搜尋此網誌

2013年2月20日星期三

我最粉 Bob林盛斌

我最粉 Bob林盛斌


我最粉 Bob林盛斌

FACE週刊 第300期

都係《老表》!

因為參演《老表,你好嘢!》而爆紅,情人節當天約了 Bob林盛斌做訪問,一於應節,請 Bob開來他的粉紅色跑車、穿上粉紅色西裝拍照。

雖然人紅期又爆, Bob二話不說擠出時間接受訪問、做足記者每個請求,唯一一個顧慮是:「車又粉、人又粉,我唔想太寸,你條題可唔可以寫得我謙啲?」

我說:「你上緊位,又未係最紅,不如話你粉,夠謙喇啩!」

實事求是,用不著我特別修飾, Bob的確謙!

兩個小時的訪問,乜哥物姐,恭恭敬敬,謝個不停,恍似每個扶他一把的人本尊就站在面前一樣。

33歲的 Bob說,人長大了,有兩個體會:「第一,成功非僥倖,更非一己之力,冇咁多人包容我、扶我一把,我唔會有今日。第二,其實揸架粉紅色跑車,確係有啲招搖。」

報道說,阿 Bob紅咗、搵到,所以花 40萬買了架日產 Fairlady名跑,還噴了姣爆粉紅色,招搖過市。

Bob話,其實架車買了年半,顏色上手噴,二手車價平好多,不過十萬。

年半前,一個小 DJ、主持仔,貪得意買架粉紅跑車,不知幾自在。

年半後,卻要擔心小樂趣怕不怕招人閒話……這,就是紅的代價。

扮女人的大男人

我最粉 Bob林盛斌

電台出身的 Bob一直說,自己的努力目標是商台 DJ森美。橫睇掂睇,他不可能像森美一樣 chok,不過觀眾緣卻與偶像不相伯仲。在《老表》裏演個綁架勒索勾義嫂的奸角,也一點不惹人嫌,訪問這天站在巨星富戶雲集的加多利山拍照,不論有錢人、菲傭定裝修工人,經過都熱情打招呼,演奸角也可以博到同情入到屋就是最佳例證。看著眼前一棟二棟億億聲的豪宅, Bob感嘆:「呢啲地方真係要劉德華、張國榮嗰啲級數至住得起,我呀,唔使諗啦!」

男人老狗,誰不想賣型賣 chok,玉樹臨風? Bob自己知自己事,在電台節目做下莊,在電視台凸肚腩扮女人,就等今天這個突圍而出的機會:「呢行好玩之處,就係有好多 unknown,你永遠唔知我做呢個商場 show,主持嗰個節目,邊個會行過、邊個會聽到,最終幫我幾多。幫到就梗o架啦,所以我會抓緊每個機會,機會就係一個 lung一個、一個 lung一個出現。」

雖然未住得起加多利山,已婚育有分別四歲半和一歲女兒的 Bob名下有兩層樓、一間寫字樓、兩架車,和分別位於油麻地和大埔的潮店,每月供樓養家給父母固定支出最少十萬,全都是扮女人和一張能說會道的嘴賺回來:「大女四歲半,早兩日同我講:『爸爸,我要結婚啦!』我問佢同邊個結,佢講咗個男仔名,唔知李浩進定陳建穎咁上下:『好呀,咁你帶佢嚟見爸爸啦!』個女話:『唔得呀,佢好忙o架,佢好多功課要做呀!』呢啲嘢,o依家就笑,大個梗係唔好笑啦!我一生兩個女,第時佢哋會攬住第二個麻甩佬、個麻甩佬要啜佢喎!仲要唔得閒嚟見我,我驚到諗都唔敢諗……啲女仲細,但係點揀男人,我已經諗定第時點同佢講:『女呀,你覺得爸爸係唔係一個好爸爸?你覺得爸爸對媽咪好唔好?咁爸爸錫唔錫你同妹妹,係唔係照顧得你哋好好先?咁,你第時要搵就要搵個好似爸爸咁樣嘅男人啦……』女,唔使事業有成、學業有成,嫁得好就係終生事業啦!」

鹹碟煲出人間愛

曲線讚完自己是個顧家好男人, Bob再三叮囑,自己能全力打拼事業,全靠娶了個好老婆。林太本是遵理學校公關, 05年因為工作認識 Bob, 07年結婚,去年第二個女兒出世後,林太就辭去工作做起全職家庭主婦。

「我成日同啲朋友講,好似唯唯(梁烈唯)同陳偉霆咁,結婚啦!結咗婚定好多、搏好多o架!尤其係我,娶咗個賢內助,返屋企唔怕冇乾淨底褲著、唔驚冇嘢食,兩個女教得好,以前個個月使凸,o依家有幾層樓個個月有錢賺都係多得老婆持家有道咋。你要記得多謝我老婆,我愈忙、家庭日就愈少,細女出世後,應承佢每個月搵一日二人世界拍嚇拖,都係做過一次咁大把。成個新年,日日都要開工,老婆從來唔會詐我型,講攰,佢都攰,但三更半夜阿女喊,佢從來唔會叫醒我去幫手,就係知我辛苦,唔想打斷我睡眠囉。」

問阿 Bob情人節有甚麼安排, Bob自爆烏龍事:「直頭好大懵,平時見到老婆成日送兩個女返學、去 playgroup,需要個細細個嘅袋袋嚇電話、八達通咁,過年前就喺名牌店買咗個幾千蚊嘅斜孭袋,擺喺架車度諗住今晚畀佢。點知前兩日摷番個袋出嚟擺利是,喺屋企擺袋嗰個櫃發現,原來舊年情人節,我已經喺同一間鋪頭買咗個一模一樣嘅袋畀佢……衰到咁樣!」

我最粉 Bob林盛斌

處男下海,阿 Bob在《老表》淚中有笑的表演獲得好評如潮,監製黃偉聲三月開新劇《食為奴》亦因此預埋 Bob。

我最粉 Bob林盛斌

做諧星、扮女人、愈紅愈夜回家,林太都不會詐型:「佢對我百分百信任,亦知道我做嘅所有嘢都係為頭家,娶到呢個賢內助真係福分。」

我最粉 Bob林盛斌

買樓買寫字樓外, Bob亦有兩間潮店賣服裝和飾物:「冇錢搵,每個月打個和已經偷笑,呢啲係賺經驗同埋賺人脈。」

我最粉 Bob林盛斌

去年初與曾華倩每星期主持五晚《登登登對》:「之後就有大半年幾乎冇上電視,聽講係有人見得多我嫌悶。家燕姐叫我唔使擔心,呢個係必經階段。」

我最粉 Bob林盛斌

話雖播影視三棲,其實電影套套都係收封利是客串一幕:「 嚟緊 喺《神獸巴打》又係客串做警察,其實我想做男配角、想做傻強。」

去年事業剛起步,就因為被拍到買鹹碟揼邪骨登上雜誌封面,阿 Bob說對老婆充滿歉意,是因為人愈紅、工作愈多、錢愈多,愈對身邊人和家裏事無心裝載,絕非做過甚麼對不起老婆的事:「講起真係好笑,個封面出咗後,個個朋友話我 old school,好多人 send咗水蛇春咁多條 link畀我,話o依家唔使出街買碟,上網有得睇喎。我擔心啲客因為咁唔鍾意,出封面嗰日逐個打去道歉,結果冇人因為咁取消我工作,仲有個秘書小姐打畀我話:『老細話冇問題喎,佢聽日燒番隻手指畀你,入面有 3,000條片畀你睇!』……呢啲咪人間有愛,知道自己朋友多囉。其實碟係同老婆一齊睇、我去邊度做乜嘢、見乜人,亦會同老婆報定案,個封面出咗以後,係老婆叫我認咗佢,唔好講大話。佢同我講,我唯一錯在忽略咗自己公眾人物嘅身份,以後做乜都唔可以好似以前咁全無顧忌囉。」

最好畀我做傻強

我最粉 Bob林盛斌

23歲在城市大學建築工程系畢業,然後入職新城電台做 sales, Bob理想是做 DJ,於是向台長朱明銳自薦,放棄每個月三萬的營業員工作,改為月薪七千在節目部由低做起,不到十年,就從報時做到廣播、電視、電影三棲和婚宴晚會倒數騷一線司儀, Bob說還想再上一層樓:「冇人鍾意原地踏步,喺電台報時,我想報天氣。有天氣報以後,又希望有番個環節。終於擁有固定環節,我想再上一步做節目主持。三月,我開始拍無綫電視劇《食為奴》,以前客串電影、拍《老表》,我都係搞笑,實情做番自己,今次真係演宮廷戲、有內心戲,好大壓力好想自己演到。電影方面,托賴好多導演睇得起我,畀我客串嚇,其實我嘅目標係喺電影演個配角,真正做個關鍵人物有啲戲做,最好就似《無間道》嘅杜汶澤(傻強角色)咁囉,呢啲係目標啫,唔知幾時可以達到呢?」

08年,因為崔建邦打女被雪藏, J2籌備新節目《兄弟邦》取代《 My Name is邦》,因此找來電台人林盛斌處男登場,四年多來表面看起來一帆風順, Bob說其實亦有低潮:「 11年我喺電視台曝光愈嚟愈多、仲有傳言話有機會主持港姐,結果港姐做唔成,我聽番啲幕後講,有人話見得我多太厭,個個監製不約而同少用我,舊年上半年,我有幾個月都冇上過 TVB。所以我想話,做人唔好鬆毛鬆翼、真係要記住人哋大把選擇,揀你係畀面你,我真係好想多謝祖藍,喺我冇乜電視上時,都諗起我搵我拍《老表》。行到呢一步,好多人有份畀機會我、扶持我、包容我,上少少位,更加要保持態度,講真,我喺電視台新到唔新,幾時輪到我扮大牌呢?」

我最粉 Bob林盛斌

天生外父相的 Bob有一對女兒,大女霏霏 4歲半、細女熹熹 15個月:「生女,只望佢 哋嫁得好,但係我又好驚呢一日,驚到諗都唔敢諗。」

我最粉 Bob林盛斌

學生時代, Bob(右)一樣肥肥白白還多了茂盛頭髮:「我拍拖經驗好豐富?,個個覺得肥仔冇機心,其實不知幾有機心,呢 啲咪易快熟囉。」

抵你紅

我最粉 Bob林盛斌

謝完又謝,謝到我都頂唔順,索性告訴林盛斌:「不如留番個後記位畀你謝飽佢。你假設自己上台攞獎,擬番份謝辭畀我啦!」當晚,就收到 Bob這份水蛇春咁長的謝辭,我相信,該謝的都謝了。就算有遺漏,認識他的人,都該知道,阿 Bob知恩又感恩,絕非故意。

撰文:朱小博 

攝影:範仲良

友薦雲推薦

.我最粉 Bob林盛斌
http://veryy8.blogspot.com/2013/02/bob.html
Related Posts Plugin for WordPress, Blogger...