人面全非 新歡度升仙 詹瑞文變大迷信

探熱針

人面全非　新歡度升仙　詹瑞文變大迷信

詹瑞文去年搭上已婚女職員 Amenda後，不單為對方拋妻棄女，甚至言聽計從，怒炒十多名對 Amenda有意見的員工，曾力勸他珍惜家庭的兩位愛徒蝦頭和泰臣，也難逃一炒。

瘟女斷六親，性格喜好亦隨新歡 Amenda改變，屋企公司擺滿陣，變成大迷信！

搬入帝景峰

縱然詹瑞文死撐 Amenda並非導致他離婚的原因，但紙包唔住火，介入做小三的 Amenda隨後亦跟丈夫分居，並由詹瑞文的公司 PIP（文化產業）總經理身份，變為經理人，攞正牌出雙入對，早前更孖住搬進月租四萬的九龍塘豪宅帝景峰，關係愈來愈浮面。

一物治一物！身邊不少朋友形容詹瑞文如深陷迷陣，性格喜愛大幅度轉變，儼如另一個人。從不愛女人黐身的他，任由 Amenda如貼身膏藥黐到實，甚至將財政大權交由對方掌管；更由一個不信風水命理的人，變成大迷信。不但九龍塘寓所滿布風水局，公司也是滿天神佛。

9/4門口放陰司紙

阿詹隨新歡所好變咗大迷信後，在公司門口安放一對土地公公、婆婆神位外，又放拜鬼用的陰司紙及數個紅包，加埋泰國白象神，滿天鬼神。

4日後加料

四日後，發現門口的神位又加多一個大嘅土地公「坐鎮」，而一堆陰司紙及白象依然同在。

本月中，本刊發現青頭仔阿詹與 Amenda一起返工，又孖住撐枱腳。雖然新歡零姿色，但阿詹如迷魂般，經常深情望住 Amend傾偈。

衣食住行問高人

在詹瑞文公司門口外放了一個神位，內有一對土地公土地婆，但並沒有燒香供奉，反而在神像前放了一疊陰司紙；旁邊還放了一隻泰國象神及數個紅包。幾日後，記者發現已有一對土地公公婆婆的神位，又加多一個大土地公「坐鎮」，令神位如籠屋一樣擠逼。

據悉忽然信風水的詹瑞文，已沉迷到連衣食住行都要高人指點。

「阿詹之前信耶穌，雖然好少返教會，但久不久會搵牧師傾吓。同 Amenda一齊之後，佢改信風水， Amenda撮合佢同李居明（玄學家）合作喺新光演出《帝女詹》後，阿詹更加泥足深陷，風水佬話綠色旺佢，就將頭髮染成綠色，又戴到成身佛珠，屋企同公司擺滿風水陣，三日唔埋就問師傅行咩方向旺佢，以前佢好抗拒呢啲嘢，依家聽曬 Amenda話，好沉迷！」知情者說。

除屋企同公司擺滿風水陣，阿詹的七人車也掛上法器。

去年 Amenda（白衫）撮合下，阿詹跟玄學家李居明合作，在新光戲院演出《帝女詹》，有傳他自此更沉迷風水。

青頭賀志偉

曾志偉六十壽宴，做咗「青頭仔」的詹瑞文頸掛佛珠出席。有 Amenda做貼身膏藥，無論返工放工，詹瑞文從不落單。日前二人中午時分離開帝景峰，由司機接載返九龍灣辦公室，並在公司樓下餐廳撐枱腳。

記者致電詹瑞文前妻甄詠蓓，問她昔日與前夫共同打理 PIP時，公司有冇擺風水陣？「冇㗎，我哋都唔信。」得悉詹瑞文受 Amenda影響變大迷信，她即縮：「唔答啦，你哋問番佢！」甄詠蓓說。

有傳年初阿詹同新歡由紅磡雙雙搬進九龍塘豪宅帝景峰。當日離開公司後，阿詹便由司機送返九龍塘新居休息。

搭上 Amenda前，阿詹與相愛三十年的甄詠蓓育有十歲女兒樂童，兩公婆又合力創辦公司 PIP（文化產業），是圈中合拍夫妻。

六月阿詹拍住扮嘢始祖盧海鵬在紅館開騷搞笑，早前二人以豹小子造型大跳《 Gwiyomi》。

有指阿詹兩位愛徒蝦頭及泰臣因勸他珍惜家庭，最後遭 Amenda炒魷離開 PIP。

怪陣

玄學家吳佩孚看罷詹瑞文公司門口風水陣照片說：「乜咁亂！土地公公婆婆係正神，係放香爐供奉，唔係放陰司紙。鬼先會使冥通銀紙，五鬼運財就係陰神，就要用陰司紙。拜呢啲一定有風險，始終都係鬼，好易失控俾佢玩返轉頭。同埋一個土地公就夠啦，再加多個大嘅都係多此一舉，又擺埋泰國象神吸財，咁多嘢只可以講個陣好古怪囉！」

撰文、攝影：娛樂組

mailto:nextb@nextmedia.com

. 人面全非　新歡度升仙　詹瑞文變大迷信
http://hittt.blogspot.com/2013/04/blog-post_2165.html