忽然1周版「萬千星輝頒獎典禮2012」得獎名單

忽然1周 第904期

率先爆絕密得獎名單　陳國邦奪男配角　林峯攞硬最喜愛男角色

無綫《萬千星輝頒獎典禮》今年大搞新意，視帝、視後及最佳劇集三個大獎改用全民一人一票普選。獎項花落誰家將順應民意。而其他獎項只供無綫中人投票，變相增加高層的影響力。

本刊收到消息，上周二（ 13日）頒獎禮七大評審開會商討各獎項得主。據知，眾高層一致推舉林峯奪「我最喜愛的電視男角色」獎；至於黃智賢，據知有高層使橫手令他墮馬，最後冇得提名「最佳男配角」獎，令原本與他叮噹馬頭的陳國邦，冷手執個熱煎堆。

對於遭林峯技術性 K.O.，黎耀祥老馬有火：「咁未到最後都冇話邊個一定贏嘅！」至於?到出煙的黃智賢則怒氣沖沖向本刊說：「有高層唔俾我爭獎！」未選已火藥味甚濃。

今次係我啦啩！（設計對白）

風騷滿場飛

對視帝獎項坐定粒六的林峯，又得到一眾高層愛錫，心情靚爆鏡，台慶當晚無論台前或台後，都表現風騷。

高層唔撐

選情告急！（真實對白）

今年視帝視後玩一人一票制，票王林峯幾乎肯定做硬視帝。反而以往是豬肉獎的「最喜愛角色」，就變成各個男主角爭奪之地。原本黎耀祥憑《大太監》有望奪此獎，可惜高層一致撐林峯，祥仔睇怕到時要局住陪坐。

無綫頒獎禮在下月 17日舉行，今次 TVB刻意用台慶劇《名媛望族》及《大太監》夾擊叫好叫座的《雷霆掃毒》，成功掀起話題。據知由 11月開始，七大評審每個星期都會商討各獎項得主。今年無綫改賽制，三大獎由觀眾一人一票選出，其餘獎項改由無綫三千職藝員揀選。變相各高層的偏好對一眾職員的投選意向有很大影響力。

林峯多人撐

曾勵珍早前現身《大太監》首播飯局，為劇中眾演員打氣，可見她對此劇十分重視。

上周二（ 13日），七大評審與部分工作人員再次開會。當日話題先圍繞《名媛望族》及《大太監》兩套台慶劇。其間，戲劇製作總監曾勵珍大讚祥仔演李蓮英好突出，製作資源總監樂易玲即刻提出《雷霆掃毒》亦叫好叫座。兩個阿頭在會中各持己見。知情人透露：「《大太監》係珍姐馬房嘅監製拍，佢梗係想祥仔攞獎，不過當班高層逐個噏自己心目中人選嗰陣，珍姐見到最喜愛男角色，六個都投峯仔（林峯），雖然明知佢係樂小姐啲人，但最後都局跟啦！」

搵 fans做定 banner

無綫今次將視帝、視後轉為全民投票，牌面計歌影視三棲的林峯，有足夠粉絲幫他搶票。加上得眾高層力撐，自然信心十足。日前，有人更聽到他在活動後向粉絲表示：「記得幫手投視帝呀，頒獎禮嗰日帶埋『男角色』條 banner喎。」似乎知道自己攞硬「男角色」獎。

對於今年無緣問鼎視帝，就連「最喜愛男角色」都大有機會俾林峯攞埋，黎耀祥周三（ 21日）出席頒獎禮記招時不得不承認自己有壓力：「選情告急……我知林峯多人錫又多 fans。不過今年好難講，冇話邊個一定贏。」

周三（ 21日），樂易玲向本刊坦言開會時投黃智賢一票，而梁思浩亦在微博中撐他是觀眾心中的男配角。

高層傍實

周二（ 20日），林峯舉行演唱會記招，當日出席的除了有樂易玲外，就連無 綫助理總經理區偉林（右二）亦有現身，可見林峯的得寵程度。

視而不見

周一台慶夜(19日)，林峯和黎耀祥狹路相逢，二人各自望了對方一眼，不過招呼都冇打便匆匆擦身而過，氣氛尷尬。

前後兩個樣

同黎耀祥冇兩句的林峯，轉過頭就同鄭嘉穎玩到癲兼影合照。鬼咩！鄭嘉穎今年角逐視帝機會微乎其微，冇競爭自然唔會傷和氣啦！

靠珍姐攝上

之前都好多人戥我唔抵！（真實對白）

在無 綫捱了多年的陳國邦，一直得到高層曾勵珍提攜，今年原本要同黃智賢撼過，不過對手連提名都冇，佢可望大直路衝線。

鬧無 綫不公

高層唔俾我爭獎！（真實對白）

冇份提名男配角的黃智賢，周三（ 21日），他在電話中向本刊鬧爆說：「我覺得公司唔公道，有監製甚至私下同我講，叫我唔好爭！」

高層密會

本刊收到消息，周二（ 20日）無 綫七大高層齊集會議室開閉門會議，講出自己對各獎項得主的心水，有指一眾高層對林峯和徐子珊情有獨鍾，一致推二人做「最喜愛角色」人選。

絕密名單

雖然離頒獎禮還有一個月，賽果依然有變數，但當日七位高層講出以下四位心水人選。有高層明燈開路，睇怕佢哋可以開定香檳。

高層施壓飛起黃智賢

「男角色」眾高層心水一致，輪到「男配角」時卻爭持激烈，結果原本大熱的黃智賢卻離奇被飛出局。事件峰迴路轉，原來另有內情。

本刊收到消息，當日會議期間，兩大巨頭樂易玲和梁家樹異口同聲表示黃智賢在《雷霆掃毒》表現突出，但其間有監製提出男配角人選應為陳國邦，雙方爭持不下。

「由未有名單開始， Tommy（梁家樹）一直睇好阿 Ben（黃智賢），撐佢冧莊。不過有監製就話陳國邦入行廿幾年都未遇到好角色，今次演反派彭三順好入肉，加上依家同佢傾緊簽親生仔（經理人約），有獎俾佢會好辦事。唔少評委亦覺得兩人都做得唔錯，結果初步決定俾陳國邦。」據知該高層事後向其他有份選十強名單的監製暗示自己意向，間接令黃智賢唔夠票數入圍十強名單。

對於未能入圍「最佳男配角」獎，黃智賢接受訪問時語帶激動說：「早排有監製專登走埋嚟同我講：『你上年攞完獎，今年唔好爭。』我問佢點解視帝有得冧莊，男配角就唔可以，佢冇講點解就走咗！」之後，黃愈講愈激動：「點解連入圍機會都唔俾我？規矩係公司定，入圍準則係咩你問番公司。依家我都冇嘢好講，但觀眾眼睛係雪亮嘅！」至於有機攞男配角獎的陳國邦，周三（ 21日）出席記招時，對於黃智賢冇份提名，他一臉認真地說：「冇話抵唔抵嘅，以前都好多人戥陳國邦唔抵，我諗阿 Ben（黃智賢）唔會 care嘅！」

江美儀奪女配角

江美儀在《名媛望族》中演三奶一角出曬位，加上其他女配角人選較弱，據知當日七位高層中大部分都投她一票。

徐子珊壓楊怡

當日高層會議中，亦有提及「我最喜愛女角色」，珍姐和樂易玲一如以往，意見向左走向右走。「珍姐撐楊怡，樂小姐就撐子珊，不過其間有人話陳生（殼王陳國強）讚子珊做毒後好大迴響，大家都明咩意思啦！」有殼王不離不棄照住，如無意外，子珊今年應該攞獎攞到手軟。

徐子珊勝在有殼

高海寧喊住口話冇俾殼王陳國強照顧，據知依然深得殼王歡心的徐子珊，獲欽點率先奪得「最喜愛女角色」。台慶當晚，她率領一眾姐仔淩空跳舞，盡顯一姐風範。

台慶當晚六叔缺席，入主無 綫的殼王陳國強和六嬸在一眾高層傍實下，跟一眾演員打招呼。

後台離奇喊

跳完 part舞，徐子珊忽然走入後台感動落淚，即時成為全場焦點。

保持距離

徐子珊上位，原本呼聲最高的楊怡，台慶當晚忽然腳痛缺席。周三（ 21日），二人出席頒獎禮記招，刻意保持距離。

《忽周》視帝視後人選你話事

無綫玩民意，但只有 3個大獎由全民投票，其他獎項依然是無綫決定。《忽然 1周》今年便首次舉辦讀者網上投票。讀者除可以揀選心目中的視帝視後，亦可選出其他獎項心水人選。想表達自己聲音，請留意《忽周》稍後的公布，投票仲有機會奪得名貴獎品?！