最筍好工 王維基停開劇簽人 蒙嘉慧白𢭃 100萬

真面目

最筍好工　王維基停開劇簽人　蒙嘉慧白𢭃 100萬

新免費電視牌照唔知政府拖到幾時，本來上月尾應該明朗化，但是行政會議連有冇討論都說「無可奉告」，發牌凶多吉少！

王維基斥資 50億打造的香港電視，面臨冇牌危機都要變陣，最近縮皮暫停挖角同減產，封實大水喉；而剛剛簽約香港電視的蒙嘉慧（ YoYo）亦未知幾時開工，據知她未拍劇已收定酬勞，隨時𢭃完人工唔使開工。

蒙嘉慧拍完《仁心解碼 II》已正式離開無綫，雖然想低調過檔香港電視（ HKTV），但據知她已跟 HKTV用部頭形式簽約，收 10萬一集天價拍劇。

樣樣慳住使

本來好有信心在 HKTV同張可頤爭一姐的她，卻沒料到政府遲遲唔肯發牌，最近王維基更突然縮皮，樣樣要睇住嚟使，唔單止暫停挖角簽藝員，連劇集都要減產。知情人士說，本來 YoYo一過檔即會拍劇，現在要延遲到年尾：「本來有套 20集偵探劇預咗 YoYo嘅，但係政府連發牌時間表都未有，王生唔敢開劇開得之前咁密，好多劇都押後開鏡， YoYo套劇推遲至 10月打後，如果發牌方面仲未有聲氣，分分鐘開唔到。」

知情人士又透露， YoYo開劇前已先袋錢。「一向王生挖角過嚟嘅演員如果有價值，都會先畀錢、後拍劇， YoYo應該同張可頤差唔多收咗一半先。」

香港電視發言人 Jessie上週五（ 5日）承認，拍劇進度因未獲發牌而要調整：「最近都冇挖角或者簽新人，可能要等發牌喇！之前拍劇係拍得太快，既然未發到牌，啲劇都唔使咁急開。王生（王維基）都講到明，𠵱家唔急，所以拍劇唔准再飛紙仔，要齊曬劇本先開鏡。」現時已開鏡的就只有惠英紅的《我阿媽係黑玫瑰》及梁小冰的《導火新聞線》，而 YoYo新劇則開工無期。

吹雞欠新意

王維基的香港電視自挖角潮起，簽過唔少無綫藝員及幕後人員，每次大型活動必定曬冷，而無綫亦不甘示弱，在活動及馬拉松賽都吹雞鬥人多，可惜造勢做得多，個牌始終未有，據知已令公司內士氣大減。

《導火新聞線》遲開工

HKTV的《導火新聞線》原定 2月開鏡，但因發牌無期，延至上月底才開工。

《我阿媽係黑玫瑰》急停

由惠英紅擔正的《我阿媽係黑玫瑰》開鏡後，突然停工至 5月才復工惹來揣測，但 HKTV發言人解釋，只是主角小紅姐要去韓國公幹，所以暫時停拍；而另一套黄日華的《歲月樓情》則未知幾時開工。

YoYo：唔使問

100萬袋袋平安又唔使開工，記者致電蒙嘉慧，可是 YoYo拒絕回應：「唔使問，我唔會答！（係咪就快拍王維基嘅劇？）我唔屬於任何機構。」講完匆匆掛線。而 YoYo經理人 Ali則表示：「𠵱家好多嘢好初步，唔答得住！（擔唔擔心政府唔發牌？）發唔發牌唔關事嘅！」

《仁心解碼 II》是蒙嘉慧約滿前最後一齣劇，她卻在播出前接到無綫通知，被飛出劇集宣傳，連老公鄭伊健都忍唔住鬧 TVB：「一邊叫人續約，又唔畀人宣傳，咁點續約呀？」

張可頤上月拍完《客家女人》後，暫時未有工開，可能要等 HKTV發到牌至有着落。《蘋果日報》圖片

戲勢大減

政府唔開綠燈，免費電視牌照得個講字，王維基的香港電視又返唔到轉頭，惟有減產減開支，由以往每月拍 3劇減到兩月開 3劇；電視台內部更傳出政府將拒絕發牌的傳聞，拍好的劇集要賣埠回吐，未算人心惶惶，不過冇最初咁口響囉！

唔怕嘥

《客家女人》編審鮑偉聰

雖然每集有 100萬製作費，但我哋都要搵贊助，又因為我哋全實景拍攝，如果要酒樓景咪搵間酒樓贊助囉，慳番啲租場費。就算唔發牌我又唔擔心啲劇會嘥咗，賣出去實有人要！

聽過唔發牌

薑麗文

有聽過唔發牌傳聞呀，但 feel唔到有人驚喎！我只係知阿哥（薑文傑）日日都拍緊，唔擔心，對王生有信心，我都啱啱拍完劇開始番歌唱事業。

寫好先拍

林嘉華

𠵱家拍劇唔使咁急，公司要將劇本寫好啲至拍，所以開劇進度係比以前慢。政府都未講任何嘢，我哋又點知佢發唔發牌，只知日日開工氣氛都好好。

上內地發展

陳思齊（前名陳凱欣）

我 4月約滿 TVB，傾緊過 HKTV拍劇，冇乜擔心發牌問題，反正我 2年前已唔想留喺 TVB，簽咗 HKTV我都會上內地發展。

採訪、撰文、攝影：娛樂組

. 最筍好工　王維基停開劇簽人　蒙嘉慧白𢭃 100萬
http://hittt.blogspot.com/2013/04/100.html