30萬。
【命喪刀下】黃貫中前晚在深井拍《古惑仔：江湖新秩序》，結果被仇人亂刀劈死。
【以寡敵眾】劇情講阿Paul以一敵八，不少揸刀劈人的鏡頭他都親身上陣。
【應肚即飛】雖有替身頂阿Paul拍危險場面，但被人踢肚一場阿Paul親自演出。
【施擒拿手】黃貫中拍打交戲相當投入，且身手不俗。
【煲50支煙】為了配合大佬B一角，阿Paul整晚足足抽了50支煙。
【共商細節】任動作指導的伍允龍（右）和王晶（中），一同跟阿Paul研究演出細節。
【撩B傾偈】有街坊抱著兒子經過拍攝場地，剛做老竇的阿Paul（右二）即上前吹水。
計劃舉行百日宴
雖然剛榮升老竇，但阿Paul卻百無禁忌親身上陣演出，現場見他和對手真的有拳腳來往，又被對手起腳踢肚，再加上阿Paul血流披面的化妝，效果的確相當逼真，十足被人抦到甘。雖然現場有替身，但大部份的動作戲皆由阿Paul親自上陣，他細心聽動作指導伍允龍的指示做出一連串動作。為配合劇情，阿Paul又要不停抽煙，結果幾個鐘頭內足足抽了近50支，可見他拍攝時毫不錫身。
當記者恭喜新任老竇阿Paul，他聞言即說多謝，提到剛才場面相當血腥，阿Paul表示戲中有好多動作場面，自己也可應付。已有三、四年沒有拍戲的阿Paul，透露今次角色相當搶鏡，會否需要露肉？阿Paul笑說：「唔使喇，咁多大隻仔喺度。」是否要趕回家湊叉燒包和老婆？阿Paul即露出甜笑說：「係呀，BB生出嚟十足叉燒包，所以咪咁叫，家都未改名。叉燒包似媽咪，我都想佢似媽咪，似佢一定好過似我。」
出外工作會否不捨得叉燒包？阿Paul直認：「有少少，咁以前都有，家就多咗一個，佢每日都會有唔同㗎。」會否追個仔？阿Paul直言不會，今次已是很驚喜的禮物。而阿Paul直認已和朱茵結婚擺酒：「做曬喇，佢生之前同屋企人好神秘食咗飯。」至於會否為叉燒包搞百日宴？阿Paul表示有計劃，但細節未定。朱茵會否復出拍戲？阿Paul直言她戲癮大，相信她會再演出，自己也不會阻止，但他透露朱茵目前一刻都不想離開叉燒包，故短期內應專心湊女，自己搵錢再辛苦也沒有所謂。前晚無綫《爆足一周》播出叉燒包幾張新相，有B女睡中微笑，醒後又張開嘴仔，相當趣致，阿Paul抱著叉燒包時露出一派慈父相。
【不支倒地】雖然阿Paul已有三、四年沒有拍戲，但現場見他依然七情上面。
拍戲配樂又做騷
阿Paul的家現在增添一員，開支當然不少，加上朱茵目前全面休息湊女，難怪他沒有休息陪妻女，反而密密做努力賺錢，阿Paul拍完《古》片後已再接拍另一部新戲，又會擔任電影配樂，稍後更要返內地如深圳等多個地方演出搵人仔。問到明年會否再在紅館開騷，阿Paul的經理人Ada昨日說：「諗緊，其實我哋有好多諗法，其中當然要睇嚇book唔book到紅館檔期。」至於阿Paul近日有否請假留在家專心照顧朱茵和叉燒包？Ada說：「佢冇特別要求，但見佢做嘢咁辛苦，又要照顧BB，如果可以我哋都盡量安排休息時間畀佢。」
採訪：張俊銘
攝影：黃偉雄
黃貫中指朱茵一刻都不想離開女兒，故短期內應不會演出。資料圖片
【08年飽滿】阿Paul最近消瘦到連雙頰也凹陷。
上周面凹
放工即湊女
雖然要忙拍戲搵銀，但阿Paul回家後也有落手落腳幫手湊囡囡叉燒包。
黃貫中前晚提供叉燒包的最新相片給《爆足一周》播出，B女樣子可愛。
下一則:王力宏接辣模返家 春宵12粒鐘
