末日專題：吃一頓最後晚餐

根據瑪雅曆法衍生出的預言，今午2時（本港時間）就踏入世界末日！如果真的死神來了，大家還是做個飽鬼上路吧！藝人最後一餐想食甚麼呢？杜汶澤揀食神的叉燒飯加煎蛋，古天樂想飛巴黎食甜品，周潤發就要求老婆下廚煮咖喱魚頭作最後大餐。

撰文：丁寧

周潤發老婆煮大餐

「如果係最後一餐，梗係叫埋親人同好友喺屋企食餐勁啦！老婆煮得一手好菜，我一定叫佢下廚煮咖喱魚頭（圖右）、海南雞、豉油王煎大蝦同肉骨茶，喺世界末日能夠同至愛親朋食到老婆煮嘅大餐，應該會好滿足啦！不過唔知老婆會唔會詐型，臨死都要辛苦佢煮餐勁。哈哈！」

甄子丹親手整牛肉飯

「喺消失前我當然希望可以同老婆、仔女、父母同外父等至親一齊喺屋企食餐飯，我梗係出手整grilled cheese sandwich同Spanish Beef Stew（西班牙燉牛肉飯　圖右），不過用雞髀，蕃茄同薯仔做配飯，拍拖時佢成日煮畀我食，末日前再食到就冇遺憾啦！」

梁詠琪素食免殺生

「我會同家人好友返去我同老公結婚嘅西班牙小島Ibiza嘅沙灘餐廳共晉最後晚餐，點番一樣嘅menu，都係素食，最後一餐都唔好殺生喇，所以有番茄湯同蘑菇意大利飯，同最好嘅朋友家人好好道別，將要講嘅全部講完。然後再睇一次日落，最後一晚安靜度過。」

鄭秀文棉花糖道別

「我想同所有愛我，同埋我又愛嘅人一齊食。我想食盡各式芝士、零食同我最愛嘅日本清酒。我唔會想做菜，因為我唔想身邊嘅人喺末日前都要食我嗰半生不熟嘅爛廚藝。身邊人鍾意食乜嘢就有乜嘢，最重要有入口溶化嘅和牛，最後我會食大量棉花糖作為對世界嘅甜蜜道別。」

陳慧琳喫出前一丁

「我唔信有世界末日，如果真係最後一餐，我一定要食公仔麵，自細我好鍾意食公仔麵，最愛麻油味出前一丁，因為唔健康，?家已經好少食。呢日仲要買唔同嘢食返屋企，好似老公至愛嘅pizza同漢堡，囝囝鍾意食煙肉芝士忌廉意粉。」

古天樂飛法食甜品

「呢日最理想當然係同家人好好去食一餐，地點我會選擇喺法國巴黎，因為之前同爸爸媽媽去旅行，留咗好多美好回憶，我哋到過一處以甜品Souffle（圖右）馳名嘅星級餐廳，配上一小杯橙味酒伴食，真係好滋味，算係為自己同地球畫上甜美句號吧。」

楊千嬅食盡各國菜式

「自己接近10幾年為做女藝人未試過食得好飽，如果末日我諗會同屋企人去食曬唔同類型餐廳，老公鍾意食咕嚕肉，媽咪自助餐，再同老竇食潮州嘢，之後同奶奶食水煮魚，自己就愛意大利菜，食到咁都差唔多夠鐘，哈哈。」

杜汶澤懷念叉燒蛋飯

「最想食叉燒飯加煎蛋，自己食齋五年，唯一最掛住係最平凡嘅叉燒飯加煎蛋，作為香港人最後一餐地道食物我會揀叉燒，我想去窩打老道廣東燒味食叉燒飯加煎蛋，以前住附近，覺得呢間唔錯。」

容祖兒BBQ大結局

「我會約曬錫我、對我好好嘅朋友，當然有媽咪同細佬食最後一餐，大家一齊去郊野公園BBQ，因為我好鍾意燒嘢食，一定要自己搭爐玩，我已經戒咗肉好多年，所以最鍾意食海鮮，最後一餐當然想食至愛嘅牛油大蝦、燒蜆、龍蝦、大眼雞、扇貝同蘆筍魚夾啦。」

莫文蔚嗒87年紅酒

「老公喺我心目中係全世界最出色嘅大廚，最後一餐由老公親自下廚整意大利菜，一定要食意粉、意大利雲吞、煎牛扒、pizza、法式燉蛋，仲要飲番支靚年份嘅紅酒，最好係我同老公相遇年份──87年。」

盧海鵬：食乜鬼啫

「我到時會返廣州同啲兄弟過冬，慶祝埋我生日，至於想食啲乜，都係食餐飯啫，諗乜鬼吖，如果真係世界末日，全世界都要死，係咪都要死啦，食乜鬼啫，冇特別嘢想食喎，話唔定未食已經死呢，使乜鬼諗咁多吖。」

古巨基烚住暖笠笠

「我想食打邊爐，自己至愛麻辣火鍋，一定要有肥牛同兩支啤酒，熱熱鬧鬧、開開心心、暖笠笠同屋企人食最後一餐，一家人齊齊去面對所有嘢。」

黃智雯牛一撼末日

「星期五係我30歲生日，又係冬至同盛傳世界末日，別具意義，我呢排掛住做嘢都冇時間陪屋企人，呢一日咁特別，我當然留番畀媽咪同家人一齊過。我哋唔打算出外面食飯，因為舅父同媽咪都拿手煮嘢食，嗰日我哋會一家人喺屋企食飯，會買盆菜同煮啲餸，圍住好溫馨咁過。」

.末日專題：吃一頓最後晚餐
http://veryy8.blogspot.com/2012/12/blog-post_286.html