真面目
獨情傷 分手自閉戒女色 黃宗澤：我胃口唔好
2012年10月17日黃宗澤（ Bosco）與胡杏兒分手接近三個月，雖然 2人都未有新戀情，但分手後胡杏兒又上船 P又公開搵筍盤，分手後生活仍風騷。
反而被插花心男的黃宗澤，卻完全相反，頹爆暴瘦不特止，最近開工時更玩自閉，即使同索女周麗淇同場都唔敢埋身吹多兩句水。睇嚟今鋪 Bosco都好傷嚇喎！
自從今年 7月尾胡杏兒怒斬 8年情後，雖然有傳黃宗澤又短訊又出動 3卡鑽戒箍煲，但胡杏兒堅持冇回頭，公開分手後 Bosco速逃台灣拍電視劇，反觀胡杏兒喊完交代分手就回復靚心情，船 P夜蒲樣樣齊。
性格大變
箍煲唔成，據知 Bosco連性格都唔同曬，以前口花花嘅 Bosco分手後忽然變得好沉默。工作人員透露：「佢（ Bosco）同杏兒一齊嗰陣好多嘢講，喺片場逢人撩，同劇演員就實傾㗎啦，但係佢連化妝阿姐同工作人員都吹得一餐，乜都講㗎！不過 𠵱家佢真係靜咗好多，有時自己匿埋一邊，好似好多嘢諗咁！」
開工唔出聲， Bosco更連飯都冇胃口食，令他最近急瘦 10磅，即使放飯時間，他亦只是叫助手買飯盒，實行自我封閉謝絕吹水。早前趕拍新劇《好心作怪》時，與女主角周麗淇同場，兩人 4年前拍《最美麗的第七天》時好啱嘴形，當時更傳出過緋聞，但事隔多年，記者所見，分手 Bosco當日與周麗淇除了拍攝時焗住要交流外，其餘時間幾乎零溝通；到了之後跟王浩信拍攝另一場外景時， Bosco仍然冇乜笑容，男女通隔。
情傷自閉， Bosco當然否認，更反問記者：「我點會自閉呀？（話你唔食飯喎？）係之前喺台灣拍劇，搞到胃口唔好啫！」胃口好番，先可以活得比人好㗎！
分手杏兒勁風騷
黃宗澤箍煲失敗頹曬，反而胡杏兒決不回頭，分手後仲風騷過以前。近日正在拍攝《衝上雲霄 2》嘅胡杏兒，一啲都冇受分手影響，攬仔開 P樣樣齊。
