真面目
天後宿敵 鬥足 17年 千嬅陰招趕絕 Sammi
95年一出道即被稱為「翻版鄭秀文」的楊千嬅，由華星年代開始同鄭秀文鬥生鬥死，今年由樂壇轉戰金像獎，終於擊敗對方首次贏得金像影後。
能夠打低大熱門 Sammi，千嬅除了靠「春嬌」食糊，更要多得老闆林建嶽帶挈。據知原本錫曬 Sammi的嶽少，眼見愛將 hea住等嫁，寧願改捧生完仔後積極復工的千嬅。為捧新寵，嶽少更親自向金像獎評審團狂拉票。一心要做影後的千嬅最近亦積極埋杜琪峯堆，一於趕絕死敵 Sammi。
嶽少拉票
攞獎要睇對手，但最緊要係有後台。與 Sammi同屬林建嶽旗下的千嬅，最近坐正成為嶽少新寵，林老闆更親自打畀張同祖等多位金像評審拉票，電話中竟然絕口不提 Sammi。
「嶽少本來好錫 Sammi，點知佢上年話因為要結婚，推咗紅館個跨年檔期，到頭來又冇結到，激到嶽少好嬲！相反千嬅結埋婚都仲咁爛做，生完仔嗱嗱臨復工，早幾日做完割纖維瘤手術就即刻出席金像獎，聽教聽話。而且千嬅好識做，只要嶽少一開聲，即刻仔都唔湊陪老闆應酬，劈酒劈通頂！」知情人士透露。
埋杜 Sir堆
有老闆關照都未夠，千嬅為了同死敵 Sammi睇齊，不惜得罪一手打造「春嬌」的彭浩翔，埋杜琪峯碼頭。知情人續說：「千嬅原本應承咗彭浩翔，拍心口話生完仔復出第一套戲就拍佢套《香港仔》，點知轉個頭就幫杜 Sir套《單身男女 2》開工，擺明剃彭導眼眉！彭導覺得千嬅好冇義氣，同佢嘈過幾鑊，搞到《香港仔》（張家輝、梁詠琪合演）都要就佢延遲開鏡﹗」
同彭導嘈交的千嬅，上台講得獎感受時仲暗寸彭導，公開話自己只係執二攤，唔係彭導的「春嬌」首選。話曬有今日都全靠彭浩翔，千嬅唔好打完齋唔要和尚喎！
Sammi輸咗畀宿敵千嬅，而影帝就由《寒戰》嘅梁家輝奪得，同樣大熱張家輝亦變陪跑。
45歲張家輝 08年憑《証人》首度攞金像獎最佳男主角後，之後再喺 6個影展封王。雖然今年喺《大追捕》表現出色，但影帝飲恨畀梁家輝。不過張家輝依然有價有市，連美國名導演 Michael Mann（曾拍《娛樂大亨》、《盜火線》）都嚟香港斟佢，就知搶手。
10萬一集酬勞
張家輝多人爭，但原來搶贏嘅竟然係無綫，據知張家輝將會繼《天涯俠醫》，闊別 9年後回巢無綫，仲破曬無綫紀錄，肯出 10萬一集酬勞，接 30集長劇，女角仲有機係葉玉卿，據知新劇劇種更會以韓片《陽光姊妹淘》作藍本。
今次搵到影帝回巢，全靠《衝上雲霄 II》監製陳維冠跟張家輝稔熟，無綫先可以請得鬱影帝回巢， 10萬一集在無綫是天價，對家輝在內地閒閒哋 80萬人仔一集計，今次回巢，絕對拍膊頭。
「係好初步咁傾過！」
上週六（ 13日）張家輝失落金像獎後，仍到《大追捕》慶功現場，其間更同傳媒講笑話返無綫。對於回巢一事張家輝向本刊直認不諱，他說：「係好初步傾過囉，因為我知拍劇嘅流程，又唔想公司太就我。（你好似幫陳維冠拍喎！）嘩！邊個話你知㗎？我同佢由《天地豪情》時認識，大家得閒就傾偈，佢同我講過係一套時代片劇種，但未攞實我個期嘅！（聽講無綫出天價 10萬一集搵你？）邊有呀，無綫有幾天價呀？」
DaDa醉街女配角
首次提名擊敗邵音音等多位前輩奪得「最佳女配角」的 DaDa（陳靜），喺後台話最想飲酒慶祝，出名劈得嘅 DaDa講得出做得到，出席喺喜來登酒店搞的慶功宴劈到半夜 3點幾，仲醉到瞓喺大堂。
「春嬌」首選王菀之：唔覺得可惜
千嬅聲稱自己拍《志明與春嬌》係執二攤，據知，係多得「頭攤」王菀之唔接先有機會封後。菀之週一（ 15日）接受本刊電話訪問時，話一啲都唔可惜，「當時我同彭浩翔係有見面傾過，但我嗰排聲帶有事搞到好 down，加上我問過醫生，佢話拍食煙戲會加重病情，所以推咗冇拍。其實千嬅做呢個角色太深入民心，我唔做都唔覺得可惜！」講入屋，晴晴應勁過春嬌。
9年後回巢 TVB 張家輝 300萬天價救亡
最貴大叔
無綫最近興重金聘年過四十的「大叔」演員回巢救收視，今次搵張家輝，肯出 10萬元一集，已冠絕一眾大叔。之不過比起內地劇出價仲差九班。
. 天後宿敵 鬥足 17年 千嬅陰招趕絕 Sammi
http://hittt.blogspot.com/2013/04/17-sammi.html
