探熱針
無綫收買人命 鍾嘉欣焗做空中飛人
2012年11月01日無綫的「是但精神」近年愈趨嚴重，幾乎每套劇都有甩漏穿崩，最近代表作，有陳豪在《天梯》中的手提電話閃閃發光，大玩穿越時空。
要搣甩是但精神，正趕拍新劇《巨輪》的鍾嘉欣，奉上頭聖旨，在工廈拍墮樓場面親身上陣，被吊高七層樓的她，想 say no都唔得。
唔願吊
拍攝當日，鍾嘉欣與陳展鵬於九龍灣一幢工廈拍墮樓場面，男主角只需危坐窗邊好濕碎，但鍾嘉欣則被懸掛上七層樓高，半天吊。
據有份落場的工作人員透露，要被吊上七層樓，鍾嘉欣一直想縮沙，換好曬吊威吔裝備後，仍不停問在場的工作人員：「真係要我上，替身做唔得咩？」由於監製王心慰落 order要女主角親自出馬，一班工作人員都愛莫能助。
「以前無綫拍呢類場面，都係用替身，搵鏡頭就，今次上面話要拍得逼真，一定要拍到 Linda（鍾嘉欣）響半空半天吊，嗰日風勢都唔弱，佢可以拍足成日，真係好勇！」一名幕後人員說。
趁機上位
除了鍾嘉欣墮樓，當日還有陳展鵬在大廈外的冷氣槽英雄救美人場面。其實現場安排了替身給兩位主角，但主要負責遠鏡和試位，大部分時間都要主角親自上陣。
鏡頭拍攝二人雙雙墮樓，跌落下層已生銹的冷氣機頂部，即使做足安全措施，但依然有一定危險。
「七層樓高，梗係覺得危險啦，點會唔驚，但落場嘅班底（武指）之前一齊拍過《烈火》、《反恐》，又有啲拍過電影，所以比較信得過，嘉欣亦係一個好大嘅動力，佢一個女仔都肯拍，我唔敢偷懶，要自己做番。」陳展鵬說。
有傳一哥陳豪嫌棄陳展鵬未夠班，拒拍《巨輪》，「煎 pang」冷手執個熱煎堆坐正，當然要更搏。
是但精神累己累人
經常被指刻薄藝員的無綫，為減低製作成本，多次搵藝員命仔較飛。
楊思琦
02年，到北京拍攝《血薦軒轅》，拍騎馬戲不慎墮馬，以致尾龍骨骨裂，要留院一星期，事後監製戚其義才替她安排替身拍攝。
王 喜
01年拍《烈火雄心 II》一場船上救火戲時，因出現搶火情況，結果燒傷面部，右邊面上留有等邊三角形傷口。
陳美詩
去年為無綫收費台拍攝節目《駕到沖繩》，無綫竟安排揸車技術一般的 Macy在當地做司機扮「自駕遊」，結果攝製隊發生車禍，連人帶車跌落山崖， Macy頸椎移位。
