2013年4月23日星期二

拔尖報牛津阿倫兒子英會考12A

拔尖報牛津阿倫兒子英會考12A

阿倫囝英會考12A*　拔尖報牛津

現年17歲的譚詠麟（阿倫）獨生子譚曉風超叻仔，於英國GCSE（英國中學會考）考獲12A*好成績，現以拔尖身份報考世界頂級學府牛津大學，令身為父親的阿倫引以為榮。身高6呎的曉風不但生得高大靚仔，還遺傳了阿倫的音樂天份，彈鋼琴、結他、打鼓周身刀張張利。據知環球唱片想搶簽曉風做歌手，可惜被阿倫一口拒絕。

譚詠麟跟老婆楊潔薇結婚逾30年，遺憾兩夫婦多年來並無所出，反而是無名無份的紅顏知己朱詠婷（Wendy），卻為阿倫生下兒子譚曉風，阿倫和Wendy對獨生子疼錫有加刻意栽培，曾就讀本港南島國際學校的曉風，大前年考獲十優狀元後，據知前年他被阿倫送去英國讀書，於英國GCSE考試中以12A*被拔尖，約兩個月前正式投考有「天才與首相搖籃」之稱的牛津大學。

■譚詠麟兒子曉風讀書叻過老竇，以拔尖身份報考牛津大學。　圖片

吳錫輝：佢個仔好叻

廣播處前副處長吳錫輝日前接受本報訪問，踢爆好友阿倫兒子的威水史，吳錫輝說：「兩個月前有朋友生日喺馬會擺咗六、七圍，阿倫、志偉、學友、阿叻都出席，我話我個仔係港大一級榮譽生，去年喺倫敦大學讀歐洲電影史，三十人考第二，阿倫聽到就問我：『你知唔知我個仔喺邊？佢喺Oxford interview，拔尖。』」

吳錫輝大讚曉風醒目，不但叻過老竇阿倫，簡直是半超人，他讚嘆說：「佢個仔原來好叻，點可能一個國際學校嘅local student，可以喺GCSE攞12A*，𠵱家無論香港及國際標準考試，12A*係top到冇得再top，top of the world，半超人，呢個𡃁仔DNA超越佢老竇，之前阿旦（鄭丹瑞）同我講，有次阿倫帶曉風去澳門踢波，曉風6呎2吋高好靚仔。」但據悉曉風身高只有6呎。

■牛津大學是世界頂級學府，有「天才與首相搖籃」之稱。

■阿倫公開承認有兒子曉風和知己Wendy後，不時被影到一家人天倫樂。圖片

昨日記者再致電吳錫輝，他表示不知道曉風考牛津結果，但當日阿倫告訴他全校只有兩個學生考到12A*，一個是印度學生，阿倫沾沾自喜對他說：「知唔知第二個係邊個？咪我個仔囉！」吳錫輝表示日前為nowTV節目《輝哥的饌賞》訪問阿倫時，就曾取笑他：「我話發夢見到譚伯（阿倫先父）喺天堂，用智能手機google到高大英俊威猛嘅孫戴狀元帽考到12A*，阿倫聽到儍笑。」牛津多名人就讀，霍啟剛02年於牛津大學取得經濟及管理學學士，至於英國巨星曉格蘭特（Hugh Grant）和「戇豆先生」路雲艾堅遜（Rowan Atkinson）都是牛津畢業生。

文武雙全環球搶簽

曉風除了讀書叻，亦能文能武，5歲時憑一幅素描贏得全港兒童繪畫比賽亞軍，又是學校籃球隊成員，他更遺傳了阿倫的音樂天份，11歲考取六級鋼琴，既懂打鼓又識彈結他，據知阿倫所屬的環球唱片就想搶簽曉風做歌手，昨日記者致電環球高層黃劍濤查詢，他承認：「兩、三年前阿倫帶囝囝睇Mr.演唱會，當時見曉風靚仔又好有音樂天份，問有冇機會簽佢？不過阿倫話：『諗都唔好諗，讀書緊要。』」據知Wendy都不贊成乖仔入行，在她的眼中曉風是最完美兒子。

其實阿倫和Wendy關係保密多年，直至06年阿倫父親去世，在訃聞上確認兒子譚曉風身份，當年他接受電台訪問，承認自己有老婆叫楊潔薇，有知己叫朱詠婷，更有個兒子叫譚曉風。阿倫不時讚兒子讀書叻，又喜歡打籃球，阿倫曾被問到會否讓兒子像NBA球星林書豪做職業運動員？他一口拒絕：「梗係唔會，囝囝好讀得書，唔會畀佢以打波為職業。」

採訪：楊潔雯

■吳錫輝日前訪問溫拿，羨慕阿倫有個考到12A*的叻仔。

話你知：入名校關卡

譚詠麟兒子譚曉風前年所考的GCSE，即普通程度證書考試，是英國最基本的中學考試，所有在英國讀書的學生都要參加，考生普遍介乎14歲至16歲，考生要在GCSE取得資格，才可報考A-level及入讀大學。一般考生會選擇報考8至10科，除了必修科英文、科學和數學外，亦有些人文學科包括歷史、經濟和地理等供修選。GCSE分9個評分等級，按次序為A*、A、B、C、D、E、F、G和U，而譚曉風考獲12A*已算是頂級尖子，入名校夠資格有餘，當然亦有「神人」考獲16A*。

小時候：越大越俊朗

譚曉風是譚詠麟跟紅顏知己Wendy的獨生子，小時候是肥仔一名，11歲已重140磅，幸越大越靚仔，比老竇更加高大英俊。