前亞視人寸爆騎呢騷 林建明：台之將亡必有妖孽
亞視為阻政府發出三個新免費電視牌照，前日以亞洲會之名在政府總部做騎呢騷表達訴求，部份職藝員被迫陪老闆王征做騷，亞視此舉更惹人反感，已離巢的林建明直言台之將亡，必有妖孽。
亞視老闆王征與高層盛品儒、鄺凱迎前日率領旗下職藝員到政總做騷，表達反對政府發新免費電視牌照的訴求，還將騎呢騷作一小時直播，不少亞視前藝人大為感慨，林建明昨在電話中說：「我睇咗新聞，笑到差啲嘔白泡！成班人好似小醜咁，出嚟都唔係示威、申訴，好騎呢！真係台之將亡，必有妖孽！政府點可以容忍一個電視台搞到亂七八糟㗎？成個亞視好似只得《感動香港》一個節目，政府更加要多發啲免費電視牌畀有心人做好。」對於有員工被迫出席，她直斥亞視執政人無良，認為大家應反抗。
【今日我至怪】陳煒離開咗亞視過無綫發展得唔錯，睇番轉頭見到亞視喺政總做騎呢騷都話好怪，真係走得快好世界啦！資料圖片
田蕊妮感心酸
田蕊妮透過《蘋果動新聞》看到騎呢騷，她笑言：「我想知王征跳舞關個訴求乜事呢？不如佢哋搞好自己個台先啦，身邊人個個都覺得亞視唔掂，但佢哋覺得自己好掂，自我感覺良好喎，我係亞視出嚟，但家好心酸。」
林建明心痛一班亞視舊同事被迫撐公司出席騎呢騷，大罵亞視無良。
田蕊妮見到王征跳舞大惑不解，坦言對舊公司現在情況感到心酸。資料圖片
盧海鵬昨與戚美珍到商台宣傳舞台劇《蝦仔爹哋II》，鵬哥被問到對亞視做法有何意見時笑住爆粗：「唔講喇，噚日都有記者問我，關我X事咩！」亞姐陳煒亦坦言：「如果我係員工，一定缺席呢啲活動，我睇完唔知講乜好，又安排班亞姐同亞生去做騷，根本佢哋都唔係亞視員工，唔可以代表啲乜嘢，騎呢到不得了，盛品儒叫口號鬧人都好怪。」黃麗梅亦覺得王征跟毛孟靜說話時的口脗，令她感覺似在內地，故認為政府應多發牌照，她說：「高層帶領跳舞真係騎呢到盡。」
下周又搞台慶
無綫外事部副總監曾醒明強調無綫並非反對發新牌照，只是不支持，無綫亦不會像亞視般到政總做騷表達訴求。
此外，亞視5月曾移師北京舉行晚會慶祝台慶，藝員向空櫈掟壽包成笑話，原來亞視台慶死唔斷氣，下周三（21日）再移師深圳舉行《亞視55周年星光大典》，表演嘉賓包括馮寶寶及「亞視Big Four」陳庭威、江華、潘志文及林韋辰等。
採訪：黃曉妍、丁寧
攝影：仇志德
王征前日在政總帶領亞姐、亞生跳騎呢舞來表達亞視訴求，做法難明令人失笑。
上一則:Eason親教囡囡性教育
下一則:軒仔帶胡鴻鈞返歸
