娛頭
4月 5日攤牌分手 苟芸慧𠝹入郭富城 熊黛林：唔會再忍！
上個月尾，熊黛林宣示「正印城嫂」主權，到紅館與郭富城世紀一握趕苟，以為「富黛戀」風波得以平息，豈料事情急變！
據了解，郭富城於四月五日，與拍拖七年的熊黛林正式分手。有指兩人之前已經冷戰了一段時期，雙方經常為結婚問題無法有共識，城城一年推遲一年，加上苟芸慧介入，成為分手炒大鑊導火線。
傷心棄城，喊到眼腫的熊黛林，近日不時向身邊人訴苦，更決絕表示：「今次唔會再忍！」
發脾氣搬遠
因為合作拍 MV，郭富城與熊黛林○六年撻着愛火，亦因為另一個 MV，城城𥄫中女主角苟芸慧，令到與熊黛林難逃七年之癢惡咒，真真正正宣告玩完。
上個月，熊黛林兩度現身紅館，支持男友開演唱會，更上演了一幕萬人前握手，當外界以為肥苟這棵爛桃花已經被劈斷，但「富黛」感情早存暗湧。
據知，在過去半年，城城同熊黛林的關係已不再如前恩愛，兩人各有各忙，因工作聚少離多，而早前熊黛林因父親過身大受打擊，城城不但未有加倍相伴安慰，還要專心排練演唱會，兩人要暫停見面，令熊黛林更感孤立無援，甚至由原本同「城府」距離只有兩分鐘車程的大坑寓所，搬到去要廿分鐘車程西灣河嘉亨灣，向男友發脾氣！
冷戰兩個月
三月十七日，城城首場演唱會後被記者問到女友熊黛林時，他公開說：「呢排專心工作，好多朋友都好耐冇見！」
據知這段冷戰期維持接近兩個月，其間兩人沒有見過面，只間中電話和 Whatsapp維繫感情。
「嗰段時間佢哋只係冷戰，仲未去到分手咁惡劣。至於傳出城城同苟芸慧搞埋，其實阿 Lynn都有懷疑，覺得有啲嘢似層層；女人嘅直覺好準，佢覺得一個男人唔會失驚無神變得冷淡，但阿 Lynn都忍住，佢唔想喺開演唱會時間問城城關於肥苟啲嘢，唔想影響佢做騷。嗰晚城城突然主動當住成萬人同佢握手，阿 Lynn都以為雨過天青。」知情者說。
城城與熊黛林之間的問題，並不單只肥苟。今年三十三歲的熊黛林，一直希望名正言順做合法城嫂，做人老婆生仔，偏偏城城將婚期一拖再拖，無了期，兩人為結婚問題有過不少次爭執，始終無法得到共識。
拖得就拖
過三張的熊黛林，近年恨結婚恨到出口，可惜城城一於少理，總有藉口，拖得就拖。
冇夫妻宮
07年，城城被追問與熊黛林感情事時表示：「高人話我冇夫妻宮，人哋拍拖會諗結婚生仔，我一啲都冇，咁耐以嚟，結婚呢個諗頭喺我腦度閃一閃都冇，我亦唔恨生仔。」
不婚宣言
08年，城城到廣州宣傳演唱會，對住內地傳媒堅決說：「我不結婚了。我已 43歲，我的生命一直被工作佔據，我仍有心願未了，例如音樂劇，完成先會考慮結婚。」
四年期票
11年， 46歲的郭富城與熊黛林屢傳婚訊，城城接受訪問時表示：「我係工作狂，仲想喺事業上衝刺，希望 50歲前啦，婚後生一對小朋友。」
暗示情已逝
等到城城做完演唱會，兩人終於有機會面對面講清楚，熊黛林亦唔想再疑神疑鬼，於是將城城同肥苟的緋聞搬上枱傾。
「其實只要城城講一句絕對同佢（肥苟）冇嘢，阿 Lynn都會選擇相信。好似當年俾人撞破佢同 Mango（王秀琳），城城一口咬實話冇嘢，咁阿 Lynn都肯信；但今次佢唔敢講完全同肥苟無嘢，認埋佢哋係好朋友，仲幫個肥苟口話阿 Lynn講嘢太盡，阿 Lynn梗係㷫啦！所以阿 Lynn都話：『今次唔會再忍！係時候要醒。』」熊黛林身邊人說。
據了解，四月五日熊黛林於南京拜完山返港，與城城通電話期間又吵大鑊，終於嘈到分手。翌日，熊黛林在微博留言，暗示情變，她貼上兩隻愛犬相片，留言：「有你們陪我，什麼檻兒都過得去」。
跟住在四月八日再寫了另一個微博：「以為，總是以為，以為你可以，以為你可以堅強，以為你什麼都不介意，可是，那些，早已漸漸的深深的烙在了你的心裡，也許你只是後知後覺。」這番話明顯是寫給自己，當中的你，正是熊黛林本人。
富黛情興衰
郭富城熊黛林拍拖七年，感情時好時壞，多次傳出好事近，其間亦因為背住女友偷食感情亮紅燈，被指𠝹入的苟芸慧，更成為分手導火線。
攻城賀壽
07年郭富城生日，淩晨時分，熊黛林以女主人身份「攻城」賀壽，逗留了五小時。
肥苟𠝹入
月前，郭富城被指去年十月拍廣告 MV時，與女主角苟芸慧撻着，事後熊黛林公開暗寸「肥苟」是「爛桃花」，又現身城城個唱宣示主權，來者不善，「肥苟」孖住樂易玲去城城個唱踩場，爆發「苟熊大戰」。
甩拖喊腫眼
有指城城今次順勢攤牌，急着回復單身，是對苟芸慧有所表示，讓對方知道他已重新「掛牌」！
另方面，分手後的熊黛林終日匿埋屋企，有身邊人更指她不時喊到眼腫，無法開工，七年情不易放低，身邊朋友、同事唯有要輪流陪住；甩拖憔悴，熊黛林非必要外出，必定戴住黑超，遮住一對腫眼。上星期三（十日），即使她悉心打扮出席華鼎獎，依然難掩愁容，臉上艷光大減。
星期一（十五日）晚，熊黛林由朋友陪同到中環 shopping散心，現場所見，她總是無厘心機，苦口苦面。
之後轉到北角與多幾個朋友食飯，雖然有朋友氹開心，但熊黛林依然悶悶不樂。
在離開時，記者上前問到熊黛林最近是否心情不佳，她先愕一愕說：「乜嘢呀，冇呀！（近排係咪同城城有唔開心？）唔知呀！（有消息話你哋分咗手？）我唔講喇，唔好問我啦！」面色都變埋的熊黛林，即時返上車逃避記者追問。
同日，城城就在灣仔舉行演唱會慰勞宴，被問到分手一事，他皺一下眉，然後再扮聽唔到，一句說話都無講，之後坐上紅色法拉利，轟一聲離開。
聞富黛分手笑曬
苟姑娘週二出席《仁心解碼 II》記者會，聽到記者問到城城同熊黛林分手一事她表現開心全程笑住答。
記：呢排有冇同城城聯絡，佢同阿 Lynn分咗手知唔知？
苟：呢啲係人哋私人嘢我唔係好清楚。
記：會唔會慰問佢（城城）？
苟：叫小美慰問囉！
記：驚唔驚之前同城城傳過緋聞，令人覺得你係第三者？
苟：人哋私人嘢我唔會講。
記：而家佢回復單身，有冇發展機會？
苟：（笑）我同 TVB咪發展緊囉！
七年關口
人會變，圈中情侶拍拖，要面對的考驗比一般人更多，無論幾多個七年，一樣話散就散！
鄭中基、蔡卓妍
03年尾，鄭中基與阿 Sa拍攝《追擊八月十五》撻着，二人拍拖三年， 06年在洛杉磯秘婚，直至 10年才被傳媒揭發，同時二人宣布離婚，結束七年情，更有指阿 Sa背住鄭中基與 William暗交一年。
mailto:nextb@nextmedia.com
. 4月 5日攤牌分手 苟芸慧𠝹入郭富城 熊黛林：唔會再忍！
http://hittt.blogspot.com/2013/04/4-5.html
