八卦嘢(八卦野) [八卦o野][日日818] : 志偉 60大壽派銀紙　呂慧儀狼搶

2013年4月18日星期四

志偉 60大壽派銀紙　呂慧儀狼搶

探熱針

志偉 60大壽派銀紙　呂慧儀狼搶

曾志偉六十大壽連環慶祝，十四號正日獨霸迪士尼三個遊樂場，之後直落食飯喪唱粗口歌爆醉樂園！其實由今年一月開始，為迎接花甲之年，志偉已跟圈中老友劉嘉玲、吳君如、梁家輝、張學友等先後飛外地預祝慶生。

上週三，無綫大破慳囊，豪掟四百萬為他老人家在會展舉行《志在高興志偉大派對》，由於唔可以貓住出鏡，做完節目後再拉大隊轉場補數飲夠；據知當晚有朋友贏大錢，拎住大疊一千蚊紙周圍派，引得一班無綫小花旦發狂搶，其中跟志偉傳過緋聞的呂慧儀最狼，搶極唔夠。

總之又食又拎！

（設計對白）

志偉在台上帶唱粗口歌，彭健新伴奏，之後陸續叫人上台加入。

上週三的 after party，志偉做咪霸跟孫楠唱唔停，而江欣燕（右二）亦跟巫啟賢（左一）猜醉枚。

明知好戲在後頭，邱淑貞同上山詩納（黃衫）先安排囡囡返屋企，之後再留守 party繼續癲。

吳君如一家大細在十一點前已經走人，冇加入粗口大合唱。

幫人慳錢

週日（四月十四日）下午四點左右，一班新鮮娛圈父母包括錢嘉樂、湯盈盈、洪天明、周家蔚，以及人母邱淑貞、上山詩鈉等集齊在迪士尼酒店大堂，等坐樂園專車載往專為志偉壽宴封場的三個遊樂區玩機動遊戲。玩到差不多七點，一班人又浩浩蕩蕩移師酒店宴會廳，開懷喪劈。

生日正日在迪士尼度過，全因壽星唔想一班圈中老友破費。

「志偉講明六十歲生日要玩足一年周圍去，第一站係同屋企人去日本，上個月又約（劉）嘉玲、（吳）君如一班朋友去馬爾代夫，之後再同張學友、梁家輝、邱淑貞同埋江欣燕去咗蘇梅，至於陳國強、阿倫嗰班就去泰國，個個朋友都係自費，志偉本來想叫盈盈嘉樂嗰班後生嘅再去日本，不過佢哋要湊 BB，加上有小朋友開支大咗，志偉唔想佢哋使錢，所以留喺香港慶祝。」知情者說。

阿佘唔肯上台唱歌，俾志偉用粗口問候，仲大爆阿佘講粗口好流利。

梁家輝同老婆再賀志偉，當晚他跟壽星一樣醉到不省人事，嘔到跌地。

人母孟瑤當晚 high爆，周圍搵人影相，但唔及學友，尾段飲到成件 tee都係紅酒。

人母湯盈盈仍然玩得，在場內大踢志偉的「何 B仔」留影。

同志偉傳過緋聞的呂慧儀，除連出兩場生日 party外，更在場內跟紙板志偉瞓埋一張床。

爆粗鬧阿佘

陪玩鐵腳苗僑偉三哥三嫂，加上大堆緋聞女友包括張美妮、呂慧儀、葉蘊儀以及關淑怡等陪住壽星慶完又慶，出爐影帝梁家輝尤其興奮，白酒紅酒再溝威士忌杯杯清，嘔到跌地。

愈夜愈癲，犯禁在場內煲煙煲到煙霧瀰漫，壽星公之後上台帶頭唱粗口歌，又爆粗鬧有份到場的佘詩曼唔肯唱，玩到淩晨兩點才陸續散。醉到不省人事的志偉則留在迪士尼瞓一晚，翌日才離開。

「志偉開 party啲人一定玩到癲，上星期三喺尚品嘅 after party，志偉有朋友贏咗錢，突然間拎咗二十萬一千蚊紙出嚟派，成班女仔衝埋去搶，呂慧儀最狼，搶完又搶。志偉啲朋友真係有鋪派錢癮，試過同一班港姐去慈善 ball，有朋友啱啱喺澳門贏錢，個個女仔都分到兩萬蚊，所以有咁多人鍾意黐住志偉玩。」知情者說。