滾熱辣
患高血壓妊娠糖尿 超磅湯盈盈隨時早產
2013年01月18日
延續生仔熱潮，去年 11月奉女與錢嘉樂成婚的湯盈盈，蛇年將會打頭陣生蛇女，預產期 3月中。不過日前本刊獨家拍得這位思想西化的「非常星媽」，挺住 8個月巨肚，竟以時速 140公里在西貢飆車。她在新劇《老表，你好嘢！》憑導遊「惡珍」上位，估唔到現實中揸車同樣夠辣。
飆車外，一向為食的湯盈盈，佗 B期間過度進補，因而超磅患上妊娠糖尿兼高血壓。還有個多月便生得的她，隨時早產。
自從 8月公開宣布有 B，湯盈盈為新劇《老表，你好嘢！》及《衝上雲霄 II》埋尾後，便停工專心養胎。近日，老公錢嘉樂忙於為劉德華新戲《風暴》開工，一向好動的湯盈盈，即使佗住 8個月、接近 50吋的巨肚，依然日日揸車四圍去，甚少長留家中。
長命斜狂踩油
月初，本刊記者一連數天觀察，發現每天都外出的湯盈盈，揸車依舊狠辣，時快時慢唔在講，在三線行車時，更左穿右插。本月 5日下午三時，她獨自從匡湖居寓所駕駛平治房車外出，到尖沙嘴咖啡店嘆下午茶。起初她以時速 70公里在平路駕駛，但過了迴旋處上南圍方向時，她突然車神上身，在限速 70公里的「長命斜」，竟狂踩油以時速 140公里駕駛。不消五秒，記者連她的車尾燈都見不到。上斜後向大埔仔方向行車時，她卻忽然減速至 70公里正常駕駛。
之後，出九龍方向一段路，雖沒有再超速，湯盈盈的車子卻在車道中左穿右插。在臨近尖沙嘴彌敦道及科學館道的分叉路口，她突然向左 cut線，差點撞石壆，嚇得記者一額汗。湯盈盈挺住巨肚揸車已經好危險，加上駕駛態度及技術，確實令人擔憂。
揸車搵命搏
老公錢嘉樂鍾意賽車，湯盈盈揸車亦同樣狠辣。記者親眼目睹她在西貢上大斜路時，踩行油以時速 140公里上斜，比起路面規定行的 70公里，足足快一倍。另外，她亦喜歡在路面左穿右插（小圖），更試過連 cut三線。
要戒糖戒肥
湯盈盈飲食習慣亦有待改善。據知她一向偏愛食麵包、蛋糕等高澱粉質食物，加上專登留港照顧她的湯母，不時煲雞湯及燉補品，令她在短短 3個月間，體重急增 30多磅。一個月前她到尹鎮偉婦科醫生作產檢時，發現她超磅之餘，還患了妊娠糖尿兼高血壓。知情者透露：「醫生見到個報告都嚇親，問佢食咩搞到呢幾個月之間重咗咁多？仲有埋妊娠糖尿病。其實湯小姐有 BB初期，血糖指數差少少就超標，醫生建議咗份營養餐單俾佢，叫佢少食內臟、動物脂肪同重澱粉質食物。不過佢應該冇聽醫生吩咐，冇戒口。雙高（高血糖高血壓）對媽咪同對肚裏面個 BB都有不良影響。湯小姐一直講想順產，不過睇情形有機會要開刀，仲有早產危機。」經醫生再三警告下，以往見乜食乜的湯盈盈，終於肯的起心肝戒甜戒澱粉。記者亦曾目睹她獨自買餸，所揀餸菜都係魚類和蔬菜居多。
撲定買北角樓
老公忙拍戲不在身邊，湯盈盈近日開始為 BB購置用品及新衣，同時她為了新居入夥事宜相當頭痕。早前，本刊曾拍得佗住 B女的她，走勻港九睇樓。她專攻西半山、九龍塘及何文田等名校區的豪宅，可見她早有計劃，為愛女將來升學籌謀。她最終意屬鄰近父親北角豐林閣一帶的豪宅。
一港島區地產經紀表示：「盈盈都搵過兩、三個地產代理睇樓，港九新界佢都有睇過，都係過千呎。不過早個月佢再睇多次北角海景台嘅向海大單位，佢好鍾意，但覺得個價揦脷咗啲。個業主開價$1,600萬，盈盈預算只係$1,400至 1,500萬左右，雙方仲還緊價。不過最近個市『𣲷』成咁，個業主都肯降到$1,450萬，應該好快成交。」早前錢嘉樂講過希望在老婆臨盆前能裝修好新愛巢，看現時進度，相信至少要待湯盈盈誕下女兒才能入夥。
周二（ 15日），本刊在又一城訪問湯盈盈。對於以 140公里行車，湯盈盈一直低頭不語，同行的好姊妹梁靖琪卻睩大雙眼，反應極大說：「嚇！佢會開快車？」本刊記者再問她超磅問題，此時湯盈盈才肯開聲回應：「其實好正常，個個大肚婆都會有啦。（咁你係咪有妊娠糖尿同高血壓？）呢樣我唔會回應啦！」最後，問她是否睇中海景台單位，她笑著說：「你哋自己 check啦，呢個我唔會答你！」
肥 B要開刀
湯盈盈想順產生 BB，不過她超磅兼患有妊娠糖尿同高血壓，改用剖腹生 B的機會較大。
婦產科專科醫生靳嘉仁說：「孕婦血壓高，若果同時有齊妊娠毒血症的徵狀，孕婦有機會中風爆血管，或抽筋，亦會唞唔到氣缺氧。當大部分氧氣被抽到腦部及心臟， BB會出現缺氧。
通常 28周的孕婦會做內糖測試，若孕婦患上妊娠糖尿， BB的體重會較正常 BB大，導致生產有困難，亦有機會早產。若然 BB體重達 4公斤以上，難產風險會高咗，醫生會要求孕婦開刀。」
至於大肚婆揸車，靳嘉仁醫生表示：「孕婦揸車冇問題，不過超速揸車就好危險，雖然 BB有羊水保護，可以承受撞擊力，但如果衝擊太大，就好易有大意外。」
.[忽然1周]患高血壓妊娠糖尿 超磅湯盈盈隨時早產
http://veryy8.blogspot.com/2013/01/1-1_18.html
