八卦陣
袁志偉苦練新聞《葵花寶典》
TVB上週六《新聞透視》原定播放探討貨櫃碼頭工潮嘅「碼頭風雲」，臨出街前突然被抽起，再次引來「靠攏權貴、自我審查」嘅質疑。事件令到新聞部員工非常不滿，矛頭直指人稱「花哥」嘅新聞部揸 fit人袁志偉。
一名不願透露姓名嘅新聞部員工話，抽片事件只係無綫新聞自我審查嘅冰山一角，袁志偉早已進行長期部署。今年初，花哥向員工提出，部門嘅《專業準則及道德守則》得英文版唔足夠，於是藉翻譯中文版為名，輪流搵編輯、記者討論《守則》，席間尤其強調第四條「報導須尋求正反雙方的意見」，又話無綫新聞必須客觀持平，保持 TVB新聞公信力雲雲。
自此之後，花哥經常揸住呢本《守則》抽秤記者編輯嘅報導，「碼頭風雲」正正因為無訪問工聯會，被佢以「角度不夠全面」抽起。為咗要「平衡各方意見」，報導泛民反對政府嘅聲音之外，佢仲落柯打話逢親有「愛港力」支持政府嘅活動，必須派員採訪。
上週二，民建聯公布一個相當唔科學同偏頗嘅佔領中環民調時，記者好「聽話」咁按《守則》搵佔中發起人兼中大副教授陳健民回應，但佢呢一番「平衡意見」最終被花哥下令抽起。佢話 TVB不嬲係咁樣報導民調，唔明白記者點解依家先嚟質疑人哋嘅研究方法喎。其實，睇番《守則》第四條仲有話「向我們表達意見的一方，我們理所當然要深究他們的動機」，對《守則》推崇備至嘅花哥算唔算係自打嘴巴？
《基本法》當審查秘笈
除咗將《守則》刻意曲解為新聞《葵花寶典》，自行去勢、犧牲新聞編採自由，袁志偉手上仲有《基本法》呢一本審查新聞秘笈。據了解，新聞部早排準備製作一連五輯嘅政改系列報導，編採過程中花哥相當緊張，記者想隻古仔出到街，要先同佢辯論古仔提及嘅政改方案符唔符合《基本法》，結果有兩隻古仔過唔到佢一關，可以播出嗰三輯報導基本上跟隨北京路線。
早排建制派同喬曉陽會面，幾日後喬老爺發言全文公開。有記者爆料，花哥喺中聯辦公開全文前三個鐘已率先到手，報導呢單新聞時更強調「本台取得當日講話全文」。有員工事後私下討論時覺得事有蹊蹺，相信花哥同中聯辦關係非比尋常。
愛字頭團體內訌
愛字頭團體暴力踩場已成為常態，前排踩人場嘅通常係「愛港之聲」，但上星期六舉行嘅佔領中環論壇，消失咗一段時間嘅「愛護香港力量」由陳淨心帶領出山，著曬紅白色風褸，風頭蓋過愛港之聲。
由於老闆高達斌係講者之一，所以愛港之聲成班人好乖咁坐喺度，行動部部長陳廣文都無行動，淨係跟大會規矩問咗一條問題，連之前成日俾佢哋針對嘅戴耀廷喺會後都話覺得佢哋幾和平理性！
高達斌話，其他團體做任何嘢佢無權幹涉，擺到明同愛港力劃清界線。陳廣文後來將陳淨心醜態畢露嘅報導放咗上網，兩大組織隨即喺網上展開罵戰，淨心 BB過咗
一日之後都「仍然氣難下」，睇嚟佢哋都有排鬥。
民建聯揦西政治騷
民建聯星期日搞咗場 H7N9政治騷，去深水埗一條無乜人會經過嘅後巷清潔，未開始之前已經有街坊篤爆佢哋係做騷，叫佢哋「係就日日嚟啦」。不過佢哋一於少理，影完大合照之後殺入後巷。身嬌肉貴嘅蔣麗芸（後排中）不時話好臭，兩名年輕立法會議員就通渠通咗好耐，點知愈通愈臭，最後都係搞唔掂話要 call政府嚟搞，成個過程歷時十幾分鐘就收工。做騷都咁揦西，市民防疫，當然唔能夠靠民建聯啦。
AO懶理佔領中環
立法會本週三開始辯論財政預算案，早前已預告拉布嘅社民連同人民力量決意出手，藉以爭取全民退休保障，截至本週一，立法會秘書處已收到近八百項修正案，由於早前喺立法會通過嘅臨時撥款只夠維持政府運作到五月底，一旦拉布拉到六月，政府無錢用，運作勢必癱瘓。不過，有高級政務官（ AO）私下透露，碼頭工潮未拆掂，限奶令本週三又提交立法會表決，依家啲 AO全部忙於拆呢三大政治炸彈，當中以拉布最為棘手。佔領中環？無人得閒理喎。
. 袁志偉苦練新聞《葵花寶典》
http://hittt.blogspot.com/2013/04/blog-post_18.html
