探熱針
城城呵住 肥苟橫行
因為苟芸慧，引爆郭富城飛甩拍拖七年女友熊黛林，事件鬧大後，原本打算封口的城城，眼見「新歡」被一面倒狂插，終於忍不住，主動開口「護苟」，並三度發聲，幫肥苟講好說話！
被城城呵到出面，開心到喊唔出的肥苟，索性放棄扮「死狗」，改以勝利者姿態，高調出巡，甚至出口反寸熊黛林，更跟足做「城嫂」規矩，每逢城城有新戲上畫，必定捧場，支持男友。
至於甩拖「投韓」的熊黛林，經歷在韓國五日四夜散心之旅後，心情依然未平復，返到香港，繼續愁爆！
三度護苟
上星期，熊黛林在微博公布「分訊」，正式同拍拖七年的郭富城分手，隨即爆出導致「富黛」玩完的第三者，是同城城拍廣告撻着的苟芸慧。
一向強調唔講感情事的城城，被問到分手一事，開始時堅持說：「大家都知我性格，私人嘢一直都唔答，唔想再回應。」
但當知道「新寵」肥苟喊曬，城城竟即時忍唔住，為保護對方發聲。「吓！咁慘？其實唔使喊，清者自清，佢性格係咁，（即兜）不過其實我哋又唔係好熟。」
十九日（上週五），城城到機場準備飛北京出席活動，見有記者守候，竟然走近記者堆，主動開口問：「係咪又想問嘢？」
記者提到熊黛林在記者會上講分手講到想喊，城城並無異樣，態度還相當冷淡，對前度毫無反應，反而自動波再發出護苟宣言。「我想講今次呢件事，冇牽涉任何人，冇第三者，對苟姑娘，對任何人都係無辜。」
兩種心情
除了公開「護苟」，心情大靚的城城，在機場等入閘時，不時攞住電話傳 Whatsapp，又攞住電子煙㩒着鐳射光周圍射，表現風騷；相反，同日出現機場，飛韓國療情傷的熊黛林，就一臉愁容，十問九唔答。
去到北京出席浪琴活動，城城繼續發揮護苟神功，主動講同熊黛林分手原因，「有啲事情不是表面上看到的那麼簡單，性格也很重要，我們中間不是有所謂的第三者。」
反寸情敵
對於城城三度親口對外呵番，原本匿埋屋企的苟芸慧，心情即刻有好轉，更在微博上曬幸福，「昨晚下完雨後，今早一睜開眼睛就看到了溫暖柔和的太陽光。朋友們，謝了！」
自言見到太陽光的她，更不再玩自閉，明知有傳媒候駕，仍照樣出巡。記者問她有否覺得熊黛林的「唔知邊個先應該喊」言論，是向她作出反擊，肥苟即反寸情敵，「我架的士唔知去咗邊，佢更無辜，佢 lost咗，我講緊架的士咋！」
新「城嫂」愈來愈得到城城認可，肥苟更加風騷！星期日（二十一日），苟芸慧原本要出席《金枝慾孽貳》宣傳活動，但無綫為免小三風波纏身的苟姑娘喧賓奪主，決定禁她出席活動。
無份做宣傳，苟芸慧十二點半離開西環寓所，先到銅鑼灣扮靚修甲，見有記者跟住，肥苟於是走後門離開。
一心撇甩記者，因為要趕住去見城城。三點十五分，苟芸慧去到圓方，會合樂大媽（樂易玲）一家人，在戲院旁邊餐廳醫肚後，四點十分一行人殺入戲院，睇由城城和張家輝合演新戲《同謀》。專誠捧男友場的肥苟，睇完戲後心情大靚，與樂易玲兩個仔，繑住手一齊行商場。
過往每逢郭富城有新戲上畫，熊黛林都會第一時間買飛，請埋同事、朋友睇戲，估唔到，新任「城嫂」肥苟，都有樣學樣。
城縱苟挫熊
「苟熊大戰」爆發近一個月，兩女不時隔空互寸，「肥苟」自稱「爛桃花」， Lynn即時反擊：「唔好惹咪冇事囉！」 4月 16日， Lynn在微博放上尾指戴戒指相片，並留言：「祝福自己，重新上路。」公告「富黛戀」正式玩完，連日來，三位主角繼續透過傳媒對話，但城城擺明偏幫「肥苟」， Lynn輸曬！
17日 苟芸慧出席《金枝慾孽貳》的宣傳活動時，對於被指小三，即時含淚說：「件事令我好唔開心，我都冇做過！唔係事實俾人咁寫好難受，我唔係佢哋講嘅小三！」
同日晚上，城城出席《同謀》慶功宴，提到苟芸慧落淚，即大為緊張：「好慘喎！唔使喊，清者自清，佢性格係咁，不過同佢唔係好熟，不真實嘅報導會影響女仔聲譽。」
18日 熊黛林出席內衣店開幕，首次開腔回應分手，提起苟芸慧喊曬聲稱無辜， Lynn亦含淚反擊：「我唔識佢，唔想答佢啲嘢……我唔知道邊個先應該喊。」（覺得城城太多緋聞？）可能佢工作控制唔到！（分手因為第三者？）我唔想傷害任何人，過去就由佢過去，唔計較咩原因。」
20日再被問到熊黛林反擊「唔知邊個先應該喊」，苟芸慧語無倫次，「我架的士去咗邊，佢更無辜，佢 lost咗，我講架的士。」
同日飛北京出席活動的城城，再次主動提起「小三」一事，公開替苟芸慧解圍：「有啲事情不是表面上看到的那麼簡單，性格也很重要，我們中間並不是有所謂的第三者，這對我們的關係是一種破壞。」更寄語 Lynn，「放手或許能讓對方找到更好的人……喜歡對方不一定白頭到老！」
戰火蔓延
「富黛分手」，三幫粉絲為力撐偶像展開罵戰，戰況更愈來愈激烈，連城城經理人小美、鄧萃雯亦牽涉在內，遭網友洗版。
小美發火
被粉絲狂轟「拆散鴛鴦」，又指她多年來針對熊黛林，小美即時連發四條微博反擊直斥：「說這些毒語的人有父母的嗎？」又表示自己一向「待人以德報怨」，更暗示 Lynn的粉絲冇家教：「有什麼藝人就有什麼樣式們的粉絲。」兩日後，熊黛林經理人阿 Kim引用聖經金句作反擊。
鄧萃雯捱轟
同苟芸慧合作拍攝《金枝慾孽貳》的鄧萃雯，開腔力撐「肥苟」：「我只擔心苟姑娘，佢唔係呢種人（小三），苟芸慧好純。」被問到 Lynn矛頭直指苟芸慧時，她說：「呢啲事應該等男人出嚟講，有乜理由女人爭住講？咪咁傻。」
言論一出，即被網民瘋狂洗版，更發起罷睇《金枝貳》，鄧萃雯後來在微博留言，直斥網民「無聊」。
mailto:nextb@nextmedia.com
. 城城呵住 肥苟橫行
http://hittt.blogspot.com/2013/04/blog-post_8481.html
