陳豪陳茵媺蜜遊羅浮宮

陳豪（阿Mo）同陳茵媺（Aimee）拍拖以嚟一直甜蜜，羨煞旁人，前排仲盛傳阿Mo向Aimee求婚成功，出年喺澳洲結婚㖭，不過佢哋否認話冇咁快。其實大家都睇好佢哋會開花結果，果然近排多人結婚、生仔分散咗注意力，原來阿Mo同Aimee靜雞雞去咗歐遊預支蜜月。

笑曬著情侶裝

有個叫做「滾石搖擺的田鼠」嘅博友前日喺微博上載咗張阿Mo同Aimee嘅合照，佢話喺巴黎羅浮宮參觀蒙羅麗莎畫像時，突然發現身邊嘅係阿Mo同Aimee，當時佢兩個著黑色情侶裝，Aimee戴住帽同粉紅色頸巾，博友讚佢哋好襯，不過當佢邀請阿Mo合照時，阿Mo以女朋友喺身邊為由婉拒，呢個理由都幾特別。其實阿Mo三個月前拍完《金枝慾孽（貳）》後一直休息，今日會為無綫台慶試衫，而Aimee拍完《仁心解碼II》後都休息緊，可能佢哋趁呢段空檔去玩增進感情。

另邊廂，陳豪舊愛廖碧兒前日接受鳳凰衛視《港人自講》節目訪問，佢話08至11年最唔開心，尤其係同男友分手單嘢矛頭指向自己，壓力大到崩潰，雖然佢冇講陳豪個名，但大家心知肚明，佢喊住話：「我慣咗唔解釋私事，唔傷害人就得，做好本份就算。」

■阿Mo同Aimee著曬黑色情侶裝參觀羅浮宮，好鬼甜蜜。微博圖片