大風險 下顎萎縮施大手術 黐脷 G.E.M.：好驚唔敢做

真面目

大風險　下顎萎縮施大手術　黐脷 G.E.M.：好驚唔敢做

出道五年，已經第三次唱入紅館， G.E.M.《 X.X.X live》個唱上週五（ 12日）拉開序幕， 21歲女連續五晚又唱又跳又彈琴又打鼓，不負樂壇小巨肺威名！

16歲出道時， G.E.M.曾被誤會「黐脷筋」，她自爆是天生下顎萎縮搞到口齒不清，要到 21歲發育完全才可施手術糾正，話咁快夠秤， G.E.M.竟然縮沙：「要全身麻醉、喺口腔植入鋼片，我好驚！」

去年底，因為不滿商台評選機制， G.E.M.同經理人張丹聯手杯葛《叱咤》頒獎禮風波。 G.E.M.玩影射，張丹就講到出聲，話唔服《叱咤》標榜播放率用民意做指標，但網上點擊高企嘅 G.E.M.卻女歌手五強不入。言猶在耳， G.E.M.再次企上紅館舞台， VIP tour賣到$1,280、連開五場，一樣全場爆滿一面倒正評。

吹耳仔

背心熱褲 G.E.M. BB fit爆上台，同 dancer勁多親熱舞步，男 dancer就喺身後攔腰挾實再喺耳邊肉緊索（左）， G.E.M.咁都唱得投入好難得。

怒打鼓

又唱又跳再 solo琴技意料之內， G.E.M.再騷鼓技同結他，盡顯才華。

腰幼咪巨

為個唱戒可樂、戒澱粉質，每日練舞又做 gym， G.E.M.自稱，狠操 3個月唔係減磅，純為練氣同結實肌肉，上週五（ 12日）自信心返曬嚟，上台有腰有腳，最緊要係 33D上圍仲喺度，小背心襯黑絲、巨咪襯白背，仲有 deep V中間高衩婚紗裙，盡顯輕熟女韻味。雖然男朋友林宥嘉人不在，全場粉絲當正佢喺度一樣嗌名起哄， G.E.M.唔嬲反而冧笑：「你哋有冇去錯演唱會呀？呢度係唱女仔歌㗎！」

前有巨咪、後有玉背，成熟咗，輕咗嘅 G.E.M.，有實力有睇頭㗎！

前後有

G.E.M.頭場前一日，男朋友林宥嘉剛好在北京完成世界巡迴演唱會最終場，不過 G.E.M.就話唔知「朋友」飛公司點安排。

唔敢開刀

出道時被指咬字不清， G.E.M.多次澄清自己不是 ABC、亦唔係黐脷筋，全因幼時下顎發育萎縮影響發音，根治就要等年滿 21歲做手術，即係今年夠數。

有傳 G.E.M.會在演唱會後大休做手術糾正下顎， G.E.M.就話好驚：「細個一直諗住成年後就做手術，個手術要喺口腔入面開刀，又要唞幾個月冇得工作，真係好驚！我有諮詢過醫生，我個問題唔算嚴重，呢幾年又唔見惡化，開刀梗係免得就免啦！」

激罕淑女

兩年前個唱少女味重， G.E.M.今次歌衫成熟好多，白色仿婚紗長裙上低下高，襯埋 6吋高踭鞋，步步為營。

腸胃炎死頂開騷

獨家後台探秘，開騷前一日，仲腸胃炎又屙又嘔，頂硬上嘅 G.E.M.話上台前靠意志，加埋成班工作人員鼓掌打氣， G.E.M.實行頂硬上。

唯一免費

除咗畀咗$1,280大銀 VIP粉絲開騷前有得進後台， G.E.M.仲免費招呼殘障粉絲參觀合照，好有心。

牙科專家：復原至少一個月！

口腔頜面外科專科醫生李健宏醫生週一（ 15日）亦稱，下顎萎縮手術長手尾：「下顎萎縮問題通常係患者天生發育造成，一般都會對發音同咀嚼食物有影響，但手術就要等到成年後發育完全先適宜做。每個患者施手術前都要經過評估，唔太嚴重可以自己去習慣、糾正發音，嚴重啲就要喺口腔內部開刀，拉長下顎 5mm至 10mm植入鈦金屬片同螺絲固定，手術過程兩個鐘就完成，但係要全身麻醉，復原至少要一個月以上。」

李健宏醫生

採訪、撰文：娛樂組

攝影：林迅景

. 大風險　下顎萎縮施大手術　黐脷 G.E.M.：好驚唔敢做
http://hittt.blogspot.com/2013/04/gem_17.html