2012年12月28日星期五

袁靚靚攬熊上身亂曬龍

2012年12月28日

唔少藝人日忙夜忙，但上周都不約而同搞番個 party，趁住「末日」前同班朋友狂歡一番！好似上個禮拜，張智霖亦趁住拍完《衝上雲霄 2》，帶埋妻兒去中環一間意大利餐廳搞聖誕 party，同行仲有上山詩鈉、黃佩霞同周汶錡夫婦等。

當晚佢哋食到 10點幾，張智霖（ Chilam）同親友一馬當先，拎住四、五袋禮物離開。不過行咗幾步， Chilam又行返轉頭開門，原來袁詠儀（靚靚）抱住囝囝慕童出嚟，冇手開門。話時話， 6歲大嘅慕童都讀緊小學一年班，仲要靚靚做「樹熊媽」，抱住佢出出入入，連儀容都唔理。你話母愛幾偉大吖！

張智霖同女親友幫慕童拎禮物，其中有盒「燒肉王」玩具，玩法係鬥搶燒肉爐上嘅假食材。幾益智，啱曬慕童玩。

靚靚抱住阿仔上斜再上車，慕童雙腳無用過！可憐靚靚仲要拎住個 Hermè s，頭髮亂曬都執唔到囉。

靚靚狼狽相任睇，黃佩霞同鬼佬老公 Ryan同阿仔就又食又拎，笑到四萬咁口。周汶錡個法籍老公 Julien企喺後面，亦瞇瞇笑。

衰佬，你唔好企埋嚟呀！（設計對白）

不過，唔知點解周汶錡一出現，就死都要同老公 Julien尷尬分開企，中間隔住上山詩鈉母女。到周汶錡上的士一刻， Julien先衝上的士。為乜呢？