去年8月本報影到羅力威同雨僑拍拖食嘢，戀情因而曝光。資料圖片
無線J2台節目《姊妹淘》主持雨僑（前名羽翹），去年俾本報率先踢爆戀上亞視音樂節目《亞洲星光大道》首屆冠軍羅力威，渠哋仲撐台腳食點心，雨僑不避嫌贊賞男友音樂才華，今年8月仲高調撐男友處男個唱，擺明宣示主權。
不過雨僑慨主動出擊，不但激嬲經理人公司老板蕭定一，馮仁昭聽聞阿一近日已捉雨僑照肺，勒令渠斬纜，唔斬就直入雪櫃。就連羅力威所屬慨英皇都用行動棒打鴛鴦，渠哋向一啲電台表態堅決唔畀羅力威同雨僑同場，實行有你就冇我，英皇仲話唔介意用一姐容祖兒搭落嚟撐羅力威。
雨僑同羅力威拍拖原本好甜蜜，點知大家都俾公司棒打鴛鴦。資料圖片
嘲羅力威二打六
雨僑同羅力威雙方慨經理人施壓，渠哋已封嘴避談戀情，盡量收埋地下化，蕭定一向來對旗下藝人私生活好寬松，但渠呢次罕有出招，渠日前忍唔住喺電話度鬧爆話：「我近排覺得雨僑做嘢心散咗啲，公司近年畀咗好多拍戲機會渠，好希望渠可以專心事業。」
阿一堅決要雨僑撇甩羅力威，渠肯定咁話：「羅力威又有乜嘢咁好，我絕對唔贊成雨僑同呢啲二打六歌星仔一齊。總之雨僑唔肯斬纜，我就雪硬渠。」
