搜尋此網誌

2013年1月4日星期五

[忽然1周]再續 12年前緣 子華嘟嘟復合拍《男親女愛 2》

收視強人 <br><br>王維基香港電視來勢洶洶,無綫嗱嗱臨搵以往一班舊將回巢抗敵,一直有收視保證的黃子華,更是無綫頭號目標。對於無綫招手開拍《男親女愛 2》,黃透過經理人回覆說:「我哋唔可以透露任何嘢,你哋都係問番無綫啦!」 <br><br>今次要過 50點收視!(設計對白)


娛聞樂

再續 12年前緣 子華嘟嘟復合拍《男親女愛 2》

2013年01月04日

電視大戰迫在眉睫,無綫眼見旗下小生、花旦走得就走,高層𢱑爆頭謀對策,近日已先後找來關詠荷和周海媚出山幫拖。

除了搵花旦救亡,本刊收到消息,早前戲劇製作總監曾勵珍亦急 call昔日愛將、《男親女愛》金牌監製徐正康回巢打仗。

為省靚招牌,據知徐監製近日出動友情牌,親自力邀黃子華及嘟嘟鄭裕玲再續前緣,拍全新電視劇《男親女愛 2》。對此嘟嘟亦不諱言:「 11月台慶時徐正康親自搵咗我,我都好希望再拍子華,為公司出分力。」等足 12年,子華嘟嘟粉絲有福了。

放大圖片

望再合作

一直有傳對黃子華有好感的嘟嘟,周一( 12月 31日)在商台回應開拍《男親女愛 2》時,坦言希望再與老朋友合作,但重點是要睇自己體力能否應付。

好想同佢合作!(真實對白)

在 2012年尾,無綫已開始擬定明年製作的劇集,金牌監製徐正康亦奉曾勵珍之命,早在十月初接任離巢在即的神劇監製戚其義做製作經理。

為幫公司打仗,有收視保證的徐已急不及待開工,頭炮找來兩大視帝黎耀祥及陳豪夥拍花旦陳法拉,拍自己最拿手的法庭戲《傳愛事務所》,省靚招牌。

子華親自揀蟀

搵視帝助陣外,徐正康亦滿腹大計。近日他正密鑼緊鼓親自搵老友黃子華出山,更花盡唇舌力邀嘟嘟出山,合演 12年前經典劇《男親女愛》的續集,為二人再續前緣。

據知今集《男親 2》故事內容、角色和背景將會和第一集截然不同,除了由律師樓移師到警署外,嘟嘟亦會由大律師變為高級警司,與下屬子華飾演的刑警將會有一連串查案瓜葛。至於選角方面,監製除了篤定子華、嘟嘟及同是愛將的蔣志光外,其他角色已講明由子華負責挑選,他更會擔任部分編劇,過足戲癮。

據知情人透露:「其實子華已經 hold咗農曆新年後個期返去。依家雖然放緊假,但已經四圍 call緊人入劇組,我哋知佢預咗林子善做一個角色。子華話無論係配角好閒角好,佢都想親自搵人,反而擔心嘟姐,因為佢仲未應承實徐生(徐正康)!」周二( 1日),記者致電林子善,他直認子華曾搵過他。他笑笑口說:「子華話套劇四月先有定案,不過就講明我係下把位,專俾佢鬧!」

放大圖片

食老本搶收視

無綫老臣子兼金牌監製徐正康(左)去年 10月回巢,即密謀開拍十年前佳作。日前他親口向本刊證實已搵嘟嘟和黃子華拍《男 2》,預計今年 4月開拍。

放大圖片

舊人冇得留

除了黃子華和嘟嘟鐵膽有份拍《男 2》,由於故事全新包裝,加上上一集的藝人如蕭亮(前排左二)和陳彥行(中排左二)等已鳥獸散,因此《男 2》幾乎可以肯定面目一新。

放大圖片

子華 揾子善

今次監製將會俾子華有無限自由度,包括可在新劇揀蟀。據知子華已搵了曾和他拍《奸人堅》的林子善做差館拍檔。

放大圖片

早前有指老拍檔周潤發應承無綫拍劇,但嘟嘟就斬釘截鐵話唔會再拍劇,如今卻有意為黃子華轉軚,二人確實交情非淺。

6萬利誘嘟嘟

今次監製搵嘟嘟與子華打硬仗,當然不會薄待二人,據知無綫罕有出動銀彈政策,分別俾每集 6萬和 5萬劇酬予嘟嘟及子華,並承諾每天拍攝時間不超過 10小時,待遇為全台小生花旦之冠。

對於搵子華嘟嘟拍劇,監製徐正康日前向記者坦認:「呢 pair係超高難度嘅組合,我諗好多人都想睇佢哋『復合』啦!不過嘟嘟嘅時間比較難控制。(仲有咩新角色?)呢方面唔講太多啦。」至於黃子華經理人則不願回應,叫記者問番無綫。

周一( 31日),在商台開完咪的嘟嘟對此不置可否:「徐正康 11月台慶時已親自搵咗我。(聽聞俾好高價利誘你?)唔係錢嘅問題,係好多考慮因素。如果我唔想拍,就算俾幾多錢,甚至話發哥(周潤發)返嚟我都唔會心動。(你想唔想再拍子華?)想,當然好想,但都要睇自己身體狀況,況且好多花旦都想拍佢!」

梁家樹誓爭子華

「福將」子華人人都想要。據知另邊廂,與曾勵珍打對台的梁家樹,亦正密謀以同是今年中回巢「還債」的佘詩曼作餌,硬撬子華開拍 08年收視不俗的《絕代商驕》的續集。知情人透露:「其實 Tommy(梁家樹)同子華關係都唔錯,當年子華肯拍監製張乾文《絕代商驕》,都係靠 Tommy拉攏。今次 Tommy收到風對家搵子華拍劇,梗係唔執輸爭埋一份。」可是子華講明今年得一個檔期,梁家樹睇怕冇希望。

放大圖片

梁家樹搶人

黃子華講明今年只會俾一個檔期無綫,即使他與梁家樹份屬老友,但他最後揀同嘟嘟合作而放棄阿佘。

收視神話

2000年播出長達 100集的處境喜劇《男親女愛》,由黃子華及嘟嘟孭飛,兩人在劇中刻薄、搞笑的鬥嘴劇情,令一班師奶們晚晚追看。

當時劇集在非黃金時段播出,卻驚人地獲得每晚平均收視 47點,最高收視更達 50點,創造了 TVB神話。直至 05年韓劇《大長今》才平了它 50點收視。

劇集播完後,原班人馬食住個勢演出《男親女愛》 40場舞台劇,場場爆滿,締造了另一個神話。



.[忽然1周]再續 12年前緣 子華嘟嘟復合拍《男親女愛 2》
http://veryy8.blogspot.com/2013/01/1-12-2.html
Related Posts Plugin for WordPress, Blogger...