Main Camp
哈囉喂至驚 港大學堂變惡靈古堡
2012年10月31日
每年萬聖節， U仔例牌要去主題公園鬼屋自己嚇自己，其實港大每年都會在大學堂（ U Hall）搞恐怖鬼屋，將有 150年歷史的大學堂改裝成陰森邪地，內有長髮女鬼，又有恐怖靈堂，最難得是鬼屋會向全民開放，不一定要港大仔都可嚇餐飽。
港大搞鬼屋已經有多年歷史，今年以日軍憲兵總部為主題，成間 U Hall傳出淒厲幽怨的哀嚎聲，忽然跳出的嚇人的「幽靈」，驚嚇音效加埋現場的燈光效果，勁多參加者嚇到面容扭曲，令人稱「古堡」的大堂邪過生化危機。
最恐怖★★★★★
女鬼扯髮
陰森的房間裏，女鬼趁參加者不留神，從上床伸手扯參加者頭髮，還怨氣十足地哀叫「畀番個 BB我！」嚇得參加者雞飛狗走！
最邪門★★★
靈堂三鞠躬
看著面前死者的遺照，參與者要在靈堂前三鞠躬，以示對死者的尊敬，但最恐怖是有女鬼無聲無息之下站在參加者身旁，三鞠躬後身旁突然多了隻女鬼，嚇死！
最驚嚇★★★
貞子撲出
參加者以為平平無奇的角落，其實有疑似貞子（箭嘴）突然撲出來尖叫，加上在場幽暗的燈光，詭秘的背景音樂，確實令人嚇到彈起！
定驚酒吧
經過二十分鐘的恐怖之旅後，大會提供酒精飲品予在場 18歲以上人士，更有小食提供，嚇完飲杯定驚酒又確係細心喎！
新生土法製成
成間鬼屋驚嚇味十足，行完成間鬼屋大約 20分鐘，以為有專業人士在背後策劃，但實情是全由一班港大新生負責，一萬元成本便成功營造嚇鬼氣氛，活動負責人周健輝說：「全部都係由班 freshman做，班師兄最多都係畀嚇意見，今年雖然加咗價到 80元，又加埋搞多一日，但 2日門票晨早已經賣曬，扣除成本後都有數千元收入。」
鬼屋玩得癲，但其實並非整個大學堂宿舍範圍都會開放給參加者，位於會堂內第二層的國際生宿舍，便有學生投訴鬼屋活動期間尖叫不絕，令他們不能專心溫習及休息，不過哈囉喂一年一度，嘈兩日大家忍讓嚇啦！
鬼屋玩得癲，但其實並非整個大學堂宿舍範圍都會開放給參加者，位於會堂內第二層的國際生宿舍，便有學生投訴鬼屋活動期間尖叫不絕，令他們不能專心溫習及休息，不過哈囉喂一年一度，嘈兩日大家忍讓嚇啦！
免費鬼屋繼續玩
假如你錯過了港大大學堂的鬼屋，又不想買貴飛去主題公園排長龍玩哈囉喂，其實不少大學舍堂每年都會舉辦萬聖節活動，有些更歡迎外來人士參與，最緊要費用全免，零蚊都可以嚇餐飽！
Main Camp：
Main Campus簡稱，意即主校園，各大專潮人潮事當然離不開 Main Campus。
