陳慧琳包冚返無綫

同你吟一吟

陳慧琳包冚返無綫

四大問題終於解決，無綫嗱嗱聲推出全新音樂特備節目《音樂在綫 Mega Live》，宣布正式「溶雪」。環球系派出陳慧琳、 Kary、 Mr.；周柏豪、官恩娜等就代表華納唱片，真係好耐都冇見過無綫一廠化妝間，有咁多四大歌手行來行去。

為表「復合」誠意，周柏豪仲帶咗三位超性感女 dancers上節目伴舞。個個低胸內衣黑絲襪當褲，有著同冇著其實分別唔大，三位女 dancers仲要冇遮冇掩，企响化妝間等入廠， Kelly路過見到，一對五蚊眼完全離唔開三位少布女，之後仲話：「嘩！我都忍唔住望！」

咁又係，當日一眾女歌手， Kelly長袖衫加拖到落地長裙包冚，相對前一日收錢出席品牌活動，著露肚透花裙，多布一倍唔止。 Kelly性感，看情況！

有三位女 dancers提神，大家要多謝周柏豪。

Kary以入膊背心露肚重返無綫，官恩娜雖然身上多布，但就識得賣口乖話要搵機會同樂易玲飲茶，日後多啲搵佢拍劇！

Kelly包密上無綫，但前一日又露肚又通花出席品牌活動，呢啲就係收車馬費同收酬勞嘅分別。

無綫搵阿旦鄭丹瑞拍住崔建邦主持《音樂在綫 Mega Live》，之後阿旦仲回歸《勁歌》做主持，加入同歌手傾偈清談環節，不過係半夜播，睇唔到，冇緣囉！

撰文：八珍

mailto:nextb@nextmedia.com

. 陳慧琳包冚返無綫
http://hittt.blogspot.com/2013/04/blog-post_3736.html