真面目
蝕少當賺 撲水買貝沙灣 古天樂 67折賣身黃百鳴
2012年10月17日41歲古天樂長拍長有，短短 2年內接了 13齣電影，密密拍戲狂吸金。
雖然未做過影帝，但古仔近年泊到好碼頭，除獲杜琪峯賞識、又被黃百鳴睇中，連續 4年搵古仔拍賀歲片。最近有傳黃百鳴旗下、準備於創業板上市的天馬娛樂， 2年前一炮過以 4,800萬拍 9部戲的價錢，將古仔包起，平均每套戲片酬約 533萬，以當時古仔 800萬片酬計，古仔足足打了個 67折給黃百鳴。據知古仔之所以肯賣大包，全因當時等錢買貝沙灣，急需一筆巨額現金到手。
一家便宜兩家著，呢單 big deal確係高招！
有價有市的古天樂，唔理大製作定小本爛片，總之今時今日身價企硬 1,200萬港幣，一蚊都唔減。現正在泰國拍攝彭順新動作片《逃出生天》的古仔，單計 2012已拍了《八星抱喜》、《高海拔之戀 II》和《毒戰》等 4部戲，連埋廣告及其他賺錢騷，保守估計已袋了 5千萬。
一炮過袋 4,800萬
上週二（ 9日），黃百鳴的天馬娛樂公布創業板招股文件，在「風險因素」一項中，寫明「已與一名演員訂立協議，自 2010年 6月 1日起計 6年間內參與我們的九部製作，該名演員已完成兩部電影」；而且有別於一般分 3期付片酬的行規，文件顯示黃百鳴當年一炮過支付 4,800萬予這位「演員」，平均每套戲片酬約 533萬。
據知該演員就是兩年內幫天馬拍了《開心魔法》及《八星抱喜》的古天樂，當年古仔身價達 800萬，即是打了個 67折，明益黃百鳴。
即買 1.26億獨立屋
肯賣大包以超抵價賣身，全因古仔當時等錢使，急需要一筆現金做首期。知情人士透露：「嗰時古仔啱啱用好多錢買物業，但又好想買貝沙灣，佢覺得樓市有升冇跌，係入市時機，所以想趁個價冇咁癲 嘅時候入市。不過佢 09年用咗億幾買香島道獨立屋，手頭上冇咁多現金做首期，咁 啱黃百鳴想搵佢合作，古仔嗰排又整親隻腳驚影響收入，咪決定搵 咗呢筆快錢先囉！」
據了解，古仔雖打了個大折扣給黃百鳴，但同時亦開出條件，要求接拍這 9套電影期間，亦可接其他電影，所以簽約後，他亦接拍了寰亞的《高海拔之戀Ⅱ》等電影。
撲水成功，古仔簽約後 1個月、即 2010年 6月出手入市，以 1.26億購入貝沙灣獨立屋，而該物業現已升至約 2.5億，賬面賺過億，證明古仔當年蝕賣自己絕對冇計錯數！
本刊亦致電 黃百鳴求證，他只說：「呢啲嘢唔好喺電話講。」後匆匆掛線。
賣樓賺過億
一向愛投資磚頭的古天樂，現時仍持有貝沙灣獨立屋及沙田兩個工業中心單位，總市值約 3億；另外，古仔多年來買賣物業有賺冇蝕，加加埋埋賺了 1.36億，娛圈樓神非佢莫屬！
5大天價男星
男演員片酬好似香港樓市一樣有升冇跌，冇過千萬都請唔鬱班巨星，當中以李連傑最誇，要近億先請得起佢，難怪早前文雋都開火炮轟片酬過高！
❶李連傑 9,000萬
❷周潤發 3,900萬
❸梁朝偉 3,000萬
❹劉德華 2,500萬
❺謝霆鋒 1,200萬
古天樂 1,200萬
