主頁>娛樂圈 >娛樂追擊>煲湯攻陷芳心 鄺美雲 四叔猛將熱戀三個月
於圈中有「美人」稱號的鄺美雲（Cally），單身多年，近日終於人逢喜事，與四叔李兆基旗下猛將、恒基地產營業部總經理林達民（Thomas）熱戀三個月。
二人於今年五月由朋友介紹下認識，兩個月後火速撻著。據Cally身邊好友透露，Cally欣賞男方有智慧，且為人細心，經常親手煲愛心靚湯冧女方，最終成功打動其芳心。
五十三歲的林達民早年已婚，並育有一名約廿歲的兒子，但去年已經離婚。
記者本周一致電Cally，她甜絲絲地直認蜜運中：「我哋拍咗拖三個月啦，身邊好多朋友都知道。」
平日予人女強人形象的她，又承認人愈大，愈想安定。「年輕時掛住搵錢，依家覺得開心最重要。如果啱嘅，當然希望兩個人可以一直走下去啦。哈……」
沐浴於愛河中的女人，笑聲也是甜的。
一個月前，鄺美雲與林達民拍拖到東南亞旅行，共度甜蜜三日兩夜。
公開拖手
今年平安夜便五十歲生日的鄺美雲，自從九七年與呂良偉離婚後，一直甚少談及感情事。每次被問及有否新戀情，她都說得淡然：「順其自然啦！我工作咁忙，哪有時間拍拖？」
然而近三個月，她卻靜靜地起革命，經常與有「恒地樓神」之稱的恒地營業部總經理林達民，結伴出席朋友聚會。據知情者說：「近幾個月，Cally經常同Thomas手拖手出席朋友飯局，仲好大方咁介紹Thomas係男朋友添。」
二人拍拖，早已成為社交圈公開的秘密。兩個月前，二人就曾拍拖去看曹格演唱會。上周六，他們又孖住出席演藝學院的籌款晚會。Cally的大部分好友如殼王陳國強、楊受成、阿倫、志偉、克勤等，亦一早得悉二人的戀情，戥Cally高興。
「唉，Cally都咁耐無拍過拖啦，難得佢搵到一個互相鍾意，又咁啱傾的男人，我哋當然戥佢開心。」
上周六（六日），鄺美雲與林達民（前右二）一同出席演藝慈善晚宴。在活動中，二人更與一眾好友何國鉦、陳君宜與丈夫鄭躬明等合照，二人的關係一早已在朋友圈中公開。
鄺美雲將二人的背影照，用作手機的wallpaper。
遊山玩水
據悉，Cally與林達民於五月時由朋友介紹認識。Cally一名好友透露：「Thomas公司經常搞樓盤推廣活動，有次有朋友介紹Cally佢識，睇嚇珠寶同樓盤可否搞啲crossover合作。佢哋第一次見，已經好啱傾。之後成班人出來食過幾次晚飯，佢哋兩個好有默契，好似眼中只有對方咁。」
現年五十三歲的林達民，為人健談，又喜愛運動，遊水、滑雪樣樣啱，平日甚少運動的鄺美雲，認識他後也被其活力溶化。「以前Cally放假唯一的活動就係去佛堂，但近日忽然話要學遊水keep fit，幾乎每個周末都會投其所好，同Thomas去遊水、行山，又會去郊外食嘢。Thomas最近仲送咗啲打拳用具畀佢，Cally遲啲會學埋泰拳。」
