搜尋此網誌

2013年4月17日星期三

難敵7年癢 富黛戀玩完

video


難敵7年癢 富黛戀玩完

難敵7年癢 富黛戀玩完

苟芸慧細過城城19年,兩人最近傳因為拍廣告撻著,更指二人已秘交五個月,令人大為愕然。該報道刊出之日(3月18日),缺席城城首場個唱的熊黛林(Lynn),忽然高調拖母去睇城城騷,顯然「聞到陣除」。

城城當晚於個唱上,亦刻意冧女友兼大派定心丸,於台上公開說:「You are my only one」及「I love you」。在握手環節,城城明明已路過Lynn座位,卻刻意回頭跟Lynn揮手。但當晚Lynn係坐普通嘉賓席。而睇完騷之後第二晚,Lynn於中環出席時裝騷時,對於有傳城城上苟姑娘香閨,佢就話:「又嬲?咁咪好唔得閒,明眼人一睇就知係作啦。」

提到城城當眾示愛,Lynn即好緊張咁話:「冇冇冇,邊有呀?揮手就有,佢唱歌咋。」問兩人有否七年之癢?佢話:「我依家唔癢喎,OKOK,佢都OK,乜都好好。」點知話口未完,3月19日就輪到苟姑娘高調睇城城騷,擺明挑機,之後仲要狂呻自己係被拖落水,又話:「呢啲係咪叫做爛桃花?我都好無奈,雖然成件事唔關我事,但我唔好意思,好似拉了佢哋落水,希望唔好影響佢哋的生活,我自己惟有勇敢面對。」

一講完呢句「爛桃花」,辣著咗正印Lynn。翌日佢哋於中環出席活動時,即發表「大婆」宣言,寸爆苟姑娘:「哈哈,係咩?爛桃花,唔好惹咪冇事,我好慘,冇桃花。」當時記者取笑佢先至係真桃花,Lynn就話:「我好驚麻煩,多一事不如少一事,依家有冇桃花都唔知。」

雖然之後苟姑娘即刻為「爛桃花」道歉,但Lynn仍不放心,於城城尾二果場個唱(3月24日)再度攻城,宣示主權。而城城完騷後,亦即時將藍髮染黑,仲笑笑口話:「藍(爛)桃花,完騷咪洗囉!」速剷爛桃花,無奈仍挽救不了分手事實。



.難敵7年癢 富黛戀玩完
http://hittt.blogspot.com/2013/04/7_17.html
Related Posts Plugin for WordPress, Blogger...