陳奕迅被彈脫節 風騷檢討

陳奕迅（Eason）與容祖兒等歌手前晚出席頒獎禮，兩人各掃4.5獎成男、女歌手大贏家，Eason攞獎時竟自爆歌曲被歌迷嫌out，但未有因而影響心情，於頒獎禮上繼續風騷；再度O嘴的祖兒笑言會苦練心形嘴。

陳奕迅在台上high爆，陶醉扭籮露腩！

Eason經常囊括各大獎項成為大贏家，前晚他出席「微博之夜——SINA MUSIC樂壇民意指數頒獎禮2012」時，Eason竟自爆被彈：「最近有歌迷話我啲歌愈嚟愈型、愈嚟愈前，仲話我2005、2006年嘅歌好正，近年就有啲脫節。但我又唔覺喎，我會返去檢討嚇，例如聽多啲農夫嘅歌。」雖然他自爆被批評，不過無損心情，演唱時更風騷露腩。

「抨抨嚇就習慣」

受訪時Eason表示有睇《勁歌》頒獎禮：「我睇王菀之（Ivana）拎獎嗰度。（有冇O嘴？）冇。」提到Ivana拎獎被抨擊？Eason認為任何事都會被抨擊，記者說如他奪獎沒有人會抨擊？他即開心的說：「咁講我好開心，但我唔會做特首，抨抨嚇就慣。（大家唔敢拎大獎？）話話嚇就慣，有邊個唔會畀人話？出得嚟行預咗畀人彈！」

奪四個半獎再成大贏家的祖兒，演唱時稍露事業線。

祖兒拿下我最喜愛國語至尊大碟時興奮O嘴，在旁的Twins與林峯為之爆笑。

對於陳慧琳提議取消「亞太」獎項，他說無甚意見，更貫徹其搞笑本色，自言是「一條又長又幼又倔頭，但冇攻擊性嘅軟膠草」。提及HMV申請破產，Eason直言感可惜，笑言自己後悔開製作公司，是否生意難做？他說：「唔難做，淨係做我一個。」暫時他不打算簽其他人，但HMV事件令他想到另一方法經營公司。

謝安琪唱出得獎歌曲。

鄭融又唱又跳。

「拎獎拎到唔唱」

天後容祖兒奪「我最喜愛國語至尊大碟」時表示愕然，在旁的蔡卓妍笑她：「你今次唔好O嘴喇！」祖兒說：「我今次真係O嘴，你都知做碟唔慌賺，仲會蝕，我啲國語碟都『領領哋』嘢！」受訪時祖兒澄清替Ivana奪「金曲金獎」開心：「冇唔抵得，唔知點解會O嘴，但唔記得講過乜。」

祖兒又指不覺無綫跣Ivana，提到沒有人敢拎大獎？她認為最緊要歌手問心無愧：「我拎到唔唱添呀，唔會唔拎。」有傳關心妍奪《十大中文金曲》頒獎禮女歌手大獎，祖兒表現錯愕，並笑說：「我諗我唔好擘到個口咁大，OK嘅，我試嚇練心形嘴。」而鄧紫棋亦替祖兒澄清，指當時祖兒說：「我諗Ivana都冇諗過自己拎金，語氣冇負面意思。」

文：音樂組

上一則

下一則

.陳奕迅被彈脫節 風騷檢討
http://veryy8.blogspot.com/2013/01/blog-post_9022.html