專黐有錢人 朱璿夜陪大陸已婚富豪

封面

專黐有錢人　朱璿夜陪大陸已婚富豪

最近朱璿出鏡率超高，上週四劇全中，由下午重播的《隔籬 7日情》，一路殺到去夜晚九點半的《仁心解碼Ⅱ》，即使朱璿連廣東話都未講得正，不過洗腦式出現已成功令宅男捧佢為朱璿 BB，升呢與陳嘉桓、陳法拉等睇齊。

不過 08年華姐奪冠的朱璿，點會只滿足於做宅男女神。法國留學回流的朱璿，一直努力不懈向上遊，除了跟家族資產過百億、年僅 30歲的徐楓細仔湯珈鋮傳緋聞外，上週更被本刊直擊朱璿陪內地富豪宵夜飯局。努力拓展人脈，朱璿絕非池中物呀！

26歲的朱璿出道 5年，曾說：「如果我現實啲，可能已經發咗！」，她亦承認志不在電視台：「世界咁大，就算畀曬啲主角、大明星我做，但日日只係做，未出去睇過個世界，我死咗都唔甘心。」

宵夜飯局

用電視台做踏腳石，朱璿反而更努力去擴闊人脈，上週三（ 10日），朱璿出席完曾志偉的 60歲大壽派對後，便由在內地以經營哥爾夫球用品及做紅酒生意起家、現住市值過 8,000萬的中半山富滙豪庭的北京富豪李本勝，出動豪華 7人車接載，跟歌手巫啟賢一齊到銅鑼灣橋底辣蟹宵夜飯敍，一行人由夜晚 11點半一路傾至淩晨一時始離開，李姓富豪更叫司機車埋朱璿到位於將軍澳的首都寓所。

熱衷認識富豪，其實朱璿 09年已極速被住山頂的富貴名導演楊凡睇中，於其執導的電影《淚王子》中擔正做女主角，與張孝全做對手。雖然套戲令朱璿獲提名「最佳新演員」，但最大收穫相信係經楊凡介紹下，朱璿成功識到身家過百億的湯臣集團副主席、一代俠女影後徐楓的兒子湯珈鋮，朱璿 11年跟湯珈鋮更結伴去睇五月天演唱會任傳媒影相，似足女友。

上週三（ 10日）巫啟賢（小圖）偕內地富商老友李本勝出席曾志偉的生日派對，走時兩人專登等埋朱璿，但朱璿說：「我嗰日第一次見佢哋。」

豪車接載

之後朱璿和巫啟賢成班人齊齊上了李本勝價值約 50萬的七人車去宵夜，而李本勝的太太 BoBo（左小圖）原來亦全程傍實朱璿，十足貴賓式款待。

一行人於銅鑼灣橋底炒蟹食宵夜，至約淩晨 1時，高人一等的朱璿與全頭白髮的巫啟賢一直有講有笑。

李本勝住在市值超過 8千萬的中半山富匯豪庭，月租亦要 12萬起跳。

愛識名人炫富

內地富商李本勝，為北京匯豐洲投資有限公司董事長，業務包括紅酒生意及哥爾夫球用品生意，又於北京投資哥爾夫球場，亦有在港開設高檔紅酒銷售公司，平日愛結識圈中人，尤其與巫啟賢更稱兄道弟，經常結伴外出、經常中港兩邊走的李本勝，現更居於市值超過 8千萬的中半山富匯豪庭。

身為董事長的李，閒時愛在微博上炫富，他經常上載同明星的合照外，亦經常大 show名表、紅酒等。

李雖為已婚人士，但微博中所關注的大部分為女性，其中關注不少圈內女星，如曾同林峯拍拖的潘霜霜和曾跟黄宗澤傳緋聞的倪晨曦，亦被佢「關注」。

認百億富二代做契哥

出道 5年的朱璿一直零緋聞，唯一在 11年被拍得與一代金馬影後徐楓之子、湯臣集團太子爺湯珈鋮睇騷，湯珈鋮之父為湯臣集團創辦人湯君年，家族資產超過百億，現年 30歲的湯珈鋮一直被視為城中極級筍盤，雖然 11年時有傳他秘密於小島結婚，但湯極速於自家微博內否認，堅持單身。

徐楓細仔湯珈鋮

11年朱璿與湯珈鋮結伴睇五月天演唱會，事後二人堅持只是契兄妹關係。《蘋果日報》圖片

投資開戲

由湯珈鋮揸 fit的大國豐臣娛樂公司，經常搞演唱會和投資電影， 06年邀得張栢芝拍電視劇《周璿》，金馬影後徐楓亦有探班。

冧掂湯珈鋮

朱璿雖然志不在電視台，但每年台慶，朱璿仍會悉心打扮亮相， 11年一套 deep V晚裝更加攞命。《蘋果日報》圖片

據知朱璿埋到百億鑽石王老五身邊，原來早年留學法國的楊凡是伯樂。由於朱璿樣靚兼在法國讀戲劇表演回流，一口流利法語對答有禮，故甚得楊凡老友徐楓姐姐歡心，於是徐再將朱璿介紹給乖仔認識，一心撮合乖仔跟朱璿行埋，雖然事後朱璿堅決否認拍拖：「佢（湯）只係有演唱會飛請我去睇，我哋冇拍拖，佢亦冇追我，再繼續傳緋聞，我驚以後嫁唔出。」只肯對外認做湯珈鋮契妹的朱璿，已踏出向上遊第一步。

「啲 feel未到」

對於密會內地富豪，朱璿週一（ 15日）在電話中以半鹹淡廣東話說：「我嗰日係同 BoBo（富豪老婆）聚舊咋，我哋 10年做婚紗活動時識嘅，我唔識佢老公（李本勝）同巫啟賢㗎。」

對於跟湯珈鋮的緋聞，朱璿續說：「我當佢契哥咋，一年都係食幾次飯，佢都成日唔得閒，其實我揀男友唔一定要有錢嘅，可能啲 feel未到啦，我都 3年冇拍過拖！」朱璿個 phone list又可以多個富豪電話啦！

華姐粵語多蝦碌

無綫花旦唔夠人，連帶一班廣東話都未講正的華姐都要急急推上熒幕，除了朱璿在《女警愛作戰》中鬧翟威廉時幾乎一句聽唔明外，其餘新晉華姐包括岑麗香、苟芸慧等，除咗講嘢唔正，中文更加水皮，結果經常蝦碌爆笑。

華姐通病係講嘢唔正，朱璿亦唔例外，前週《女警愛作戰》中一幕，朱璿要好似機關槍咁開口鬧人，曾被觀眾話聽唔明佢講乜，睇嚟佢要喺廣東話再下苦功先得。

TVB缺人加上朱璿受網民好評，上週一晚有四劇《隔籬七日情》、《愛．回家》、《女警愛作戰》、《仁心解碼 II》均有朱璿出場，洗腦式出現朱璿即變 BB級，而將出街的《情越海岸線》，亦有朱璿份做配角。

岑麗香

我哋𠵱家磨豆腐！（真實對白）

去年岑麗香同苟芸慧綵排台慶環節時，邊做動作邊說「我哋𠵱家磨緊豆腐。」說罷仍不知自己講錯嘢。

苟芸慧

賣奶賣奶，賣到年三十晚。（真實對白）

10年在《千奇百趣香港地》節目中，苟芸慧竟將「賣懶賣懶賣到年三十晚」，讀成「賣奶賣奶」。

朱璿家底好

北京出世的朱璿家庭背景好，父母是法國回流北京的商人，有家底的她中學畢業便到法國留學讀戲劇， 16歲開始在內地及歐洲參加選美比賽，至 08年代表巴黎來港參選國際中華小姐奪冠入行， 10年獲導演楊凡賞識，接拍電影《淚王子》而獲提名金像獎「最佳新人獎」，其後除拍電視劇外，亦曾參演電影《抱抱俏佳人》及《第 6誠》、朱璿入行至今，一直低調甚少緋聞。

08年以一個冬菇頭 look參選華姐，當年香港代表係豬港姐張嘉兒，朱璿輕易奪冠。《忽然 1周》圖片

曾於法國留的朱璿原來亦曾反叛過，手執香煙喺街頭影相。

09年拍攝《淚王子》後，朱璿獲提名「最佳新演員」，同法拉一齊行紅地毯。《蘋果日報》圖片

採訪、撰文、攝影：娛樂組

. 專黐有錢人　朱璿夜陪大陸已婚富豪
http://hittt.blogspot.com/2013/04/blog-post_9674.html