探熱針
首爾家庭樂 三太唔見 44萬鑽石卡地亞
2012年11月22日全職做何超雲跟得男友的陳山聰，在女友精心策劃下，參與何家旅行團，陪三太、超蓮等齊齊遊首爾，被當正家人看待，令陳山聰入贅何家再邁進一大步。豈料陳山聰同未來外母陳婉珍樂極忘形，陳山聰唔見銀包，損失有限數，三太遺失價值四十四萬的 Cartier Baignoire鑽石錶，大煲！
後知後覺
經常孖公仔歐遊的何超雲同陳山聰，早前搞搞新意思，發起同遊首爾家庭旅行團，共聚天倫。
上週日（十一月十一日）三太連同超雲、超蓮及未來女婿陳山聰以及兩名親友，一行六人坐早機前往首爾，落機放低行李後，跟住兩個女行街、飲飲食食，直至晚上返回酒店，三太才發現手上價值四十四萬的卡地亞名錶不翼而飛。思前想後，終於有頭緒，估計是自己一時大意，把鑽石錶留在飛機上。
「三太話喺飛機曾經除低手錶洗手，之後就無印象自己有冇再戴番，估計應該留咗喺架機度。」一名熟識三太的人士透露。
雖然身家過百億，但三太失錶依然好著緊，立即通知助手聯絡航空公司代為搜尋。上週三（十四日）三太、超蓮以及親友結束首爾之旅，先行回港，遺失心頭好，三太離開禁區時明顯心情唔靚，對鏡頭頗為抗拒，與平日見傳媒表現大方親切完全唔同。
見媽咪心情麻麻，超蓮都唔敢同記者打招呼，至於一早收到風事頭婆失錶的女助手，立即出手護駕：「影夠啦，你哋邊間㗎？」沒有家姐超雲在場，超蓮馬上充當指揮，安排家人及行李上車，一行四人返回布力徑大宅。
旅行氹媽咪
一不離二，留在首爾過二人世界的何超雲、陳山聰，在三太離開翌日，何家準女婿陳山聰發現遺失銀包，要到當地警局報失。
有傳今年八月成功求婚的陳山聰，向女友獻計先斬後奏，打算上電視節目宣布婚訊，但三太早一步收到消息出手阻止，超雲自知激嬲媽咪，為免被斷水斷糧，以及安排陳山聰做何家女婿，超雲於是借外遊家庭樂，修補關係。
「近一年 Florinda成日唔黐家，三太已經有微言，仲話要結婚，唔嬲就假，不過個女知道阿媽耳仔軟，好易氹，咪搞旅行聯誼，修補關係，點知一到埗，阿媽就唔見咗隻錶，玩都冇心機啦！」
