八卦嘢(八卦野) [八卦o野][日日818] : 打內戰：閂埋門玩《巨聲 4》　蕭正楠　梁烈唯內定入圍

2013年4月18日星期四

打內戰：閂埋門玩《巨聲 4》　蕭正楠　梁烈唯內定入圍

探熱針

打內戰：閂埋門玩《巨聲 4》　蕭正楠　梁烈唯內定入圍

無綫已停辦兩年的《超級巨聲》，今年再度復活！三屆《巨聲》只得林欣彤及許廷鏗彈得起，與其嘥力捧新人，無綫變招，索性閂埋門搵藝員參加比賽。自己友玩曬，據知備受力捧的蕭正楠、梁烈唯，已坐定粒六入圍。

捧番自己友

內地電視台搞歌唱比賽節目，收視高，廣告財源滾滾，無綫決定有樣學樣，抄最近被轟賽果造馬的《我是歌手》條橋，搵藝員參加比賽。近日藝員科已經開始廣派表格，日內將會舉行試音。

「之前公司簽落大班巨聲幫，結果搞到唔少三、四線藝員無嘢做，早排班阿頭開會，藝員科高層提議捧番自己友，仲講到明參加過巨聲嘅唔可以再參加，留番啲機會俾其他藝員。大家都覺得 work，話曬啲藝員熟口熟面，佢哋比賽唱歌，隨時有驚喜，會幫到收視。」無綫內部人士說。

據知藝員科已廣發短訊，通知有興趣的藝員攞參加表格，日內舉行試音，由藝員科和綜藝科的高層負責，挑選十五名藝員參賽。

「做哨牙仔出曬位嘅蕭正楠，成日想揸番咪做番歌星，佢一早內定有份入圍；有高層話梁烈唯唱歌似陳小春，演得玩得，亦預咗佢一份。」除了高層心水人選，有太陽娛樂黃栢高撐腰的沈震軒和唱家班出身的胡定欣及港男羅天宇等亦會參賽。

沈震軒唱得跳得，不時被安排在無綫騷唱歌。

唱過電視劇主題曲的胡定欣，曾經自薦給唱片公司，無綫搞歌唱比賽，她亦有報名參加。

內部報名表

庾澄慶做導師

藝員比賽，之前的巨星評判陳潔靈、趙增熹、陳奐仁全部冇得留低；無綫有意邀請《中國好聲音》的庾澄慶及陳奕迅做星級導師，並繼續玩全民投票，由觀眾做評判。

「哈林（庾澄慶）嘅身價比起幾年前做《味分天下》貴咗好幾倍，不過老細肯俾錢，依家睇佢個期得唔得！」無綫內部人員透露。

記者致電音樂組監製麥鎮東求證，他承認正在招募藝員參加，日內將進行試音，但比賽形式仍在商議中，未全盤確定。