媽咪姐
真係騎呢騷
2012年10月12日
亞視早排 喺大埔總台為《 ATV 2012亞洲先生競選》進行面試，當日一眾騎呢「亞生」已經令人印象難忘。早兩日亞視仲「乘勝追擊」，去深圳搞咗個內地賽區面試。媽咪姐梗係走去睇嚇有冇筍盤啦，嘩，真係聞名不如見面，燕瘦環肥乜都有，係唯獨是冇靚仔囉！
⑮甩色筋肉人
已經 喺香港賽區面試過嘅⑮李思桐，今次以古銅色 body示人，不過佢嘅粉面、黑身已經出賣咗佢，究竟邊隻色先係真 㗎？佢自己話 喺香港區已經入咗圍，今次 嚟只係做宣傳，唔知佢想宣傳 啲咩呢？
⑦全場最基
混血兒 ⑦祖魯哈跳肚皮舞同埋表演「電臀」時姣味十足，仲起勢咁電 啲評判。依家係選亞洲先生，唔係選亞洲小姐喎！
⑬厚粉遮紋身
係咁擺騎呢甫士嘅$趙健民成個諧星咁，甫士新穎唔在講，仲要搽厚粉遮住手臂紋身。究竟你係當評判盲嘅，定係自己盲呀？大大方方騷個紋身咪仲好！
②激凸耍棍
來自烏克蘭嘅 ②尤里激凸耍雙截棍時好有台型，算係當日最有才藝嗰個 㗎啦！而且身形唔錯，被外界睇高一線。
⑤罕見清泉
⑤孫宏超係咁多面試者入面，最青靚白淨嘅一位，談吐得體外形又唔錯，絕對係一眾騎呢男中嘅一道清泉。不過佢連大合照都冇影就走咗，唔通 喺後台俾其他參賽者嚇親？
