小報告
'12最爆 10大回顧 王維基：要請多 1,000人
2012年12月26日回顧 2012年香港娛樂圈風起雲湧，年尾整單藝人飯局兼 黃浩遭掌摑好睇過戲，但要選娛圈年度風雲人物，非香港電視老細王維基和杜汶澤莫屬。王維基揸旗的「香港電視」牌照未到手，但亞視老細王征已驚青跳馬舞，又話發新牌會執笠，新電視戰全城關注。
杜汶澤今年嘗盡人生起跌，怪病面對死亡威脅，卻以低成本拍攝《低俗喜劇》大賺 3千萬，刀仔鋸大樹，成為港產片奇葩。
仲有其餘本港娛樂圈大事，單單猛料仲曲折離奇過世界末日，又係時候集體回帶！
電視風雲 王維基：要請多 1,000人
免費電視牌照大戰今年進入白熱化，唔想多隻香爐的無綫及亞視即刻有反應；無綫更將員工擺上枱「要脅」政府，稱若發新牌員工明年可能冇人工加；亞視老細王征同高層盛品儒則帶埋成班藝員去政府總部外跳騎馬舞，又指魔童在亞視任職期間偷走機密資料，王維基不甘示弱，即發信控告盛品儒誹謗。
王維基對自己成為今年風雲人物時笑說：「唔敢當，唔敢當。」但繼續寸爆兩家電視台：「 TVB係既得利益者，賺咁多錢梗係驚我啦！我唔係急，只係想政府快啲做嘢，我仲要請多 1,000人（現時員工約 700多人），𠵱家產量唔夠，一定要 double產量先追到同無綫一樣。」
他又提到網友高呼叫亞視「執 X咗佢啦！」，王維基語帶相關說：「亞視我都幫唔到佢喎！我唔敢講佢會執笠，我真係要多謝佢哋，佢哋好幫得手囉，真係 friend嚟 㗎！幫我宣傳埋！不過我對佢啲人冇興趣，有熱誠肯做嘢 嘅個個都歡迎，但你睇佢哋係咪認真做嘢吖？」繼續辣火頭，王維基場仗有排打！
年度話題 第一位：阿徐飯局
黃浩有份投資的食店一品花雕雞， 11月爆出藝人飯局傳聞，黃浩聲稱廂房的閉路電視拍下去年 10月的飯局短片，涉及藝人有徐濠縈、何超儀、李璨琛等 23人。
至本月 5日黃浩參加落選港姐鄭嘉雯婚宴時疑遭曾志偉掌摑報警驗傷，志偉亦到警署接受問話，志偉事後又用「食屎狗」暗諷 黃浩。至於阿徐分別兩次跟丈夫陳奕迅及其餘飯腳如何超儀等召開記招澄清冇吸毒，而黃浩亦突然轉口風，稱自己沒有看過飯局短片。
以為 黃浩事件告一段落，點知上週三（ 19日），警方忽然拘捕曾志偉，而事發地點一品花雕雞亦發聲明指餐廳內裝有攝錄機，日日新鮮肯定係跨年重頭劇，入定花生係時候！
網上最 Hit 圍剿$500人情港女
500蚊港女可以話係今年網上最爆熱話，一切事緣上月在 facebook留言，「命令」朋友去佢婚宴，人情唔可以只畀 500：「有人真係畀得出 500我絕交都似」，大膽言論被放到網上瘋傳，港女遭網友狂插兼起底，搞到要日日戴口罩出街；港女未婚夫更要代妻向公眾道歉，婚禮亦會如期在本月 30日舉行，最近喜帖亦被貼上網。
500港女雖然被指貪錢，但本刊發現她並非愛花錢的人，反而極為慳家，一日返放工船車加埋開餐都只係$73，港女都有美德。
《低俗》最勁 杜汶澤：太開心好易迷失！
另一位娛樂圈風雲人物杜汶澤，今年可以話嘗盡人間起跌，年初視線出現疊影、四肢麻痹，證實患上激罕「米勒費雪症候群」怪病，嚴重會四肢癱瘓甚至死亡，嚇到阿澤停工休養，日日打坐食藥兩個月後才痊癒。
死過翻生，但阿澤今年監製兼主演的《低俗喜劇》票房勁收 3,073萬，僅次於由郭富城同梁家輝主演的《寒戰》，亦令他首次提名金馬獎「最佳男主角」，另憑《 DIVA華麗之後》提名「最佳男配角」，最終未能獲獎，但杜汶澤絕對是本年度港產片奇葩。
之前衰囂張周圍樹敵的阿澤，對於今年大豐收則好有體會話：「如果冇事發生好難體驗到人生，譬如病到差啲死，令我體會最深！冇好 嘅身體就算你幾成功都冇用，之後票房同獎項都有好成績，我覺得人生係充滿希望 嘅！電影 嘅成功亦係考驗，睇你會唔會仲係咁囂張呀、瘋狂呀，太開心好易迷失自己，我會成日警惕自己過往失敗嘅經驗，所以今年係寶貴 嘅一年！」
第二位：男星裸照案
要數全年最富娛樂性又牽涉最多藝人的新聞，輪到劉公子劉定成的男藝人裸照案！
62歲富家公子劉定成被控非禮及刑事恐嚇 3名男藝人，警方在劉家中搜出 6萬多張淫照及 49條 T-back，羅仲謙、陳偉霆、袁偉豪等被捲入事件。案情指劉公子曾邀男藝人及警員往酒店房或其跑馬地寓所試鏡，遊說他們只穿 T-back拍照，又逗弄他們的「小弟弟」，甚至拍下全裸照及「小弟弟」特寫。
案件於 6月宣判，劉公子被判踎監 17個月，至 10月申請保釋等候上訴，准以 5萬元換取暫時自由，過往意氣風發的劉公子出獄後激瘦 45磅兼頭耷耷，好在案件最快要到明年 4月至再展開聆訊，有自由就要享受嚇喇。
第三位：謙仔楊怡車震斷正
今年 9月羅仲謙駕車載住女友楊怡，由紅磡返回女方將軍澳領都住所附近，全程 30分鐘楊怡頭部好像消失了一樣，其後記者落車上前拍照，才發現楊怡成個頭埋在謙仔兩腿之間，記者狂影，但楊怡依然唔抬起頭。
黑面謙仔開車駛走，但上半身已無法思考的他終無力擺脫記者窮追，惟有返回領都停車場，當時楊怡已坐起身戴上鴨舌帽，卻不時用手抹嘴角，惹人無限遐想。
3日後兩人開記招，楊怡解釋當日飲得好醉：「飲醉 嘅過程係冇人想俾人睇到，而且對於自己信任 嘅人嚟講，我瞓喺佢大髀度，絕對係毋庸置疑。」又話嘔咗落碗雲吞麵之後嘴濕濕之所以抹嘴喎，呢單嘢比起《名媛》，仲考演技急才，先係楊怡代表作！
第四位：何韻詩出櫃
何韻詩入行 16年，性取向一直是話題，今年 11月 10日她終於繼黃耀明之後高呼：「我係同志！」親口承認是同性戀者。
出櫃宣言卻引發連串是非，傳過緋聞的容祖兒一度閉關失蹤，何詩被記者追問 Joey是否雙性戀時回應：「好難答！」似默認 Joey男女都愛。所謂出櫃一身輕，何詩上月失意金馬獎當日，即急回台北市密會女友鄧九雲，主動攬錫「老婆」，果然夠曬身體力行。
第五位：黎明樂基兒離婚
樂基兒 9月被爆撇低老公黎明同金髮新西蘭新歡 Cuz同遊峇里， 10月 3日黎明終宣布婚姻破裂，離婚收場。有傳 Gaile分到黎明兩億身家，但她接受訪問時否認：「千萬都講唔上。」最近 Gaile亦已重新投入工作，早前更被本刊影到東京工作並陪老細食飯。
第六位：李彩華的另類服務
今年 9月，寰宇老闆林小明前妻趙雪英，爆老公涉嫌曾逼李彩華（ Rain）向其他商人提供不道德服務，趙與李彩華情同姊妹，遂要求林與 Rain解約。
Rain接受訪問時感觸說：「嗰時俾人雪，捱過最艱難時間，可能個天見我咁慘，畀咗新希望我！」而林小明否認有逼 Rain提供另類服務，近日並入稟控告李彩華誹謗，要求法庭頒令李向林賠償。邊個講大話好快就知。
第七位： DBC執笠
DBC數碼廣播因股東爭拗而被迫叫停，台長鄭經翰直指是政治打壓，引發近 7萬群眾在政府總部門外聲援。大班更公開股東之一黃楚標的會議談話，黃即申請禁令，禁止大班再公開談論 DBC，而電台因涉嫌違反牌照條件被暫時吊銷廣播牌照 30日。大班則於上週一運作「 D100」網上廣播電台，義播 90日，繼續開咪。
第八位：祖師戀
何韻詩出櫃前，容祖兒與劉浩龍被踢爆同遊蘇梅島，師兄 6月出席「香港電視」活動時，突然單方面公開同容祖兒戀情，被指借容祖兒上位。
幾日後祖兒在微博交代事件：「和師兄的發展，仍然屬於初步階段。」又指跟何韻詩友情不變。不過老闆楊受成就唔睇好：「未成熟就講出嚟，好蠢！」老細有怨言，祖兒都係低調啲好。
第九位：《盛女》風波
今年 4月無綫播出真人騷《盛女愛作戰》引起全城熱話，但遭批評意識不良、貶低女性，及傳出參加者是做媒；而教人溝仔的兩性關係導師 Santino被爆曾做男公關、涉碌假咭運毒等。盛女 Bonnie加入商台主持《大龍鳳》，但至今年 10月，有傳 Bonnie惹蘇施黃不滿而被炒。上周五（ 21日），她在電話中說：「轉咗做 P.R.，有機會入番娛樂圈咪做囉，仲未有男友呀。」
第十位：《爆足一周》腰斬
查小欣主持的《爆足一周》被全城鬧爆，除咗話小欣姐個樣唔討好，觀眾指冇料爆兼報舊聞，被諷刺為「遲足一周」，結果只播映了 4集便被腰斬，全港網友拍手勁 like！
.[FACE]'12最爆 10大回顧 王維基：要請多 1,000人
http://veryy8.blogspot.com/2012/12/face-10-1000.html
