2013年1月3日星期四

[壹週刊]邱淑貞平買貴童裝

同你吟一吟

邱淑貞平買貴童裝

2013年01月03日

眨嚇眼，邱淑貞做咗沈嘉偉老婆已經十三年，先後同老公生咗三個千金，雖然追極都唔係仔，但兩公婆感情十年如一，幸福少奶四粒字，當之無愧。

上星期二（十二月二十五日）聖誕假期，一家五口，拉隊踩去銅鑼灣利園商場 Bonpoint掃減價童裝。當然，身為上市公司老細，大有條件唔睇標價想買就買，但呢個法國頂級細路品牌，四位數起跳之餘萬萬聲一樣大把，唔趁 on sale入番啲貨補充嚇屋企個衣櫃，先至笨。

兩公婆加兩工人湊住三個女，十一歲大女沈月同八歲沈日見慣鏡頭淡淡定，得兩歲幾嘅細女沈星，一樣冇怕醜，生得好樣又精靈，喺鋪頭入面騰來騰去，就算工人抱番住，佢都要扭落地，非常生猛。

揀完試試完買，由揸數嘅沈嘉偉俾錢，之後再操兵 walk過去 I.T旗艦店，自己地頭，今次主力掃鞋，最終六、七袋走。

平時見到鏡頭十居其九避得就避嘅邱淑貞，是日表現大方，閂車門前仲笑曬望鏡揮手。女星嫁得好又幸福，要講命數，邱淑貞就係修得到。

放大圖片