探熱針
金蛋 取代舒淇 蔡少芬佗仔賺百萬
2012年11月22日蔡少芬前年佗住肚拍大陸劇《甄嬛傳》，女兒楚兒腳頭好，劇集播出後爆紅， Ada身價狂颷。早前她宣布懷上第二胎，即有奶粉廣告搵上門賺七位數，再取代舒淇成為護膚品代言人，名副其實生金蛋！
生完封肚
去年五月，蔡少芬為張晉誕下長女張楚兒，事隔一年半，兩公婆再造人成功。雖然 BB性別未公開，不過據她的閨中好友透露， Ada今胎佗仔，跟女兒楚兒湊成個「好」字，為張家添丁，生完宣告「封肚」。
上次佗 著楚兒拍《甄嬛傳》，劇集爆紅，蔡少芬身價即時跳升至二十萬一集，今次再有喜， BB跟家姐一樣好腳頭，大肚蔡少芬早前接下一個奶粉廣告，再接埋護膚品做代言人，合約為期半年已有百萬落袋，非常好賺。
「斟約 嗰陣， Ada已事先同個客講好自己有 咗 BB，擔心會影響宣傳，但卓悅老闆娘葉太覺得只要 Ada皮膚質素好，唔會有問題。」知情者說。護膚品牌原由舒淇代言，但鑑於對方要求幾乎跟外國巨星睇齊，相對蔡少芬現階段在國內的知名度絕不遜於舒淇，今次合作還非常愉快。
搞自家童裝
上週四（十一月十五日），鬆身裙打扮的蔡少芬為護膚品拍廣告，穿上三吋高 踭鞋埋位，擺甫士完全冇難度。雖然暫時不打算拍劇，但她講明不會全面停工。
「老公有叫我休息，不過我同個女一樣，唔出街唔安樂，而家會接 啲輕鬆 嘅工作同廣告。」搵錢至上，蔡少芬更密鑼緊鼓籌備推出自家品牌的童裝，專誠找來自紐約的設計師負責設計。
「我 嘅童裝係以夢想做主題，細路仔一樣有夢想，好似我個女楚兒得歲半，已經識得自己揀鞋著。」蔡少芬說。
外界估計蔡少芬佗 B大約三個多月，不過據知情人士透露，肚大如波的她，已有近五個月身孕，是明年娛樂圈蛇頭。
吸金媽咪
藝人養育下一代，供書教學，條數有排計，但媽咪有名氣， BB未出世前後，都可以有機會幫手搵定奶粉錢。
周家蔚
宣布佗仔後，拍咖啡廣告又頻頻出活動的周家蔚，自爆仔仔腳頭好旺父母，老公洪天明一劇接一劇冇停手，大住肚的周家蔚亦連氣接了十多個活動，成為搶手媽咪。
郭羨妮
生完女兒 Kylie後，郭羨妮迅速減磅，先返娘家拍電視劇《初五啟市錄》，再接拍法國奶粉廣告，名副其實搵奶粉錢。
