黃智賢雄心萬丈

無綫藝員黃智賢九十年代憑《真情》「阿海」一角成功入屋，雄心壯志的他毅然勇闖內地及拍亞視劇集，輾轉過後重返「娘家」，頭幾年卻不被重用，心灰意冷的他向高層樂易玲控訴：「你唔畀我做就話我唔得，對我好唔公平囉！」直至演「辣薑」一角奠定好戲骨地位，再次於無綫「插旗」！

離開無綫嗰陣雄心萬丈，覺得要出去闖，同內地、台灣同埋新加坡等唔同地方嘅演員合作，拍唔同市場嘅戲。當時一離開無綫就拍韋家輝，殿堂級編劇，同劉青雲同鄭少秋合作，你個心雄唔雄呀？好雄！你當我少不更事都好，可以拍韋家輝嘅劇本，我幾開心呀！喺內地拍咗幾年劇，錢係賺到，但高不成低不就，選角上唔係非你不可，一係你就同人鬥平，但我唔想又離鄉別井又要去到咁！內地劇香港又唔播，香港人會以為你消失咗或者拍咗亞視啲劇跳咗槽！

「我要養家o架」

返到無綫，覺得佢哋冇睇過我演出，好似仲喺度試試嚇，你要捱過個過程，賺番個信任，話畀人聽我仲企得住！未有「辣薑」（《潛行狙擊》角色）之前個位時高時低，搵你客串，監製會同你講，有個古仔一定要搵你做，但得三集咋，即係你認同我嘅能力，又唔放膽畀我去，好奇怪。有時為咗三集劇你Hold我一個廿集嘅期，點搵食呀？我唔係揸Benz有司機嗰啲演員，我真係要養家o架！你Hold廿集嘅期，只畀三集嘅錢我，呢個過程真係好挫折。

「好唔公平囉」

如果堅持到，仲會贏到一啲信任；一旦堅持唔到會洩氣，不如走啦！東家唔打打西家，但要堅持相信呢個平台、要守住信念，就會累積到，但我唔知自己要等到幾時！我比較樂觀，會話：「捱咗佢啦！」唔通話你唔用我係你嘅損失咩？咁你都要做出嚟！我記得我同樂小姐（樂易玲）都係咁講，你畀我做，我就做畀你睇！你唔畀我做就話我唔得，對我好唔公平囉！後來當時嘅經理人同我爭取到「辣薑」呢個角色，好感激，連編劇都話由始至終只Cast你一個，冇諗過要搵人代，冇Second Choice。（明日待續）

Profile

英文名：Ben

年齡：45歲

入行經過：1989年加入無綫電視，成為第15期藝員訓練班青少年大使旁聽生，早期主持兒童節目包括《閃電傳真機》

演藝生涯高潮：1995年至1999年演《真情》中容向海一角深入民心，「阿海」更成為其暱稱；去年演《潛行狙擊》鄧國彬（辣薑）一角，演黑幫臥底掀起熱話

獎項：《萬千星輝頒獎典禮2011》「最佳男配角」

作品：電視劇《真情》、《巾幗梟雄》、《潛行狙擊》及《雷霆掃毒》等；電影《全城戒備》及《奪命金》等

口述：黃智賢

筆錄：韋芷茵

黃智賢浮沉多年，靠一句「捱咗佢啦」自勉，終於捱出頭，更膺「最佳男配角」，值得嘅！

黃智賢飾演「辣薑」入型入格，角色入屋。

「阿海」跟「彩瑤」的一段情，當年為《真情》迷津津樂道！

拍《真情》令黃智賢人氣急升，同時得到一班朋友。

曹永廉孖住寸人：我哋好合拍

曹永廉與黃智賢早於入行前認識，後來加上鄭嘉穎，「三兄弟」成為老死，黃智賢與鄭嘉穎更成為波友。曹永廉笑言跟黃智賢經常孖住周圍寸人：「我哋好合拍，朋友見到我哋都唔知好嬲定好笑！」雖然並非經常聯絡，但他們一傾電話就傾天光！當年黃智賢由兒童節目轉去戲劇組，曾經歷一段真空期，兩個好兄弟都很替他擔心，慶幸其後他接拍《真情》後，事業一帆風順，曹永廉更預祝他今年冧莊「男配」！

鄭嘉穎（右）得獎，興奮地與黃智賢相擁。